| e-texts navigator |
| Wylie |
98b1 རྣལ་འབྱོར་པ། །རྡོ་རྗེ་རིག་འཛིན་རྩལ་ལྔའི་ཟས། །ལྡེ་གུའི་ཆོ་ག་ཆེན་པོ་ནི། །འདི་ལྟར་ཁོང་དུ་ཆུད་པར་བྱ། །སྦྲང་རྩི་བུ་རམ་རྒུན་འབྲུམ་རྣམས། །ལོ་ཡི་འཚོ་བར་སྦྱར་ནས་ཀྱང་། །ཁ་དོག་མཚན་ལྡན་དམར་པོའི་བ། །ལོ་ཡི་འཚོ་བར་གཟུང་ཞིང་བསྲེལ། །སྨན
98b2 གྱི་རྒྱལ་པོ་རམ་ཉེ་བས། །རྒྱུན་དུ་གསོས་པའི་འོ་མ་དེ། །རིག་འཛིན་ཟས་ཀྱི་མཆོག་ཏུ་འགྱུར། །བདུད་རྩི་རྒྱལ་མོ་རམ་ཉེ་བ། །ཕྱེ་མའི་མཆོག་ཏུ་བྱས་ནས་ཀྱང་། །ལོ་ཡི་འཚོ་བའི་སྦྱར་བྱས་ཏེ། །སུས་མི་མཐོང་བའི་ས་ཕྱོགས་སུ། །བསྒྲུབ་རྫས་དེ་དག་བཀྲམ
98b3 ནས་ཀྱང་། །བདུད་རྩི་བསྒྲུབ་པ་དེ་བཞིན་བྱ། །དུས་བབ་པ་ཡི་ཚོད་རྣམས་ལ། །བསྒྲུབ་རྫས་དེ་དག་ཐམས་ཅད་ཀྱང་། །བ་ཡི་འོ་མས་ལྡེ་གུར་བྱ། །ཆ་རེས་བསྐྱེད་ཅིང་བཟའ་བར་བྱ། །ཟོས་པའི་ཡོན་ཏན་བསམ་མི་ཁྱབ། །ཟག་པ་ཟད་ནས་ནམ་མཁར་འགྲོ། །
98b4 ཞེས་གསུངས་སོ། །བདུད་རྩི་ལྡེ་གུའི་བསྒྲུབ་པ་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །འདི་ཡང་གོང་མ་ལྟར་བྱས་ཏེ། །དེ་དང་མི་མཐུན་བསྒྲུབ་རྫས་རྣམས། །བདུད་རྩིར
98b5 འགྱུར་བའི་སྨན་རྣམས་ཀུན། །ཐམས་ཅད་ཐམས་ཅད་བསྡུ་བར་བྱ། །ཏིལ་ཆེན་ལ་སོགས་ཞུན་གྱི་མཆོག་།ཐམས་ཅད་བསྡུས་ཤིང་སྦྱར་བྱས་ནས། །གནས་ཀྱང་གོང་མ་བཞིན་བཙལ་ཏེ། །བདུད་རྩི་བཀྲམ་ནས་བསྒྲུབ་པར་བྱ། །འཕྲོ་འདུ་བཟླས་བརྗོད
98b6 རྒྱུན་མི་གཅད། །གྲུབ་པའི་རྫས་སུ་གྱུར་པ་དང་། །སྨན་རྣམས་ཕྱེ་མར་བཏག་པར་བྱ། །དེ་དག་ཕྱེ་མར་གྱུར་པ་དང་། །ཞུན་ཆེན་དག་དང་སྦྱར་བར་བྱ། །སྦྱོར་བའི་ཆོ་ག་རྫོགས་པ་དང་། །དངོས་གྲུབ་མཆོག་ནི་བླང་བར་བྱ། །གཞན་ནམ་གཞན་གྱི་སྡེ་པ་དང་། །ལོ
98b7 ཡིས་བཤུགས་ཏེ་འཕྲད་མི་བྱ། །འཚོ་བ་བདུད་རྩི་ཞུན་གྱིས་སྦྱར། །བདུད་རྩི་གྲུབ་པའི་རྟགས་ཆེན་ནི། །བ་སྤུ་ལངས་དང་གཟི་མདངས་འབར། །ཁམ་གྱི་ཟས་བྲལ་བདེ་བར་འཚོ། །ཤེས་རབ་གསལ་ཞིང་ཐོགས་པ་མེད། །ཟག་པ་ཟད་ནས་ནམ་མཁར་འགྲོ། །
iiif viewer powered by OpenSeadragon
