| e-texts navigator |
| Wylie |
44a1 ལྷུན་རྫོགས་བདེ་བ་ཆེན་པོ་ཡི། །ཁྱབ་པ་ཆེན་པོར་ཀུན་བདལ་བས། །སྒྲིབ་པ་ཀུན་བྱང་ཚོགས་ཀུན་རྫོགས། །རྣམ་གྲོལ་བཅིངས་པ་ཀུན་དང་བྲལ། །ལྷུན་གྲུབ་བདེ་བའི་གནས་ཆེན་ཡིན། །ཞེས་སྨྲ་བའི་སེང་གེ་ཆེན་པོས་གསུངས་སོ། །རྒྱུད་ཀྱི
44a2 རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དམ་ཚིག་གསང་བ་མཆོག་གི་ལེའུ་ཞེས་བྱ་སྟེ་བཞི་པའོ། ། །།དེ་ནས་ཡང་སེམས་དཔའི་རྡོ་རྗེ་དེ་ཆོས་ཐམས་ཅད་བརྡས་མཚོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ
44a3 འཛིན་དེ་ལས་བཞེངས་པ་དང་། འདུས་པ་ཆེན་པོའི་འཁོར་རྣམས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་ནི་བདག་ཅག་རྣམས་ཀྱིས་བརྡ་རིག་པ་ཙམ་གྱི་ངོ་བོར་མཐོང་ངོ་། །དེ་ནས་སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི
44a4 ཚོགས་ཆོས་ཐམས་ཅད་ནི་བརྡ་དང་། ཐ་སྙད་དང་། བཏགས་པ་ཙམ་དུ་ཤེས་པར་གྱིས་ཤིག་།བཏགས་པའི་ཆོས་ཐམས་ཅད་ནི་ཕྱི་ནང་གང་ན་ཡང་མི་གནས་ཏེ། ཆོས་ཐམས་ཅད་ལ་མིང་གི་གཞི་མེད་ཅིང་བཏགས་པའི་ཐ་སྙད་དང་བྲལ་བ་ཡིན་ནོ། །བརྡ་ཞེས་བྱ
44a5 བ་ནི་སྦས་པ་བཏགས་པའི་ཐ་སྙད་ཡིན་ནོ། །སྦས་པའི་ཆོས་རྣམས་གསང་བའི་ཕྱིར། །ཐམས་ཅད་སྦ་ཞིང་བརྒྱུད་པར་བྱ། །འདི་ལྟར་བརྡ་ཡི་སྦྱོར་བ་ལ། །རྣལ་འབྱོར་ཅན་གྱིས་ཤེས་པར་གྱིས། །དེ་ནས་འདུས་པའི་རྣལ་འབྱོར་རྣམས་ཀྱིས་གསོལ་པ། སེམས
44a6 དཔའ་ཆེན་པོས་བརྡ་ཡི་ཆོས་རྣམས་རྒྱ་ཆེར་བཤད་དུ་གསོལ། །བདག་ཅག་གིས་ཀྱང་ཆོས་ཐམས་ཅད། །བརྡ་ཡི་དོན་གྱིས་བརྒྱུད་པར་བགྱི། །བརྡ་ཞེས་བགྱི་བ་ཇི་ལྟ་བུ། །སྦས་པའི་ཆོས་ནི་གང་དང་གང་། །མི་བསྟན་གསང་བ་གང་གང་ལགས། །དེ་སྐད་ཅེས
44a7 གསོལ་པ་དང་། སྨྲ་བའི་སེང་གེས་བཀའ་སྩལ་པ། ཉོན་ཅིག་འདུས་པ་ཆེན་པོའི་ཚོགས། །བརྡ་ཞེས་བྱ་བ་སྦས་པའི་ཚིག་།སྦས་ཏེ་གསང་བའི་ཆོས་རྣམས་ནི། །རྣལ་འབྱོར་ཆེན་པོའི་སྤྱོད་པ་ཡིན། །མི་བསྟན་གཞན་ལ་གསང་བ་ནི། །མུ་སྟེགས་ལ་སོགས
iiif viewer powered by OpenSeadragon
