| e-texts navigator |
| Wylie |
271a1 ཚིག་གཅོད་པར་བྱེད་པའོ། །སྨྲས་པ། བདག་ནི། ཚིག་གཅོད་པར་ཡང་མི་བགྱིད། སྒྲུབ་པར་ཡང་མི་བགྱིད་དོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་ནི།
271a2 གཅད་དུ་མ་མཆིས་པ་ལགས་ལ། ཚིག་ཐམས་ཅད་ནི། ཆོས་ཀྱི་དབྱིངས་སུ་ཡང་དག་པར་འདུ་བའི་སླད་དུའོ། །སྨྲས་པ། གང་ཁྱོད་ཀྱིས་བདག་བྱིས་པ་སོ་སོའི་སྐྱེ་བོ་ཐམས་ཅད
271a3 དང་མཉམ་སྟེ་བཞག་པ་དེ་ཁྱོད་འགྱོད་པར་མི་འགྱུར་རམ། སྨྲས་པ། བཙུན་པ་འོད་སྲུང་ཆེན་པོ། གལ་ཏེ་བདག་གིས་གནས་བརྟན་ཡང་ཐ་དད་ལ་བྱིས་པ་སོ་སོའི་སྐྱེ་བོ་ཐམས་ཅད
271a4 ཀྱང་ཐ་དད་པར་བཞག་པ་ནི། དེ་ལྟར་བདག་འགྱོད་པར་འགྱུར་བ་ཞིག་ན་གང་གི་སླད་དུ་བདག་གིས་གནས་བརྟན་བྱིས་པ་སོ་སོའི་སྐྱེ་བོ་ཐམས་ཅད་དང་ཐ་མི་དད་པར་བཞག་པ
271a5 དེས་ན|་བདག་འགྱོད་པར་མི་འགྱུར་རོ། །བཙུན་པ། མཚུངས་ཞེས་བགྱི་བ་དེ་ནི། ཆོས་ཐམས་ཅད་ཐ་དད་པ་མ་མཆིས་པ་དང་། ནམ་མཁའ་དང་མཚུངས་པ་ཉིད་ཀྱི་ཚིག་བླ
271a6 དྭགས་ལགས་སོ། །སྨྲས་པ། བུ་མོ། །ཅི་ཁྱོད་སོ་སོའི་སྐྱེ་བོ་རྣམས་དང་མཚུངས་སམ། འོན་ཏེ་འཕགས་པ་རྣམས་དང་མཚུངས། སྨྲས་པ། བཙུན་པ། བདག་ནི། སོ་སོའི
271a7 སྐྱེ་བོ་རྣམས་དང་མཚུངས་པའང་མ་ལགས། འཕགས་པ་རྣམས་དང་མཚུངས་པའང་མ་ལགས་སོ། །དེ་ཅིའི་སླད་དུ་ཞེ་ན། གལ་ཏེ་བདག་སོ་སོའི་སྐྱེ་བོ་རྣམས་དང་མཚུངས་ན
iiif viewer powered by OpenSeadragon
