| e-texts navigator |
| Wylie |
95b1 འདི་ལན་ཅིག་བཀླགས་ན། དེ་བདག་ཉིད་ཐར་བར་འགྱུར་རོ། །སུས་ལན་གཉིས་བཀླགས་ན་དེ་བུ་དང་ཆུང་མ་དང་ལྷན་ཅིག་ཐར་བར་འགྱུར་རོ། །སུས་ལན་གསུམ་བཀླགས་ན་དེ་རྩ་ལག་གི་སྐྱེ་བོ་དང་བཅས་ཏེ་ཐར་བར་འགྱུར་རོ། །སུས་ལན་བཞི་བཀླགས་ན་དེ་ཡུལ་འཁོར
95b2 ཐམས་ཅད་ཀྱང་ཐར་བར་འགྱུར་རོ། །སུས་ལན་ལྔ་བཀླགས་ན་དེ་ཉེ་འཁོར་གྱི་རྒྱལ་པོ་དང་བཅས་པ་ཐར་བར་འགྱུར་རོ། །ཡང་འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །ཆོས་ཀྱི་རྣམ་གྲངས་འདི་མྱུར་དུ་ཡུལ་གཞན་དག་ཏུ་བསྐུར་བར་བྱ་སྟེ། དེར་ཡང་ཡོན
95b3 ཏན་འདི་དག་འབྱུང་བར་འགྱུར་རོ། །ཚེ་བརྗོད་གང་གིས་ཆོས་ཀྱི་རྣམ་གྲངས་འདི་ཐོས་ལ་མི་འཛིན་ཏམ། མི་ཀློག་གམ། ཡི་གེར་མི་འདྲིའམ། ཡི་གེར་འདྲིར་མི་འཇུག་གམ། ཀུན་ཆུབ་པར་མི་བྱེད་དམ། གཞན་དག་ལ་རྒྱ་ཆེར་ཡང་དག་པར་མི་སྟོན་ཏམ། ཡུལ་གཞན་དུ་མི་འབྱིན་ཏམ། སེམས་ཅན
95b4 ཐམས་ཅད་དང་ཐུན་མོང་དུ་བྱས་ཏེ། མི་ཉན་ཏམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་མི་བསྔོ་ན་མཚམས་མེད་པ་ལྔ་བྱེད་པ་རྣམས་ཀྱི་འགྲོ་བ་ཅི་འདྲ་བ་དེ་འདྲ་བར་དེ་མངོན་པར་འགྲུབ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྨད་པའོ། །ཡང
95b5 འཇམ་དཔལ་གཞོན་ནུར་གྱུར་པས་དགེ་སློང་ཚེ་བརྗོད་ལ་འདི་སྐད་ཅེས་སྨྲས་སོ། །ཚེ་བརྗོད་སུ་ཞིག་འདི་ཚད་མར་མི་བྱེད་པ་དེ་ནི་ངས་ཐོག་མ་ཉིད་དུ་དད་པར་བྱས་པ་མ་ཡིན་ནོ། །འདི་ལྟར་འཛམ་བུའི་གླིང་པའི་སེམས་ཅན་ཐམས་ཅད་བདེ་བར་འགྱུར་བར་བྱ་བའི་ཕྱིར་ང་རིའི་རྒྱལ
95b6 པོ་རི་རབ་ལ་སོང་སྟེ། ལྷ་དང་དྲི་ཟ་རྣམས་ལ་རྗེས་སུ་བསྟན་པ་དང་མཐུན་པར་སྦྱར་བར་བྱ་བའི་ཕྱིར་ནན་ཏན་བྱའོ། །དེ་སྐད་ཅེས་སྨྲས་ནས། འཇམ་དཔལ་གཞོན་ནུར་གྱུར་པ་དེ་ཉིད་དུ་མི་སྣང་བར་གྱུར་ཏོ། །དགེ་སློང་ཚེ་བརྗོད་ཀྱིས་ཀྱང་འཇམ་དཔལ་གཞོན་ནུར་གྱུར་པས་སྨྲས་པ་ལ་མངོན་པར
95b7 བསྟོད་དེ་བཟུང་ནས་སོང་ངོ་། །འཕགས་པ་ཁྱད་པར་ཅན་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།
iiif viewer powered by OpenSeadragon
