| e-texts navigator |
| Wylie |
18a1 ཕྱིར་ཡང་ལམ་འདི་ཡོངས་སུ་ཤེས་པར་བྱའོ། །དེ་བཞིན་དུ་འདོད་པ་ཆེན་པོ་ཞེས་ཀྱང་བྱའོ། །འཚོ་བ་ཆེན་པོ་ཞེས་བྱ་བ་དང་། ལོངས་སྤྱོད་ཆེན་པོ་ཞེས་བྱ་བ་དང་། ཡོ་བྱད་ཆེན་པོ་ཞེས་བྱ་བ་དང་། རྒྱུ་ཞེས་བྱ་བ་དང་། རྐྱེན་ཞེས་བྱ་བ་དང་། འབྲས་བུ
18a2 ཞེས་བྱ་བ་དང་། སྤྱོད་པ་ཞེས་བྱ་བ་དང་། ཆོ་འཕྲུལ་ཞེས་བྱ་བ་དང་། ཕྱག་རྒྱ་ཞེས་བྱ་བ་དང་། བསྙེན་པ་ཞེས་བྱ་བ་དང་། ཉེ་བའི་བསྙེན་པ་ཞེས་བྱ་བ་དང་། སྒྲུབ་པ་ཞེས་བྱ་བ་དང་། སྒྲུབ་པ་ཆེན་པོ་ཞེས་བྱ་བ་དང་། ཚོགས་ཆེན་པོ་ཞེས་བྱ་བ་དང་། ཀུན་དུ་རྫོགས་པ་ཞེས་བྱའོ། །
18a3 དེ་ཅིའི་ཕྱིར་ཞེ་ན། ཡུལ་ལ་འདོད་པ་སྣ་ཚོགས་པ་དང་། དམིགས་པས་འཚོ་བ་དང་། འཇོལ་ཉོག་ཏུ་སྤྱོད་པ་དང་། དགོས་པ་སྒྲུབ་པ་དང་། འབྲས་བུར་བྱེད་པ་དང་། ཀུན་དུ་ལོག་པ་དང་། དོན་གྲུབ་པ་དང་། སྨིན་པར་བསགས་པ་དང་། རང་བཞིན་དུ་གྱུར་པ་དང་། བྱ
18a4 བ་བྱེད་པ་དང་། སྣ་ཚོགས་སུ་འབྱུང་བ་དང་། མཚན་མར་བསྟན་པ་དང་། རྣམ་པར་འདུད་པ་དང་། ཤིན་ཏུ་མཛད་པ་དང་། འདོད་པ་བྱེད་པ་དང་། ལྷག་པར་འདོད་པ་དང་། ཀུན་དུ་འབྱོར་པ་དང་། ལྷུན་གྱིས་གྲུབ་པའི་ཕྱིར་ཡོངས་སུ་ཤེས་པར་བྱའོ། །གཞན་ཡང
18a5 འདུས་པ་ཆེན་པོའི་ཚོགས་འདི་ལ་ནི་ཐམས་ཅད་ཡོད་དེ། ཆོས་ཐམས་ཅད་ནི་རྣལ་འབྱོར་རྣམ་པ་གསུམ་དུ་འདུས་པར་ཤེས་པར་བྱའོ། །གསུམ་གང་ཞེ་ན། རྒྱུའི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་རྣམ་པ་གསུམ་ཡང་འདི་ཉིད་ཡིན་ཞིང་འདི
18a6 ལས་འབྱུང་བར་ཤེས་པར་བྱ་སྟེ། དེ་ཡང་ཇི་ལྟར་ཞེ་ན། རྒྱུ་ནི་འཁྲུལ་པ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །དེ་བཞིན་དུ་མཚན་མ་གཉིས་དང་། རྟོག་པ་གསུམ་དང་། ལོག་པ་བཞི་དང་། ཉོན་མོངས་པ་ལྔ་དང་། ཕུང་པོ་ལྔ་དང་། དབང
18a7 པོ་ལྔ་དང་། རྒྱུ་དྲུག་དང་། རྐྱེན་བཅུ་གཉིས་དང་། སྐྱེ་བ་བཅུ་གཉིས་དང་། རང་བཞིན་བརྒྱད་དང་། སྤྱོད་པ་བཅུ་གཅིག་དང་། སྨིན་པ་བཞི་དང་། ལམ་ལྔ་དང་། གནས་དྲུག་དང་། མུ་གསུམ་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །
iiif viewer powered by OpenSeadragon
