| e-texts navigator |
| Wylie |
27b1 རྒྱན་གྱི་རྣལ་འབྱོར་དང་། །བདེ་བ་ཆེ་དང་ཐིག་ལེར་རྫོགས། །གསུམ་ཉིད་དུ་ནི་རྫོགས་པ་ལ། །ཡུལ་དོན་ཡེ་ཤེས་དེ་སྦྱར་བ། །ཤེས་པར་བྱས་པས་ཐམས་ཅད་རྫོགས། །སྒྱུ་མའང་སྒྱུ་མ་ཡིན་སྤྱོད་ལ། །རྫོགས་པ་སྤྱིར་ཆིབ་ས་འདི་ནི། །བཅུ་ཡི་ཐ་མ་དང་པོ
27b2 ལས། །མཐར་རྫོགས་ཀུན་གྱི་ཐོག་ཡིན་ཏེ། །ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བདལ། །ཅིར་སྣང་ཅི་ཡང་མ་ཡིན་པ། །མི་སྐྱེ་མི་འགག་ངོ་བོ་ལ། །ཅི་ལྟར་བལྟས་དགུ་དེར་སྣང་བ། །ཐེག་མཆོག་སྤྱི་རྒྱའི་རླབས་ཀྱིས་བཅད། །དེ་ཡང་ལྟ
27b3 བའི་ཁྱད་པར་གྱིས། །བདག་ཉིད་ཆེན་པོའི་རྣལ་འབྱོར་དང་། །ལྷུན་གྱིས་གྲུབ་དང་ཀློང་ཡངས་ཆུབ། །གསུམ་རྫོགས་རང་བྱུང་བདལ་བའོ། །འདི་ནི་རྣལ་འབྱོར་སྤྱོད་པའི་ལམ། །རྣལ་འབྱོར་ཅན་གྱིས་བགྲོད་པར་བྱ། །གཞན་ཡང་འདུས་པའི་རྣལ་འབྱོར་རྣམས། །
27b4 དོན་གྱི་རྗེས་ནི་ཚོལ་འདོད་ན། །ཚིག་འགའ་ཐོས་པ་ཙམ་གྱིས་ནི། །ཆོག་པའི་འདུ་ཤེས་མ་སྐྱེད་ཅིག་།ཁྱེད་ཀུན་རྣལ་འབྱོར་ཡིན་མོད་ཀྱི། །ཡང་དག་དོན་ལ་རྣལ་མི་འབྱོར། །སྤྱོད་པ་འགྱུར་བར་བྱེད་མོད་ཀྱི། །ཡང་དག་དོན་དུ་ཡོང་མ་གྱུར། །ཆགས་སྡང་ལས་ལ
27b5 ཞེན་མོད་ཀྱི། །དམ་པའི་དོན་ལ་ཡོང་མ་ཞེན། །ལོངས་སྤྱོད་རྒྱ་ཆེར་བྱེད་མོད་ཀྱི། །ཆོས་ཉིད་དོན་གྱི་རོ་མ་ཚོར། །བདག་མེད་ཕྱོགས་བྲལ་ཟེར་མོད་ཀྱི། །ཉོན་མོངས་ལྔ་དང་ཡོང་མ་བྲལ། །བརྟུལ་ཞུགས་རྟོག་པ་ཆོམས་མོད་ཀྱང་། །གཟུང་འཛིན་རྟོག་པ་ཡོང་མ
27b6 ཆོམས། །དེ་བས་འདུས་པའི་རྣལ་འབྱོར་རྣམས། །ཐོས་པ་ཚིག་གི་སྒྲོན་མ་ཡིས། །ཡང་དག་དོན་གྱི་གསེར་བཙལ་ན། །རྟོགས་འདོད་སྤྲེའུ་འདི་བཟུང་ནས་ཀྱང་། །རྐུན་མོ་བྱི་ལ་བཏགས་བྱས་ཏེ། །གསེ་ཁུང་སྐར་ཁུང་ཀུན་དགག་ཅིང་། །ཁང་སྟོང་ཕང་ཕུང
27b7 བཤིག་ནས་ནི། །རྒྱལ་པོའི་དཀོར་མཛོད་ཁ་ཕྱེ་ན། །དེ་དག་རྟག་ཏུ་སངས་རྒྱས་ཡིན། །ཡང་དག་དོན་གྱི་ལམ་ཚོལ་ན། །རྟོག་པའི་སྐྱོན་ལྔ་སྤང་བར་བྱ། །རྟོག་པ་རགས་པའི་རི་བོ་དང་། །མཚན་མ་རྒྱུ་བ་ཚོར་བ་དང་། །བྱུང་ཚོར་སྐྱོན་ལྔ་བསལ་བར་བྱ། །
iiif viewer powered by OpenSeadragon
