| e-texts navigator |
| Wylie |
69a1 ཡལ་བར། །དེ་མ་ཐག་ཏུ་གནས་སུ་སླེབས། །རོ་ལ་འདོད་པ་ཀུན་འབྱུང་ཞེས། །དུས་གསུམ་རྒྱལ་བ་རྣམས་ཀྱིས་བཤད། །ཅེས་གསུངས་སོ། །རོ་ལངས་བསྒྲུབ་པའི་ཏིང་ངེ་འཛིན་ཏོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་རྡོ་རྗེ་ནམ
69a2 མཁའི་ཐེམ་སྐས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་རྡོ་རྗེར་བསྒོམས་ནས་ཀྱང་། །ཏིང་འཛིན་རེད་པར་གྱུར་པ་ན། །ཕན་ཚུན་གྱ་གྱུའི་ཐབས་ཚུལ་དུ། །རྡོ་རྗེ་སྐས་ལ་བགྲོད་ནས་ནི། །ནམ་མཁའི
69a3 དབྱིངས་སུ་སོང་ནས་ཀྱང་། །སྣང་སྲིད་འཇིག་རྟེན་ཁམས་ལ་བལྟ། །དེས་ནི་སེམས་ཡུལ་ཡངས་པར་འགྱུར། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་རྒྱ་མཚོ་ཆེན་པོ་གནོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད
69a4 ཅེས་གསུངས་སོ། །རྒྱ་མཚོ་རྡོ་རྗེས་གཏམས་པར་ནི། །ཏིང་འཛིན་གསལ་བར་གྱུར་པ་དང་། །རྒྱ་མཚོ་ཆེན་པོར་བགྲོད་ནས་ནི། །རྒྱ་མཚོར་གནས་པའི་སེམས་ཅན་རྣམས། །ཏིང་འཛིན་རྡོ་རྗེས་བསྒྲལ་བར་བྱ། །ཞེས་གསུངས་སོ། །དེ་ནས་ཡང་སེམས
69a5 དཔའི་རྡོ་རྗེ་སྙིང་པོ་དེ་ཐོགས་མེད་རླུང་ཟླའི་དཀྱིལ་འཁོར་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་དག་གི་ལིངྒ་ལ། །ཟླ་བའི་དཀྱིལ་འཁོར་དབུས་གནས་པར། །བསྒོམ་ཏེ་ཏིང་འཛིན་རྟས་པ་དང་། །ཞིང་ཁམས་ཀུན་དུ་བགྲོད་པར་བྱ། །
69a6 ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་ཉི་མ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་དག་གི་ལིངྒ་ལ། །ཉི་མའི་དཀྱིལ་འཁོར་དབུས་གནས་པར། །བསྒོམས་ཏེ
69a7 ཏིང་འཛིན་རྟས་པ་དང་། །མུན་པའི་གནས་རྣམས་ཐམས་ཅད་བསལ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་སྲེག་པའི་བསྐལ་པ་གཞིལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྣལ་འབྱོར་སྡིགས་མཛུབ་རྩེ་མོ
iiif viewer powered by OpenSeadragon
