| e-texts navigator |
| Wylie |
286b1 ཆོས་ལ་དབང་ཡོད་པ་ནི། དེ་ལྟར་མི་འདོད་དམ། རྒྱལ་པོ་ཆེན་པོ། གང་གི་ཚེ་ང་རྒྱ་མཚོ་ཆེན་པོར་ཞུགས་པ་དེའི་ཚེ་ཆུ་དེའི་ནང་ན་གནས་པའི་སེམས་ཅན་རྣམས་ནི། བདག་ཉིད་ཆུའི་ནང་ན
286b2 གནས་སོ་སྙམ་དུ་འཛིན་ཏོ། །སྐམ་ས་ལ་གནས་པའི་སེམས་ཅན་རྣམས་ཀྱིས་ནི། རྒྱ་མཚོ་ཆེན་པོ་སྐམ་པར་མཐོང་ངོ་། །ཇི་ལྟར་གཞན་འཕྲུལ་དབང་བྱེད་པའི་ལྷ་རྣམས་ཀྱི་གནས་ཀྱི་བཀོད
286b3 པ་རྣམས་རྒྱན་ཐམས་ཅད་ཀྱིས་བརྒྱན་པ་དེ་བཞིན་དུ་ཀླུ་དང་། དྲི་ཟ་དང་། ལྷ་མ་ཡིན་གྱི་གནས་ཐམས་ཅད་ཀྱང་དེ་བཞིན་གཤེགས་པའི་འོད་ཀྱིས་ཁྱབ་པར་གྱུར་ཏོ། །རྒྱ་མཚོ་ཆེན་པོའི་ནང་གི
286b4 སེམས་ཅན་ཐམས་ཅད་ཀྱང་གཅིག་ལ་གཅིག་བྱམས་པའི་སེམས་དང་། ཕན་པའི་སེམས་དང་། གནོད་སེམས་མེད་པ་དང་། རྣམ་པར་འཚེ་བ་མེད་པར་གནས་པར་གྱུར་ཏོ། །དེ་ནས
286b5 བཅོམ་ལྡན་འདས་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཆེ་བ་ཉིད་དང་། བྱང་ཆུབ་སེམས
286b6 དཔའ་རྣམས་ཀྱི་ཐབས་ལ་མཁས་པ་དེ་ཙམ་དུ་བསམ་གྱིས་མི་ཁྱབ་པ་ནི། ངོ་མཚར་ལགས་ཏེ། འདི་ལྟར་ཀླུའི་རྒྱལ་པོ་རྒྱ་མཚོས་དེ་བཞིན་གཤེགས་པ་སྤྱན་དྲངས་ཏེ། དེ་ལྟར་སེམས་ཅན
286b7 གྱི་དོན་ཚད་མ་མཆིས་པ་བགྱིས་ན། བཅོམ་ལྡན་འདས། ཀླུའི་རྒྱལ་པོ་རྒྱ་མཚོས་ཡུན་ཇི་སྲིད་ཅི་གནས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལགས།
iiif viewer powered by OpenSeadragon
