| e-texts navigator |
| Wylie |
190b1 གཅིག་ཏུ་འདུག་གོ། །དེའི་ཚེ་རྒྱལ་པོ་ཆེན་པོ་རྣམ་ཐོས་ཀྱི་བུའི་ཁ་དོག་གི་མཐུས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བ་ཆེན་པོས་གསལ་བར་གྱུར་ཏོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ཕྱོགས་གཅིག་ཏུ་འདུག་ནས་དེའི་ཚེ་ཚིགས་སུ་བཅད་པ་འདི
190b2 དག་གསོལ་ཏོ། །རྐང་གཉིས་དམ་པ་རྫོགས་སངས་རྒྱས། །བློ་ལྡན་ཁྱོད་ཀྱིས་གང་མཁྱེན་པ། །ལྷ་རྣམས་ཀྱིས་ནི་དེ་མ་འཚལ། །དཔའ་ཆེན་ཁྱོད་ལ་ཕྱག་འཚལ་ལོ། །སངས་རྒྱས་གང་དག་འདས་པ་དང་། །ད་ལྟར་བྱུང་དང་མ
190b3 བྱོན་པ། །ཐམས་ཅད་ལ་ནི་བདག་ཕྱག་འཚལ། །ཁྱོད་ལའང་བདག་ནི་སྐྱབས་སུ་མཆིས། །བཙུན་པ་བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་དག་གནས་མལ་དགོན་པ་དང་།
190b4 ནགས་འདབ་དག་དང་། བས་མཐའ་དག་ན་གནས་པ་དག་ཀྱང་མཆིས་ལ། དེ་ལ་གནོད་སྦྱིན་དང་། མི་མ་ལགས་པ་གདུག་པ་གཉུག་མར་གནས་པ་གང་དག་བཅོམ་ལྡན་འདས་ཀྱི་གསུང་རབ་ལ་མངོན་པར་དད་པ་དག་དང་། མངོན་པར་མ་དད་པ
190b5 དག་ཀྱང་མཆིས་ཏེ། གནོད་སྦྱིན་དང་། མི་མ་ལགས་པ་གདུག་པ་གཉུག་མར་གནས་པ་གང་དག་བཅོམ་ལྡན་འདས་ཀྱི་གསུང་རབ་ལ་མངོན་པར་དད་པ་དེ་དག་ནི་ཤིན་ཏུ་ཉུང་ལ། གནོད་སྦྱིན་དང་། མི་མ་ལགས་པ་གདུག་པ་གཉུག་མར་གནས
190b6 པ་གང་དག་བཅོམ་ལྡན་འདས་ཀྱི་གསུང་རབ་ལ་མངོན་པར་མ་དད་པ་དེ་དག་ནི་ཆེས་མང་ལགས་ཏེ། བཙུན་པ་བཅོམ་ལྡན་འདས་ཀྱི་ཉན་ཐོས་དགེ་སློང་རྣམས་དང་། དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་འདི་ལྟར
190b7 བདག་ཉིད་བསྲུང་བ་དང་། བསྐྱབ་པ་དང་། བདེ་བ་ལ་རེག་པར་གནས་པར་བགྱི་བ་དང་། གནོད་སྦྱིན་དང་། མི་མ་ལགས་པ་གདུག་པ་གཉུག་མར་གནས་པ་མངོན་པར་མ་དད་པ་དག་མངོན་པར་དད་པར་བགྱི་བ་དང་། མངོན་པར་དད་པ་རྣམས
iiif viewer powered by OpenSeadragon
