| e-texts navigator |
| Wylie |
307b1 འབྱམ་ཀུན། །ཁྲོས་པས་ཡུད་ཙམ་རླག་མཛད་དེ། །བརླག་པར་མ་གྱུར་གང་ཡང་མེད། །འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་ལས་ཀྱི་ལེའུ་སྟེ་བཅུ་བདུན་པའོ།། །།རྡོ་རྗེ་ཕྲ་མེན་སྦྱོར་བ་ཡིས། །ཡུད་ཙམ་གྱིས་ནི་དེ་བཀུག་ནས། །རྟོད་པའི་ཚུལ་དུ་རབ་བསྟབས
307b2 ན། །ལྷ་ཡང་རུང་སྟེ་བརླག་པར་འགྱུར། །འུག་པའི་མགོ་ཅན་ལ་སོགས་པའི། །ཕྲ་མེན་མ་རྣམས་སྦད་བྱས་ཏེ། །མིག་དང་རྣ་བ་སྣ་དང་ལྕེ། །དེ་ཡི་སེམས་འཕྲོགས་བསྒོམ་ཉམས་འགྱུར། །ཕྲ་མེན་རྣམས་ནི་སྦད་བྱས་ཏེ། །དེ་ཡི་སྒྲུབ་པའི་བར་གཅོད་ཅིང་། །གསང
307b3 སྟེ་འཁྲུལ་པར་བསྒོམ་བྱས་ན། །སྒྲུབ་པ་ཉམས་ཤིང་འབྱེ་བར་འགྱུར། །འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་ལས་ཀྱི་ལེའུ་སྟེ་བརྒྱད་པའོ།། །།ཧོམ་ཁུང་ཟུར་གསུམ་གདེངས་པ་ལ། །རྡོ་རྗེ་མདའ་གཞུ་ལྡན་བྱས་ཏེ། །ཐོད་པ་དག་གིས་རྣམ་པར
307b4 བརྒྱན། །སྤྱན་དྲངས་བསྲེགས་ན་ལྷ་ཡང་འཆི། །ཕྲ་མེན་མངགས་ཏེ་བཀུག་ནས་ནི། །ཐབ་ཀུན་བསྲེགས་ན་མོད་ལ་འཆི། །བསུར་དང་བསྲེས་པའི་ཤ་རྣམས་ཀྱིས། །ལྷ་རྣམས་ཐམས་ཅད་མཆོད་པར་བྱེད། །རྡོ་རྗེ་གླུ་ནི་བླངས་ནས་སུ། །འབྱུང་པོའི་ཤ་ནི་ཤིན་ཏུ་ཞིམ། །འབྱུང་པོའི
307b5 ཁྲག་ནི་ཤིན་ཏུ་ཞིམ། །འབྱུང་པོའི་རུས་པ་ཞིམ་པ་སྟེ། །གསོལ་ཏེ་ཐམས་ཅད་དགྱེས་པར་མཛོད། །འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོ་ཧོམ་གྱི་ལེའུ་སྟེ་བཅུ་དགུ་པའོ།། །།ལྕགས་སམ་ནག་པོའི་ཤིང་རྣམས་ལ། །མགོ་བོ་རྒྱ་མདུང་རྩེ་ཟུར་གསུམ། །ཁྲོ
307b6 བོ་ཁྲོ་མོ་རྣམས་བསྒོམས་ཏེ། །བཏབ་ན་ལྷ་ཡང་བརླག་པར་འགྱུར། །འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་ཕུར་པའི་ལེའུ་སྟེ་ཉི་ཤུ་པའོ།། །།ལྕགས་ཕྱེ་དུག་དང་རྡོ་ཕྱེ་དང་། །ཁྲག་ལས་སྤྲུས་ཏེ་བསྲེས་པ་དང་། །མུད་གའི་ཚན་དང་སྦྱོར་བ་དག་།སྦྱོར
307b7 བས་གཏོར་ན་དེ་བརླག་འགྱུར། །འཕགས་པ་ཐབས་ཀྱི་ཞགས་པ་པདྨོ་ཕྲེང་ལས་དྲག་པོའི་གཏོར་མའི་ལེའུ་སྟེ་ཉི་ཤུ་གཅིག་པའོ།། །།ཁྲོ་མོའི་དཀྱིལ་འཁོར་གཏུན་ཁུང་དུ། །ཁྲོ་བོའི་ཐོ་བས་བརྡུངས་པ་ཡི། །རྡོ་རྗེ་གཏུན་ཕྲུགས་བསྒོམ་བྱས་ན། །ལྷ་ཡང་རུང་སྟེ་བརྡུངས
iiif viewer powered by OpenSeadragon
