| e-texts navigator |
| Wylie |
246b1 མཆོད་པ་བྱེད་པ་དང་། །སྒྲུབ་པ་ཐམས་ཅད་མྱུར་བར་འགྱུར། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐུབ་པ་ཆེན་པོ་བཅོམ་ལྡན་འདས་ཀྱིས་ཀླུའི་ཚོགས་ཀྱི་གདུག་པའི་ལས་འདུལ་བའི་ལེའུ་སྟེ་བཞི་བཅུ་ལྔ་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས
246b2 འབྱུང་པོའི་ཚོགས་ཟིལ་གྱིས་གནོན་པ་ཞེས་བྱ་བ་འདིའི་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲ་བའི་དཀྱིལ་འཁོར་ལས། །ཚོམ་བུ་གཉིས་ཀྱི་ལྷ་རྣམས་བསྒོམ། །ང་ཉིད་འདུག་པའི་གནས་བཤམས་ཏེ། །ལོ་དང་ཟླ་བ་གསུམ་དང་ལྔར། །རྡོ་རྗེ་དུང་ཆེན་གང་བ་དང་། །རྡོ་རྗེ
246b3 ཕྱག་བསྣམས་དྲིལ་བུ་ལ། །སྔགས་བཟླས་ཏིང་འཛིན་གོམས་པར་བསྙེན། །རྫས་ལ་ཚོན་གྱིས་མདོག་བསྒྱུར་བཞིན། །རྟགས་དང་མངོན་དུ་གྱུར་པར་རོ། །སངས་རྒྱས་རྡོ་རྗེ་ཕྱག་བསྣམས་ནས། །ཁྲོ་བོ་ཆེན་པོ་རྣམ་པར་རྒྱལ། །རང་གི་རང་བཞིན་དེར་བསྒྱུར་ནས། །སྤྱན་བགྲད
246b4 མཆེ་གཙིགས་སྡང་མིག་འབར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ན། །དེ་ཡི་སྙིང་པོ་བཟླས་ནས་ནི། །དེ་བསྙེན་ཉམས་སུ་ལོན་པ་ཡིན། །དེ་ལྟར་འགྲུབ་པའི་རྟགས་རྣམས་ནི། །གང་ལ་དམིགས་པའི་མདུན་དག་ཏུ། །བཞིན་བཟློག་མིག
246b5 གིས་བལྟས་ནས་ནི། །ལྕེ་ལ་དྲག་ཏུ་ཕཊ་ཅེས་བརྗོད། །བརྒྱལ་འགྱུར་ཨ~ཾ་ནས་དམར་རྩི་དབབ། །དེ་ལས་ཧཱུ~ཾ་ཞེས་བྱ་བ་ཡིད། །དང་པོའི་གནས་སུ་འདུས་པ་ན། །མཆོངས་པར་འདོད་ན་ལངས་པར་འགྱུར། །སྒྱུ་འཕྲུལ་དྲ་བའི་དཀྱིལ་འཁོར་ལས། །ཚོམ་བུ་གཉིས་ཀྱི་ལྷ་རྣམས
246b6 བསྒོམ། །ང་ཉིད་འདུག་པའི་གནས་བཤམས་ཏེ། །ལོ་དང་ཟླ་བ་གསུམ་ལྔ་བདུན། །དེ་ཡི་དུང་ཆེན་གང་བ་དང་། །རྡོ་རྗེ་ཕྱག་བསྣམས་དྲིལ་བུ་ལ། །སྔགས་བཟླས་ཏིང་འཛིན་གོམས་པར་བསྙེན། །རྫས་ལ་ཚོན་གྱིས་མདོག་བསྒྱུར་བཞིན། །རྟགས་དང་མངོན་དུ་གྱུར་པར་རོ། །
246b7 སངས་རྒྱས་རྡོ་རྗེ་ཕྱག་བསྣམས་ནས། །ཁྲོ་བོ་ཆེན་པོ་གཤིན་རྗེ་རྒྱལ། །གཤིན་རྗེ་ཁྲོས་པའི་རྒྱལ་མོར་སྦྱོར། །རང་གི་རང་བཞིན་དེར་བསྒྱུར་ནས། །སྤྱན་བགྲད་མཆེ་གཙིགས་སྡང་མིག་པར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ན། །དེ
iiif viewer powered by OpenSeadragon
