| e-texts navigator |
| Wylie |
16a1 ཀུན་གྱིས་རྟོགས་པར་བྱ་བའི་ཕྱིར། །ཚིག་ཏུ་མཚོན་ཏེ་བཤད་མོད་ཀྱང་། །དམིགས་མེད་ཚིག་གི་ཡུལ་བྲལ་བ། །དེ་ཡི་རང་བཞིན་དེ་ཡིན་ན། །རང་བཞིན་གཞི་ལས་མཚན་མར་གཡོས། །དེ་ལ་མིང་མེད་མིང་བཏགས་རྒྱུས། །ཡིན་དང་མ
16a2 ཡིན་ཐེ་ཚོམ་སྐྱེས། །དེ་ལས་རྩོད་པའི་གཞིར་གྱུར་ཏེ། །དེ་བསལ་དོན་ཕྱིར་མཚན་མ་ཡི། །ཚིག་གི་ཚོགས་ཀྱི་རྣམ་གྲངས་ལས། །སྒོ་མོ་དཔག་ཏུ་མེད་པར་བཤད། །དེ་ཡིས་ངེས་དོན་རྗེས་བཅད་པ། །ཐུགས་ཀྱི་ཀློང་ནས་བཏོན་པ་ཡི། །ཚིག་གི་སྒྲོན་མས
16a3 དོན་བཙལ་བ། །ལམ་ཉིད་ཇི་ལྟར་ཡིན་ཞེ་ན། །དྲན་བྱུང་རྗེས་སུ་འབྲེངས་ན་ནི། །འཁོར་བའི་གནས་སུ་འཁོར་བར་འགྱུར། །དྲན་འབྱུང་གཡོ་བ་ཅི་བཀག་པ། །དེ་དག་འགོག་པ་ཉིད་དུ་འགྱུར། །དྲན་བྱུང་མེད་པར་བླུན་པ་ནི། །མུ་སྟེགས་ཅན་ལམ་མུན་པར་འགྱུར། །
16a4 འདི་ཞེས་སེམས་སུ་གཅིག་བཟུང་ན། །མཚན་མ་རྟོག་པའི་རི་བོ་ཡིན། །སྔ་ཕྱི་མེད་ཅེས་ཕྱང་བཅད་ན། །མེད་དེ་ཆད་པའི་མུ་ཅན་ཡིན། །གཞི་ཡི་དོན་ལས་ཡུད་ཙམ་ཞིག་།ཅིར་གཡོས་སྐྱེ་འགག་བྱུང་བ་དེ། །རྣམ་གྲངས་ལམ་དེ་འཕེལ་འགྱུར་གྱི། །ལམ
16a5 གྱི་ཆོས་ཉིད་ག་ལ་འགྱུར། །དཔེར་ན་འགྲོ་གང་བྱིས་པ་དག་།གྲིབ་མ་སྤངས་ནས་རྣམ་དག་ཚོལ། །རང་ལས་བྱུང་བའི་རང་བཞིན་གྱིས། །བཙལ་ན་གྲིབ་མེད་དག་མི་རྙེད། །དོན་ཉིད་ཡེ་ནས་གནས་བཞིན་དུ། །སེམས་ཉིད་སྡུག་བསྔལ་སྣ་ཚོགས་ཀྱིས། །ཤ་ཐང་བར་ནི
16a6 དོན་ཚོལ་བ། །དོན་མེད་བདུད་ཀྱི་ལས་ཡིན་ནོ། །དོན་ལ་ཚིག་ཏུ་བརྗོད་པ་ནི། །ནམ་མཁའ་དག་ལ་རྩོད་པ་འདྲ། །ཚིག་ཏུ་སྨན་དང་དཔྱད་བཤད་ཀྱང་། །ནད་པའི་ཚོགས་ལ་མི་ཕན་ནོ། །སེམས་ཉིད་དོན་དུ་མ་ཤེས་ན། །ཚིག་ཏུ་དོན་བརྗོད་དོན་མི་རྟོགས། །
16a7 འཁོར་བ་སྤངས་ནས་འདས་ཚོལ་བ། །གཟུགས་བཏང་ནས་ནི་གྲིབ་ཚོལ་འདྲ། །ལམ་ཉིད་ཇི་ལྟར་ཡིན་ཞེ་ན། །མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པ་ལམ་དུ་གཅིག་།སེམས་འདི་སྣ་ཚོགས་པར་སྣང་བས། །སྣ་ཚོགས་སེམས་སུ་གཅིག་པ་ཡིན། །
iiif viewer powered by OpenSeadragon
