| e-texts navigator |
| Wylie |
65b1 བཞིན་དུ་གནས་པར་མཐོང་ངོ་། །དེ་ནས་རླབས་ཀྱི་འོད་ཟེར་ལས་ཆོ་འཕྲུལ་གྱི་སྒྲ་འདི་བྱུང་ངོ་། །རྒྱུ་ཡི་ཡི་གེ་འོད་ཟེར་ལས། །ཆུ་ཡི་སྙིང་པོའི་ཆོ་འཕྲུལ་ཤར། །ནམ་མཁའི་མཐའ་དང་མཉམ་པའོ། །རླུང་མཚོ་ཐམས་ཅད་རྒྱས་པར་གྱུར། །ཞེས་སྒྲ་བྱུང་བས
65b2 ཐམས་ཅད་ཡུམ་རིན་ཆེན་དབྱིངས་ཕྱུག་མའི་རང་བཞིན་གྱིས་ཁྱབ་པར་གནས་སོ། །དེ་ནས་ཡུམ་ཆེན་མོ་རྡོ་རྗེ་དབྱིངས་ཕྱུག་མ་ཞེས་བྱ་བས་ཞིང་ཁམས་ཐམས་ཅད་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པ་ཕལ་མོ
65b3 ཆེའི་འཁོར་གྱིས་ཆོས་ཐམས་ཅད་ས་རྣམས་ཡོངས་སུ་རྫོགས་པའི་རང་བཞིན་དུ་མཐོང་ངོ་། །དེ་ནས་ས་རྡོ་རྗེ་འབར་བ་ཞེས་བྱ་བ་ལས་ཆོ་འཕྲུལ་གྱི་སྒྲ་བྱུང་བ། མི་དམིགས་པ་ལས་སྣ་ཚོགས་པར། །སྣང་བའི་ཆོ་འཕྲུལ་འདི་བྱུང་བ། །རྣལ་འབྱོར་ས་བཅུ
65b4 རྫོགས་པའི་དོན། །ལྷུན་གྱིས་གྲུབ་པས་བདེ་བ་ཆེ། །ཞེས་སྒྲ་བྱུང་བས་ས་དགུ་འདུལ་བའི་བྱེ་བྲག་ཏུ་ཐུགས་སུ་ཆུད་པར་གྱུར་ཏོ། །དེ་ནས་སེམས་དཔའི་རྡོ་རྗེ་སྙིང་པོ་དེ་རི་བོ་བརྩེགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེས་འདུས་པ་ཕལ
65b5 མོ་ཆེའི་འཁོར་གྱིས་ཆོས་ཐམས་ཅད་རྡོ་རྗེ་འབར་བའི་རི་བོར་མཐོང་ངོ་། །དེ་ནས་དེའི་འོད་ལས་ཆོ་འཕྲུལ་གྱི་སྒྲ་འདི་བྱུང་ངོ་། །རྣམ་དག་ཤེས་རབ་མཁའ་ཀློང་ནས། །རྡོ་རྗེ་འབར་བའི་རི་བོ་ཤར། །རྒྱ་ཆེ་གཏིང་ཟབ་ནམ་འཕང་གཅོད། །རྟོག་པའི་རི་བོ་འཇོམས
65b6 པར་བྱེད། །ཅེས་སྒྲ་བྱུང་བས་རྡོ་རྗེ་འབར་བའི་རི་བོས་ཉོན་མོངས་པའི་རི་བོ་ཐམས་ཅད་ཟིལ་གྱིས་མནན་ནོ། །དེ་ནས་དབྱིངས་ཕྱུག་མ་ཆེན་མོ་ལྔ། ཤེས་རབ་ཟབ་མོའི་གཞལ་ཡས་ཡུམ་གྱི་མཁའ་ཀློང་རྣམ་དག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས
65b7 སོ། །བྷ་གའི་སྙིང་པོ་ལས་ཆོ་འཕྲུལ་གྱི་སྒྲ་འདི་བྱུང་ངོ་། །བྷ་ག་གསང་བའི་འོད་ཟེར་ལས། །བདེ་གཤེགས་བཞུགས་པའི་གཞལ་ཡས་ཁང་། །ནམ་མཁའི་མཐའ་ལྟར་དཔག་ཏུ་མེད། །དུས་གསུམ་རྒྱལ་བ་རྒྱ་མཚོའི་དབྱིངས། །ཞེས་སྒྲ་བྱུང་ངོ་། །
iiif viewer powered by OpenSeadragon
