| e-texts navigator |
| Wylie |
170a1 བའི་ལས་དང་ཁ་ན་མ་ཐོ་བ་ལྕི་བ་རྣམས་ཡོངས་སུ་སྦྱང་ཞིང་བསལ་བ་དང་། སྒྲིབ་པའི་བགེགས་རྣམས་དང་འབྲལ་བ་དང་། ཆོས་དཀར་པོའི་ཡོན་ཏན་ཐམས་ཅད་འཕེལ་བར་བགྱི་བ་དང་། །དགེ་བའི་ས་བོན་ཐམས་ཅད་ཕུན་སུམ་ཚོགས་པར་བགྱི་བ
170a2 དང་། འཇིགས་ཤིང་སྐྲག་པ་ཐམས་ཅད་ཡོངས་སུ་སྤང་བར་བགྱི་བ་དང་། རེ་བ་ཐམས་ཅད་མྱུར་དུ་ཡོངས་སུ་རྫོགས་པར་བགྱི་བའི་སླད་དུ་དེང་བཤད་པར་འཚལ་ན། བཅོམ་ལྡན་འདས་ཐུགས་བརྩེ་བར་དགོངས་ཏེ་གནང་བར་མཛད་དུ་གསོལ། བཅོམ་ལྡན་འདས་ཀྱིས
170a3 བཀའ་སྩལ་པ། རིགས་ཀྱི་བུ་ཁྱོད་སྙིང་རྗེ་ཆེན་པོས་སེམས་ཅན་རྣམས་ལ་ཕན་པ་དང་། བདེ་བ་འདོད་པའི་ཕྱིར་རིག་སྔགས་བཤད་པར་འདོད་པས་དེང་དུས་ལ་བབ་ཀྱིས་མྱུར་དུ་སྨྲོས་ཤིག་དང་། དེ་བཞིན་གཤེགས་པ་ང་དང་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ
170a4 ཐུགས་དགྱེས་པར་མཛད་དོ། །བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་མངོན་པར་དྲན་ལགས་ཏེ། སྔོན་བྱུང་བའི་བསྐལ་པ་འབུམ་ཕྲག་ཚད་མ་མཆིས་པ་སྙེད་འདས་པ་དེའི་ཚེ
170a5 དེའི་དུས་ན། བཅོམ་ལྡན་འདས་དེ་བཞིན་གཤེགས་པ་འོད་སྟོང་གི་རྒྱལ་པོ་ཞི་བར་གནས་པ་ཞེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་དེས་བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཐོགས་པ་མ་མཆིས་པའི་ཐུགས་རྗེ་ཆེན་པོ་རྒྱ་ཆེར་ཡོངས
170a6 སུ་རྫོགས་པ་ཞེས་བགྱི་བའི་གཟུངས་འདི་བཀའ་སྩལ་ནས། ཕྱག་གསེར་གྱི་ཁ་དོག་ཅན་གྱིས་བདག་གི་སྤྱི་བོ་ལ་བྱུགས་ཏེ་འདི་སྐད་ཅེས། རིགས་ཀྱི་བུ་ཁྱོད་ཐུགས་རྗེ་ཆེན་པོའི་རིག་སྔགས་འདི་ཟུང་ཤིག་དང་། མ་འོངས་པའི་དུས་ངན་པའི་སེམས་ཅན་ཐམས་ཅད་ལ
170a7 ཕན་པ་དང་བདེ་བ་ཆེན་པོ་བྱེད་པར་འགྱུར་རོ་ཞེས་བཀའ་སྩལ་ཏོ། །བདག་དེའི་ཚེ་གདོད་ས་དང་པོ་ལ་གནས་པ་ལས་རིག་སྔགས་འདི་ལན་ཅིག་ཐོས་པ་ཙམ་གྱིས་ས་བརྒྱད་པ་ལས་ཡང་དག་པར་འདས་པར་གྱུར་ལགས་སོ། །བདག་དེའི་ཚེ་དེའི་དུས་ན་སེམས་རབ་ཏུ་དགའ་ཞིང་མགུ་བར་གྱུར
iiif viewer powered by OpenSeadragon
