| e-texts navigator |
| Wylie |
74b1 གྱི་རྒྱ། །བཞི་པ་རིན་ཆེན་དཔལ་བེའུ་སྟེ། །ལྔ་པ་གསེར་གྱི་གུ་ཧྱའོ། །དྲུག་པ་ཟླ་གམ་དམར་པོ་ལ། །བདུན་པ་ཉི་ཟླ་ག་འུར་འབར། །ཚེ་ཡི་ངོ་བོ་རྒྱུད་གསུམ་པོ། །སྲོག་གི་ངོ་བོར་གཞལ་ཡས་ཁང་། །ལེ་བརྒན་འབར་བའི་དཀྱིལ་འཁོར་དུ། ། ཡུ་དམར
74b2 པོ་འོད་འཕྲོ་བ། །འཆི་བ་མེད་པའི་སྲོག་བཙུགས་ཏེ། །འགྱུར་བ་མེད་པའི་གཡུང་དྲུང་ཡིན། །ཆོས་ཉིད་དབྱིངས་སུ་ཚེ་སྦས་པས། །དུས་གསུམ་རྒྱལ་བ་དགྲར་ལངས་ཀྱང་། །དེ་ལ་གཟུང་ཞིང་བསྟན་དུ་མེད། །དེ་ནས་ཅི་བདེ་སྤྱད་པར་བྱ། །རྡོ་རྗེ་ཚེ་སྒྲུབ་པའོ། །
74b3 དེ་ནས་སེམས་དཔའི་རྡོ་རྗེ་དམ་པ་དེ་རྡོ་རྗེ་ཁྲོ་བོ་ཚེ་ཀུན་དུ་འཕྲོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །གནས་འགྱུར་མཎྜལ་འབར་བྱས་ལ། །ཡེ་ཤེས་ཁྲོ་བོ་འབར་བ་ཡི། །ཐུགས་ཀྱི་དཔལ་བེའུའི་འོད་ཟེར་ལས། །
74b4 དབང་གི་ལྷ་མོ་མང་པོ་འཕྲོས། །ཟ་མ་ཏོག་དང་བཅས་པ་ཡི། །ལྕགས་ཀྱུ་དཀར་དམར་ལག་ན་ཐོགས། །དེ་ཡིས་འགྲོ་དྲུག་ཐམས་ཅད་ཀྱི། །ཚེ་དང་གཟི་བྱིན་ཐམས་ཅད་འཕྲོགས། །ཟ་མ་ཏོག་ཏུ་བསྡུས་ནས་ཀྱང་། །ཚེ་ཡི་རིག་འཛིན་རྣམས་ལ་བསྟིམ། །ཇི་ལྟར
74b5 འདོད་པ་གོང་ལྟར་སྦྱར། །རྡོ་རྗེ་གཟི་མདངས་འཕྲོག་པ་ཞེས་བྱ་བའི་མདོའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་ཚེ་བསྒྲུབ་པའི་ལེའུ་ཞེས་བྱ་སྟེ་བཅུ་གཅིག་པའོ།། །།དེ་ནས་སེམས་དཔའི་རྡོ་རྗེ་དམ་པ་དེ་ཚོགས་ཐམས
74b6 ཅད་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་འདི་རྒྱ་ཆེར་བཤད་དོ། །དཀྱིལ་འཁོར་དཀྱིལ་འཁོར་ཐམས་ཅད་ཀྱི། །རྩ་བའི་དཀྱིལ་འཁོར་དམ་པ
74b7 འདི། །འཁོར་བ་ཐམས་ཅད་བསྒྲལ་བའི་ཕྱིར། །རྣལ་འབྱོར་ཅན་ལ་བཤད་པར་བྱ། །ཉོན་ཅིག་འདུས་པ་ཆེན་པོའི་ཚོགས། །སྒྲུབ་པའི་གནས་མཆོག་དམ་པ་དག་།སྐྱོན་ཡོན་གཉིས་ཀྱི་བྱེ་བྲག་ལས། །ངེས་པར་བརྟགས་ཏེ་ཤེས་པ་ལས། །བླང་དོར
iiif viewer powered by OpenSeadragon
