| e-texts navigator |
| Wylie |
263b1 ཨ་ཨ་ཧ་ལའི་གད་རྒྱངས་ཆེ། །དབྱུག་པའི་འཐོར་རླུང་གཡེང་བ་ཆེ་ཧོ། །ཧཱུ~ཾ། ཁྲོས་པའི་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་དུ་གསལ། །འབར་བའི་ཡེ་ཤེས་ཀུན་དུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུ~ཾ། ཁྲོས་པའི་རྒྱལ་པོ་སྤྲིན་ཆེན་པོ། །ཁྲོས
263b2 པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོ། །ཧཱུ~ཾ། བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ
263b3 ཐིག་ལེ་ཆེ་ཧོ། །ཧཱུ~ཾ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་པ་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། །ཞེས་ཆེད་དུ་བླངས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པའི་ལེའུ་སྟེ་དྲུག་ཅུ་དྲུག་པའོ།། །།དེ་ནས་བཅོམ་ལྡན་འདས
263b4 དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་གསང་སྔགས་ཀྱི་རྒྱལ་པོ། །དེ་ནས་དེ་བཞིན་གཤེགས་པ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བདག་དང་རྡོ་རྗེ་སེམས་དཔར་དབྱེར་མེད་པར་ཡང་ཡང་དག་པའི་དབྱིངས་སུ་འདུས་ཤིང་བདག་གིས་རྡོ་རྗེ་སེམས་དཔའི་ཞལ
263b5 མངོན་སུམ་དུ་མཐོང་བའི་དོན་བསྟན་པའི་ཕྱིར་ཆེད་དུ་བརྗོད་པ་འདི་གསུངས་སོ། །ཀུན་རྫོབ་སྒྱུ་མར་ཞལ་མཐོང་བའི། །ཐམས་ཅད་མིག་ཡོར་སྒྱུ་མའི་ཚུལ། །སྣང་སྲིད་མ་ལུས་ཐམས་ཅད་ཀུན། །ཆུ་ཟླའི་ཚུལ་དུ་འདྲར་ཤེས་ཤིང་། །ཡུལ་དང་རྟོག་པ་གཉིས་མེད་པར། །གང
263b6 གིས་དེ་ལྟར་རིག་པ་དེ། །གཞི་རྩ་མེད་དབྱིངས་སྐད་ཅིག་མ། །སྔ་ཕྱི་མེད་དབྱིངས་དེ་བཞིན་ཉིད། །ཅིས་ཀྱང་མི་ཚུགས་རྡོ་རྗེ་ཡིན། །རྡོ་རྗེ་སེམས་དཔའ་དེ་ལ་གནས། །ལྷ་སྤྱོད་མཐུན་པས་ཞལ་མཐོང་ཡིན། །རང་བཞིན་དཀྱིལ་འཁོར་ཡང་དག་ནི། །ཆོས་དབྱིངས་བདག་དང་དབྱེར
263b7 མེད་པའི། །མཉམ་པར་སྦྱོར་ཞིང་དག་པའོ། །ཐམས་ཅད་བྱང་ཆུབ་ལྷུན་གྲུབ་པའི། །དེ་ལྟར་གང་གིས་རྟོགས་འགྱུར་བ། །དེ་ནི་ཡེ་ཤེས་གཉིས་ཅན་ཏེ། །དེ་ཡིས་ཡང་དག་སྙིང་པོ་མཐོང་། །དེ་ཉིད་ཅིས་ཀྱང་མི་ཚུགས་པ། །ཤིན་ཏུ་སྲ་ཞིང་བརྟན་པ་ཡིན། །རང་བཞིན
iiif viewer powered by OpenSeadragon
