| e-texts navigator |
| Wylie |
174b1 བཤད་དུ་གསོལ། བདག་ཅག་འཁོར་མང་པོ་རྣམས་ཤིན་ཏུ་ཐོས་པར་མོས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཚངས་པ་ཆེན་པོ་ལ་སྨྲས་པ། ལྷའི་རྒྱལ་པོ་ཁྱོད་ཐབས་མཁས་པས་སེམས་ཅན་ཐམས་ཅད་ལ་ཕན་གདགས་པའི་ཕྱིར
174b2 དེ་སྐད་དུ་དྲིས་པ་ཡིན་པས། དེང་ཁྱོད་ལེགས་པར་ཉོན་ཅིག་དང་བདག་གིས་ཁྱོད་ལ་མདོ་ཙམ་ཞིག་བཤད་པར་བྱའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ། དེ་ནི་སྙིང་རྗེ་ཆེན་པོའི་སེམས་ཡིན། མཉམ་པའི་སེམས་ཡིན། འདུས
174b3 མ་བྱས་ཀྱི་སེམས་ཡིན། མངོན་པར་ཞེན་པ་མེད་པའི་སེམས་ཡིན། སྟོང་པ་ཉིད་དུ་ལྟ་བའི་སེམས་ཡིན། གུས་པའི་སེམས་ཡིན། དམ་པའི་སེམས་ཡིན། འདྲེས་པ་མེད་པའི་སེམས་ཡིན། བླ་ན་མེད་པའི་བྱང་ཆུབ་ཀྱི་སེམས་ཡིན་ཏེ། དེ་ལྟ་བུའི་སེམས
174b4 གང་ཡིན་པ་དེ་དག་ནི་གཟུངས་ཀྱི་མཚན་ཉིད་ཡིན་པར་རིག་པར་བྱ་སྟེ། ཁྱོད་ཀྱིས་འདི་ཁོ་ན་བཞིན་དུ་མངོན་པར་བསྒྲུབ་པར་བྱའོ། །ཚངས་པའི་རྒྱལ་པོ་ཆེན་པོས་སྨྲས་པ། བདག་ཅག་འཁོར་མང་པོ་རྣམས་ནི་དེང་གདོད་གཟུངས་འདིའི་མཚན་ཉིད་གང་ཡིན་པ་ཁོང་དུ
174b5 ཆུད་པར་གྱུར་པས་དེང་ཕྱིན་ཆད་ཡོངས་སུ་བཟུང་ནས་བརྗེད་པར་བགྱིད་པའི་ཐུགས་མི་ཐུབ་བོ། །འཕགས་པ་སྤྱན་རས་གཟིགས་དབང་ཕྱུག་གིས་སྨྲས་པ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་རིག་སྔགས་འདི་འདོན་ཅིང་ཡོངས་སུ་འཛིན་པ་གང
174b6 ཡིན་པ་དེས་བྱང་ཆུབ་ཀྱི་སེམས་རྒྱ་ཆེན་པོ་བསྐྱེད་ནས། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བར་ཡི་དམ་ཡང་དག་པར་བླང་བར་བྱའོ། །བདག་ཉིད་གསོ་སྦྱོང་དང་ཚུལ་ཁྲིམས་ལ་གནས་ནས་སེམས་ཅན་རྣམས་ལ་མཉམ་པའི་སེམས་བསྐྱེད་དེ། རྟག་པར་རིག
174b7 སྔགས་འདི་རྒྱུན་ཆད་པ་མེད་པར་གདོན་པར་བྱའོ། །གནས་ཁང་གཙང་མའི་ནང་དུ་འདུག་སྟེ། ཡོངས་སུ་དག་པར་ཁྲུས་བྱས་ནས་གོས་གཙང་མ་བགོས་ཏེ། བ་དན་དཔྱངས་མར་མེ་སྦར་ཏེ། སྤོས་དང་། མེ་ཏོག་དང་། ཞལ་ཟས་ཀྱི་མཆོད་པ་བྱས་ནས་སེམས
iiif viewer powered by OpenSeadragon
