| e-texts navigator |
| Wylie |
45b1 འདྲིམ་པའི་བརྡ་ཐབས་སོ། །མ་ཧཱ་གིང་ཆེན་ཀརྨ་དང་། །རྡོ་རྗེ་དྲོད་ཀྱི་རྟགས་འཛིན་ལས། །སོགས་པའི་བརྡ་ཡི་དམ་ཚིག་རྣམས། །རྣལ་འབྱོར་ཅན་གྱིས་སྤྱད་ན་འགྲུབ། །ལུས་བརྡ་དམ་ཚིག་ཕྱག་རྒྱའོ། །ཞེས་སྨྲ་བའི་སེང་གེས་གསུངས་སོ། །རྒྱུད་ཀྱི་རྒྱལ་པོ་ཆེན
45b2 པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་བརྡའི་ལེའུ་སྟེ་ལྔ་པའོ། ། །།དེ་ནས་ཡང་སྨྲ་བའི་སེང་གེ་སེམས་དཔའི་རྡོ་རྗེ་དེ་རྣལ་འབྱོར་རོལ་པའི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས
45b3 བཞེངས་པར་གྱུར་པ་དང་། འདུས་པ་ཆེན་པོའི་ཚོགས་ཀྱིས་གསོལ་པ། སྨྲ་བའི་སེང་གེ་ཆེན་པོ་ཆོས་ཐམས་ཅད་ནི་རྡོ་རྗེ་ཚོགས་ཀྱི་དཀྱིལ་འཁོར་དུ་བདག་ཅག་རྣམས་ཀྱིས་མཐོང་ངོ་ཞེས་གསོལ་པ་དང་། སྨྲ་བའི་སེང་གེས་བཀའ་སྩལ་པ། འདུས་པ་ཆེན་པོའི
45b4 ཚོགས་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཡིན་པར་ཤེས་པར་གྱིས་ཤིག་། ཅེས་བཀའ་སྩལ་པ་དང་། འདུས་པའི་ཚོགས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཀྱི་དཀྱིལ་འཁོར་གྱི་དོན་བདག་ཅག
45b5 རྣམས་ལ་རྒྱ་ཆེར་བཤད་དུ་གསོལ། །སེམས་དཔའ་ཆེན་པོས་བཀའ་སྩལ་པ། ཉོན་ཅིག་འདུས་པ་ཆེན་པོའི་ཚོགས། །རྡོ་རྗེ་ཚོགས་ཀྱི་དཀྱིལ་འཁོར་འདི། །རྒྱལ་བ་རྣམས་ཀྱི་ཐུགས་དམ་སྟེ། །རྣལ་འབྱོར་ཀུན་གྱིས་སྤྱད་པའི་ལམ། །ས་མཆོག་བགྲོད་པའི
45b6 ལམ་འདི་དག་། འདུས་པའི་ཚོགས་ལ་བཤད་པར་བྱ། །བརྩམ་པ་ལས་ཀྱི་དང་པོ་པ། །རྡོ་རྗེ་ཚོགས་ལ་འཇུག་པ་ན། །ཁྱད་པར་རིམ་པ་ཅི་བཞིན་དུ། །ལས་མཆོག་འདི་ཡི་རང་བཞིན་གྱིས། །ཇི་བཞིན་རིམ་པར་སྦྱངས་ནས་ཀྱང་། །ས་རབ་མཆོག་ཏུ་བགྲོད
45b7 པ་ལ། །ཐབས་མཆོག་ལྔ་ཡིས་བགྲོད་བྱ་སྟེ། །རྡོ་རྗེ་ཚོགས་དང་བསྙེན་པ་དང་། །ཉེ་བ་དང་ནི་བསྒྲུབ་པ་དང་། །བསྒྲུབ་པ་ཆེན་པོར་སྦྱར་བར་བྱ། །ཇི་ལྟར་གྲངས་དང་དུས་ཆེན་དང་། །མཚན་མ་བྱུང་བར་བཅས་རྣམས་ལས། །གབ་པའི་སྦ་ཐབས་དེ་སྦྱར་ནས། །
iiif viewer powered by OpenSeadragon
