| e-texts navigator |
| Wylie |
169a1 ཚད་མེད་པ་སྙེད་དང་ཐབས་ཅིག་སྟེ། ལྷའི་རྒྱལ་པོ་ཡུལ་འཁོར་སྲུང་ནི་གཙོ་བོར་གྱུར་ཏོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་།
169a2 མི་དང་མི་མ་ཡིན་པ་ལ་སོགས་པ་ཚད་མེད་པ་སྙེད་དང་ཐབས་ཅིག་སྟེ། ཀླུའི་རྒྱལ་པོ་ཆེན་པོ་རིའི་དཔལ་ནི་གཙོ་བོར་གྱུར་ཏོ། །གཞན་ཡང་འདོད་པའི་ཁམས་ཀྱི་ལྷའི་བུ་མོ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་མོ་གཞོན་ནུའི་མིག་ཅེས་བྱ་བ་ནི་གཙོ་མོར
169a3 གྱུར་ཏོ། །གཞན་ཡང་ནམ་མཁའི་ལྷ་དང་། ཆུ་བོ་དང་། རྒྱ་མཚོའི་ལྷ་དང་། ཆུ་མིག་གི་ལྷ་དང་། ཆུ་ཀླུང་གི་ལྷ་དང་། སྨན་གྱི་ལྷ་དང་། ལྗོན་ཤིང་གི་ལྷ་དང་། ནགས་ཚལ་གྱི་ལྷ་དང་། ཁང་ཁྱིམ་གྱི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་དང་།
169a4 སའི་ལྷ་དང་། རིའི་ལྷ་དང་། གཞལ་མེད་ཁང་ལ་སོགས་པའི་ལྷ་ཚད་མེད་པ་སྙེད་ཀྱང་སོ་སོ་ནས་འདུས་ཤིང་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འཁོར་མང་པོའི་ནང་དུ་གསང་སྟེ། རྫུ་འཕྲུལ་གྱིས་འོད་ཟེར་བཀྱེ་བས
169a5 ཕྱོགས་བཅུའི་འཇིག་རྟེན་གྱི་ཁམས་རྣམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་གསེར་གྱི་ཁ་དོག་ཅན་དུ་གྱུར་ཏོ། །ལྷའི་གཞལ་མེད་ཁང་རྣམས་དང་། ཀླུའི་ཁང་ཁྱིམ་རྣམས་དང་། ལྷའི་གཙོ་བོ་རྣམས་ཀྱི་གཞལ་མེད་ཁང་རྣམས་ཀྱང་རབ་ཏུ
169a6 གཡོས་པར་གྱུར། ཆུ་བོ་དང་། མཚོ་དང་། རྒྱ་མཚོ་ཆེན་པོ་དང་། རི་ཁོར་ཡུག་དང་། རི་རབ་ལྷུན་པོ་དང་། སའི་རི་དང་། རི་ནག་པོ་རྣམས་ཀྱང་རབ་ཏུ་གཡོས་པར་གྱུར་ཏོ། །ཉི་མ་དང་། ཟླ་བ་དང་། ནོར་བུ་དང་། མེ་དང་། རྒྱུ་སྐར་དང་། གཟའི་འོད་རྣམས་ཀྱང
169a7 ཟིལ་གྱིས་མནན་ཏེ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོས་ངོ་མཚར་རྨད་དུ་བྱུང་བའི་མཚན་མ་དེ་དག་མཐོང་བ་དང་། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་ངོ་མཚར་དུ་གྱུར་ནས། སྟན་ལས་ལངས་ཏེ་ཐལ་མོ་སྦྱར་ནས་འདི་སྐད་ཅེས། བཅོམ
iiif viewer powered by OpenSeadragon
