| e-texts navigator |
| Wylie |
85a1 གཟུངས་སྔགས་འདི་རྗོད་བྱེད་དེ་ལ། །མི་མིན་གང་ཡང་རུང་བ་དང་། །གནོད་སྦྱིན་གྲུལ་བུམ་སྲིན་པོ་དག་།ནམས་ཀྱང་བར་ཆད་མི་བྱེད་དོ། །གཟུངས་སྔགས་འདི་རྗོད་བྱེད་དེ་ལ། །འདོད་ཁམས་དབང་ཕྱུག་གང་ཡིན་པ། །སྡིག་ཅན་བདུད
85a2 དེ་ནམ་དུ་ཡང་། །བར་ཆད་བྱེད་པར་མི་འགྱུར་རོ། །གཟུངས་སྔགས་འདི་འཛིན་བྱེད་དེ་ཡི། །ཕ་མ་དང་ནི་ཕུ་ནུ་དང་། །སྲིང་མོ་མཛའ་བཤེས་གཉེན་དག་ཀྱང་། །ལོག་པར་ལྟུང་བར་མི་འགྱུར་རོ། །དེ་ཕྱིར་གཟུངས་སྔགས་མདོ་སྡེ་འདི། །འཇིགས་མེད་གང
85a3 གིས་ཐོས་གྱུར་ནས། །གཟུངས་སྔགས་འདི་རྗོད་བྱེད་པ་དེས། །ནམས་ཀྱང་འཇིགས་པར་མི་བྱའོ། །གཟུངས་སྔགས་འདི་འཛིན་བྱེད་དེ་ཡི། །བསྐལ་པ་བྱེ་བ་སྟོང་རྣམས་སུ། །སྒྲིབ་པའི་ལས་ནི་གང་བྱས་པ། །ཞག་བདུན་གྱིས་ནི་བྱང་བར་འགྱུར། །བྱང
85a4 ཆུབ་སེམས་དཔའི་བསོད་ནམས་གང་། །བསྐལ་པ་བྱེ་བར་བསྒྲུབས་པ་ཀུན། །གཟུངས་སྔགས་འདི་འཛིན་བྱེད་པ་དེས། །ཞག་བདུན་གྱིས་ནི་ཟིལ་གྱིས་ནོན། །ཕྱོགས་བཞིའི་འཇིག་རྟེན་སྐྱོང་བ་པོ། །རྒྱལ་པོ་ཆེན་པོ་བཞི་པོ་དག་།ལུས་ངན་དང་ནི་ཡུལ
85a5 འཁོར་སྲུང་། །མིག་མི་བཟང་དང་འཕགས་སྐྱེས་པོ། །ཁ་དོག་ལྡན་ཞིང་གྲགས་དང་ལྡན། །འཁོར་བཅས་བློན་བཅས་དེ་དག་ཀྱང་། །གཟུངས་སྔགས་འདི་ནི་རྗོད་བྱེད་པ། །དེ་ལ་རྟག་ཏུ་སྲུང་བར་བྱེད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ
85a6 ནས། ཚེ་དང་ལྡན་པ་ཀུན་དགའ་བོ་དང་ཉན་ཐོས་ཆེན་པོ་དེ་དག་དང་། འཕགས་པ་བྱམས་པ་དང་། འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། རྒྱལ་པོ་ཆེན་པོ་བཞི་དང་། ལྷ་དང་། མི་དང་། ལྷ་མ་ཡིན་དང་།
85a7 དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རིག་སྔགས་ཀྱི་རྒྱལ་པོ་སྒྲོན་མ་མཆོག་གི་གཟུངས་རྫོགས་སོ།། །།
iiif viewer powered by OpenSeadragon
