| e-texts navigator |
| Wylie |
67b1 འཇིགས་པར་སྒྲོགས། །ཐེག་ཆེན་དོན་དམ་གསང་སྔགས་སྒྲོགས་པའི་ཚིག་།འབར་བའི་སྨིན་མ་མུན་རུམ་གློག་ལྟར་འགྱུ། །སྤྱན་དམར་བཟློག་པའི་སྡང་མིག་ཉི་ལྟར་འབར། །འབར་བའི་ཤངས་ནས་བསྐལ་པའི་ཚུབ་ནག་འཁྱིལ། །རྡོ་རྗེ་ཐོག་དང
67b2 གནམ་ལྕགས་སེར་ཆེན་འབེབས། །རྣོ་དབལ་མཆེ་བ་ཟང་ཡག་གཙིགས་པ་ཡིས། །ཉོན་མོངས་ལོག་ལྟའི་ཚོགས་ལ་ངམ་ཞིང་འཁྲུག་།ཐོད་རུས་ཤ་ཁྲག་རྐང་རུས་འབུ་དང་རྣག་།ཟ་བྱེད་རྔམ་པའི་ཞལ་དུ་ཆེམ་ཆེམ་གསོལ། །སྦྲུལ་གདུག་ཀོ་རློན་ལ
67b3 སོགས་འཇིགས་པའི་རྒྱན། །རྔམ་པའི་སྐུ་ལ་ཤིན་ཏུ་བརྗིད་པར་བརྒྱན། །ཟ་བྱེད་རྔམ་དང་འཇིགས་བྱེད་མང་པོའི་ཚོགས། །འབར་བའི་ཕྱག་མཚན་སྤྲུལ་པའི་ཕོ་ཉ་མཛད། །འཁོར་བ་ཀུན་དང་ཐར་པའི་ཆོས་རྣམས་ཀུན། །དཔའ་བོ་ཆེན་པོའི་གདན་དུ་བརྗིད
67b4 རིང་རོལ། །འགྲན་གྱི་ཟླ་མེད་ཆེ་བཙན་གཅིག་པུ་ཉིད། །གསང་མཆོག་འབར་བའི་སྐུ་ལ་ཕྱག་འཚལ་བསྟོད། །དེ་སྐད་ཅེས་བསྟོད་པས་ཆོས་ཐམས་ཅད་སྐུ་ལ་ཡོངས་སུ་རྫོགས་ཤིང་སངས་མ་རྒྱས་པ་མེད་པར་གྱུར་ཏོ། །དེ་ནས་ཡང་བཅོམ་ལྡན་འདས་གསང
67b5 བ་མཆོག་གི་བདག་པོ་དེ་ཉིད་ཕྱག་རྒྱ་ཐམས་ཅད་ཕྱག་རྒྱ་བཀོད་པའི་ཕོ་བྲང་དུ་གྱུར་ཏོ། །སྤྲོ་བ་རྒྱུན་གྱི་ཏིང་ངེ་འཛིན་ཞེས་བྱའོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཆོས་ཉིད་རྒྱུན་གྱི་ཏིང་ངེ་འཛིན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས
67b6 སོ། །ཆོས་ཀྱི་རྒྱུན་གྱི་ཏིང་ངེ་འཛིན་འདི་གསུངས་སོ། །ནམ་མཁའ་དོན་གྱི་གླེགས་བམ་ལ། །སྐར་ཚོགས་རིག་པའི་ཡིག་བྲིས་ཏེ། །འབྱུང་ཆེན་བཞི་ཡི་སྒྲ་བསྒྲགས་པས། །གསང་སྔགས་ཆོས་ཀྱི་རྒྱུན་མི་འཆད། །ཆོས་ཀྱི་རྒྱུན་གྱི་ཏིང་ངེ་འཛིན་ཞེས་བྱ
67b7 བ་ཡོངས་སུ་རྫོགས་སོ། །དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས་བདུད་རྩི་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །སྟོང་གསུམ་བྷན་དྷའི་བཟང་ཁོང་དུ། །སྲིད་གསུམ་སེམས་ཅན་དུག་ཆེན་ལས། །
iiif viewer powered by OpenSeadragon
