| e-texts navigator |
| Wylie |
83a1 ཀུན་དུ་ཁྱབ་པར་ལུས་བདེར་སྦྱར། །རྨད་བྱུང་སྒྲུབ་པའི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །འདོད་པར་བྱ་བ་བསྒྲུབ་པ་དང་། །གཏོར་མ་ལ་སོགས་རྫས་ཀྱི་རྣམས། །ཆ་གསུམ་དག་ལ་བགོས་ནས
83a2 ཀྱང་། །གཅག་ནི་སྦྱིན་སྲེག་ལས་མཆོག་བྱ། །གཅིག་ལ་རྣལ་འབྱོར་ལོངས་སྤྱོད་གཏེར། །གཅིག་ནི་མཁའ་འགྲོའི་འཁོར་ཚོགས་བསྐྱང་། །གནས་སུ་བཀྲ་ཤིས་ལ་སོགས་ཀྱིས། །སྒྲུབ་པ་རྫོགས་པས་མཐར་དབྱུང་ངོ་། །དུར་ཁྲོད་གསང་མཆོག་དབྱིངས་ཉིད་ལ། །
83a3 དཀྱིལ་འཁོར་དགུ་བརྩེགས་དཔལ་གྱི་རྒྱ། །ཡེ་ཤེས་དགུ་ཡི་ཁོང་གསེང་གསལ། །མེ་རི་འོད་ཀྱི་ཐིག་ཐག་གཅད། །འཁོར་ལོ་ཚོགས་ཆེན་བསྒྲུབ་པའི་ས། །རྣལ་འབྱོར་རྩལ་མཆོག་ཅན་གྱི་གནས། །སྒྲུབ་པ་རྩ་ཡི་དཀྱིལ་འཁོར་དེ། །དུར་ཁྲོད་གསང་བ་མཆོག་གི་མདོ། །
83a4 རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཚོགས་ཆེན་འདུས་པའི་བསྒྲུབ་ལུགས་ཀྱི་ལེའུ་སྟེ་བཅུ་གཉིས་པའོ།། །།དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་ཚོགས་རིག་འཛིན་ཐམས་ཅད་ངེས
83a5 པར་འགྲུབ་པར་འདོད་ན་འདི་ལྟར་རིག་པར་བྱའོ། །དེ་བཞིན་ཐམས་ཅད་ཀུན་རྫོགས་ནས། །རིགས་ཀྱི་ཁྱད་པར་འདི་དག་དབྱེ། །སོ་སོའི་རིགས་སུ་བསྒྲུབ་པར་བྱ། །རྡོ་རྗེ་ཅན་ལ་དཔལ་བེའུ་ནི། །དཀྱིལ་འཁོར་རྡོ་རྗེ་འབར་བའོ། །དེ་བཞིན་རིན་ཆེན་རིན་ཆེན་ཏེ། །པདྨ་དམར
83a6 པོ་འོད་ཀྱི་དཀྱིལ། །ལས་ནི་ཀུན་དུ་རྒྱ་གྲམ་འབར། །དེ་བཞིན་རིན་ཆེན་འཁོར་ལོར་འབར། །སོ་སོའི་རིགས་རྣམས་གཙོར་གཞག་སྟེ། །འཁོར་ནི་དེ་བཞིན་མི་འགྱུར་བར། །རྣམ་པར་བཀོད་དེ་ལེགས་སྦྱར་ནས། །བསྙེན་པ་དང་ནི་ཉེ་བསྙེན་པ། །བསྒྲུབ་དང་སྒྲུབ་ཆེན
83a7 རྫོགས་པར་བསྒྲུབ། །ཏིང་འཛིན་རྩལ་གྱི་ཁྱད་པར་ནི། །སོ་སོའི་རིགས་ནི་གང་ཡིན་པ། །ཏིང་འཛིན་བྱེ་བྲག་མང་པོ་ལ། །ཡིད་ཀྱི་སྦྱོར་བ་གསལ་བར་བྱ། །དེས་ནི་རིག་འཛིན་གང་འདོད་པ། །གསོལ་བར་ངེས་པར་འགྲུབ་པ་ཡིན། །ཞེས་གསུངས་སོ། །རྒྱུད་ཀྱི
iiif viewer powered by OpenSeadragon
