| e-texts navigator |
| Wylie |
96b1 ཕྱིར་ཞེ་ན། འདི་ལྟར་སྣང་བའི་ཆོས་ཐམས་ཅད་ཀྱི་དོན་རྟོགས་ན་ནི་འཚོ་བ་ཆོས་ཉིད་ཀྱི་རྩི་ཡིན། །མ་རྟོགས་ན་ནི་འཆི་བ་འཁོར་བའི་དུག་ཡིན། །དེ་བས་ན་ཆོས་འདི་དག་ཐམས་ཅད་བདུད་རྩིའི་རང་བཞིན་དུ་ཤེས་པར་བྱའོ། །དེ་ལྟར་ཤེས་ནས་ཀུན་རྫོབ་ཏུ་འདི་ལྟར་བསྒྲུབ
96b2 པར་བྱའོ། །ཇི་བཞིན་འབྱུང་ལྡན་བདེ་སྦྱར་ནས། །མ་ཏྲཾ་ཁོག་པའི་སྙིང་ག་རུ། །འདོམ་གང་ཚད་དང་མཐུན་པ་ལ། །རྩིབས་བརྒྱད་འབར་བའི་འཁོར་ལོར་གདབ། །མེ་ཡི་འོད་ཀྱིས་བསྐོར་བར་བྱ། །རྡོ་རྗེ་ར་བས་བསྐོར་བ་ཡི། །མཐའ་མ་སྒོ་ཁྱུད་འབར་བར་བྱ། །
96b3 དབུས་སུ་རིན་ཆེན་ཟུར་བརྒྱད་བྱ། །དེར་ནི་ཕྱག་རྒྱ་འབར་བ་དགོད། །ལང་ཀ་བསྒྲལ་བའི་གནས་མཆོག་འདིར། །རལ་པ་ཅན་གྱི་ཚོགས་འདུས་ཏེ། །རཀྵ་འཇོམས་པའི་མཐུ་ཆེན་ཀུན། །སྲིད་པ་གསུམ་རིལ་འདིར་སྒྲོལ་བའོ། །དུས་བཞི་མཆོད་པའི་དམ་རྫས་ཀྱིས། །དེ
96b4 དག་ཇི་ལྟར་རིགས་པར་མཆོད། །དུས་བཞི་བཅུད་སྨིན་སྙིང་པོ་ཡིས། །དངོས་གྲུབ་ཆེན་པོའི་རྫས་སུ་བྱ། །ཕྱོགས་བཞི་དབུས་ཀྱི་རྫས་ཆེན་རྣམས། །རྨད་དུ་བྱུང་བའི་རལ་པ་ཅན། །འབྱུང་བ་ལྔ་ལ་དབང་སྒྱུར་མཛད། །འབྱུང་བ་ལྔ་ཡི་ཆོ་འཕྲུལ་སྒྲུབ། །དབྱར་ཆུ
96b5 སྟོན་མེ་དགུན་ས་སྟེ། །དཔྱིད་རླུང་ནམ་མཁའ་གསང་བར་སྦྱར། །ཆོ་འཕྲུལ་དེ་ལ་དབང་ཐོབ་ནས། །དེ་དག་རལ་པ་ཅན་དུ་བསྒྲུབ། །ཏིང་འཛིན་རྣམ་པ་ལྔ་གསལ་བས། །འབྱུང་ལྔ་ལས་བྱུང་ཤ་རིགས་ལྔ། །ཁྱི་ཤ་བ་ལང་རྟ་ཤ་དང་། །བྱ་དང་སྣ་ཚོགས་ནི། །རྫུ
96b6 འཕྲུལ་ཤུགས་སུ་སྒྲུབ་པའི་རྫས། །སྒྲུབ་པའི་རྫས་ཆེན་འབྱུང་ཆེན་ལྔ། །འཇིག་རྟེན་ཀུན་ལ་དབང་སྒྱུར་བའི། །དེ་ལྟར་རྫས་རྣམས་འབྱོར་པ་དང་། །ཏིང་འཛིན་བསྒོམ་དང་བསྒྲུབ་པ་དང་། །ཐམས་ཅད་གོང་དང་མཐུན་སྦྱར་ནས། །འཇུག་དང་དངོས་གྲུབ་དབང་ཆེན་རྣམས། །
96b7 ཅི་རིགས་པར་ནི་བདེ་བར་སྦྱར། །ཞེས་གསུངས་སོ། །བདུད་རྩི་རང་བྱུང་དཀྱིལ་འཁོར་ཞེས་བྱ་བའི་མདོ་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །གཞན་ཡང་བདུད་རྩི་ཆེན་པོ་ནི། །གོང
iiif viewer powered by OpenSeadragon
