| e-texts navigator |
| Wylie |
99a1 ཞེས་གསུངས་སོ། །བདུད་རྩི་ཞུན་ཆེན་གྱི་བསྒྲུབ་པ་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །རློན་པའི་རྫས་ལ་སྨན་བསྒྲུབ་ན། །ཐམས་ཅད་གོང་མ་བཞིན་སྦྱར་ནས། །
99a2 མཎྜལ་ཐིག་ལ་ལྔ་པ་ལ། །བཀྲ་ཤིས་དཔལ་ལྡན་ལྔ་བཞག་ནས། །གཙོ་བོ་ལྔ་དང་འབྲས་བུ་ལྔ། །རློན་པར་བཀོད་ནས་ཡི་གེས་སྦྱང་། །ཏིང་འཛིན་བཟླས་པའི་མེ་སྦར་བས། །དང་པོ་རོ་འབྱུང་སྐམས་པ་དང་། །དེ་ནས་བཏག་བཙག་གོང་མ་བཞིན། །སྦྱར
99a3 ནས་རིགས་ཀྱི་བསྙེན་པས་སྦྱང་། །དེས་ནི་མཚན་མ་བྱུང་བ་དང་། །དེ་བཞིན་གོང་ལྟར་ཅི་བདེར་སྤྱད། །ཅེས་གསུངས་སོ། །བདུད་རྩི་རློན་སྦྱོར་གྱི་བསྒྲུབ་པ་བཤད་པའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས། བདུད་རྩི
99a4 སྨན་གྱི་བསྒྲུབ་པའི་ལེའུ་སྟེ་ཉི་ཤུ་རྩ་བཞི་པའོ། ། །།དེ་ནས་སེམས་དཔའི་རྡོ་རྗེ་ཆེན་པོ་དེས། སྒྲུབ་པ་ཐམས་ཅད་ཀྱི་སྙིང་པོ་གསང་ཆེན་ཐུགས་ཀྱི་སྒྲུབ་པ་ཞེས་བྱ་བ་འདི་བཤད་དོ། །འདུས་པ་ཆེན་པོའི་རྣལ་འབྱོར་པ་ཐམས་ཅད་ནི་དབྱིངས་སུ་ཤེས་པར
99a5 བྱ་སྟེ། འཁོར་བའི་ཆོས་ཐམས་ཅད་ནི་དབྱིངས་སུ་འདུས་ལ། མྱ་ངན་ལས་འདས་པའི་ཆོས་ཐམས་ཅད་ནི་ཡེ་ཤེས་སུ་འདུས་སོ། །དེ་གཉིས་སུ་མེད་པ་ནི་ཆོས་ཉིད་བྱང་ཆུབ་སེམས་ཀྱི་བདེ་བ་ཆེན་པོར་འདུས་པར་ཤེས་པར་གྱིས་ཤིག་།དེ་བས་ན་ཆོས་ཐམས་ཅད
99a6 ནི་ཐུགས་ཡེ་ཤེས་ཀྱི་རང་བཞིན་དུ་འདུས་ཏེ་གཉིས་སུ་མེད་དོ། །དེ་ལྟར་ན་ཀུན་རྫོབ་ཏུ་འདི་ལྟར་རིག་པར་བྱ་སྟེ་གཉིས་སུ་མེད་པའི་དོན་ལ་འཇུག་པར་བྱའོ། །འདུས་པ་ཆེན་པོའི་རྣལ་འབྱོར་པ། །དམ་པའི་དོན་གྱི་ཆོས་རྣམས་ཀུན། །ཐམས་ཅད་རང་གི་སེམས་ལ
99a7 རྫོགས། །ཀུན་རྫོབ་ཆོས་རྣམས་གང་ཡིན་པ། །ལུས་དང་ངག་ལ་རྫོགས་པར་བཤད། །དེས་ན་ཆོས་འདི་ཐམས་ཅད་ཀྱང་། །རྩ་བ་རང་ལ་རྫོགས་པ་སྟེ། །འདི་དག་བསྒྲུབ་པའི་ཐབས་མཆོག་ཀྱང་། །རྣམ་པར་རྟོག་པའི་རྡུལ་བསལ་ནས། །བསྒྲུབ་པའི་རྒྱལ
iiif viewer powered by OpenSeadragon
