| e-texts navigator |
| Wylie |
314a1 གི་མཐུ་ཅི་ཡོད་པ་སྟོན་ཅིང་རྡོ་རྗེའི་སྐད་དང་གད་མོ་དྲག་པོ་འབྱིན་ཅིང་རང་རང་གི་འཁོར་རྣམས་ལ་མ་སྐྲག་མ་དངངས་ཤིག་། བདག་ཅག་གི་མཐུ་འདི་ལྟ་བུ་གཞན་གང་གིས་ཀྱང་ཟིལ་གྱིས་གནོན་པར་མི་ནུས་སོ་ཞེས་སྤྲོ་བསྲིང་ངོ་། །དེ་ནས་བཅོམ
314a2 ལྡན་འདས་ཡེ་ཤེས་རྔམ་པའི་རྒྱལ་པོ་དེས་དེ་བཞིན་ཉིད་ཀྱི་དབྱིངས་ནས་ཡུམ་རྔམ་པའི་ཀྲོ་དྷིའི་རྒྱལ་མོ་མངོན་པར་ཕྱུང་སྟེ། ཧི་ཧི་དགྱེས་པའི་གཟི་མདངས་ཀྱི་རོལ་པའི་དགྱེས་པས་ཐིམ་པར་མཛད་ནས། བྱང་ཆུབ་སེམས་ཀྱི་སྤྲིན་ལས་ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ
314a3 ཧ་ལ་ཧ་ལ་ཞེས་པས་སྟོང་གསུམ་ཁྲོ་བོ་ཆོལ་པས་གང་བར་གྱུར་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཉིད་ནི་དབུ་དགུ་ཕྱག་བརྒྱད་ཞབས་རྣམ་པ་བརྒྱད་ཀྱི་རྣམ་པར་སྣང་ངོ་། །དེ་ནས་དགྱེས་ཏེ་ཧཱུ~ཾ་ཧཱུ~ཾ་ཧཱུ~ཾ་ཞེས་བརྗོད་པས་དབུ་དགུ་ཕྱག་བརྒྱད་ལས་འདུལ
314a4 བའི་དབང་གིས་དབུ་གསུམ་ཕྱག་དྲུག་ཞབས་བཞིར་གྱུར་ཏེ། ཁྲག་གི་རྒྱ་མཚོ་འཁྲུག་པའི་དཀྱིལ་ན་ཀེང་རུས་ཀྱི་སྟེང་ན་རྣམ་པར་གནས་སོ། །ཁྲོ་བོ་ཆོལ་པ་དེ་དག་གིས་ཀྱང་ཕྱོགས་བཅུའི་དྲེགས་པ་ཇི་སྙེད་པ་ཀུན་བསྒྲལ་ཏེ་སླར་འདུས་ནས། ལ་ལ་ནི་རྡོ་རྗེ་ཁྲག
314a5 འཐུང་ཆེན་པོར་གྱུར་ནས་བརྒྱ་བྱིན་འཁོར་དང་བཅས་པ་བསྒྲལ། ལ་ལ་ནི་རིན་ཆེན་ཁྲག་འཐུང་དུ་གྱུར་ཏེ་ཚངས་པ་འཁོར་དང་བཅས་པ་བསྒྲལ། ལ་ལ་ནི་པདྨ་ཁྲག་འཐུང་ཆེན་པོར་གྱུར་ཏེ། མ་ཧཱ་དེ་བ་འཁོར་དང་བཅས་པ་བསྒྲལ། ལ་ལ་ནི་ལས་ཀྱི་ཁྲག་འཐུང་ཆེན
314a6 པོར་གྱུར་ཏེ། ཁྱབ་འཇུག་འཁོར་དང་བཅས་པ་བསྒྲལ། ཁྲོ་བོ་དེ་དག་གིས་དྲེགས་པ་ཅན་དེ་དག་གི་ནང་གྲོལ་ཀུན་དྲངས། ཁྲག་འཐུངས། རུས་པ་ཀུན་འཆོས་སོ། །དེ་ནས་དགྱེས་ཏེ་ཨོ~ཾ་རུ་ལུ་རུ་ལུ་ཛ་ཛ་ཞེས་བརྗོད་པས། དབང་ཕྱུག་ཆེན་པོ་བཅུ་གཉིས་དང་བརྒྱད
314a7 ཀྱི་འཁོར་ཚོགས་མ་ལུས་པ་ཡུད་ཙམ་ཅིག་གིས་དབང་དུ་འདུས་པར་གྱུར་པ་ནི་དཔེར་ན་རྡོ་ཁབ་ལེན་ལ་ལྕགས་འདུ་བའི་ཚུལ་ལོ། །བཅོམ་ལྡན་འདས་དཔལ་ཆེན་པོའི་སྐུ་ལ་རྣམ་པ་བརྒྱད་ཀྱིས་འཁྲིལ་བའི་ཚུལ་དུ་གནས་སོ། །ཁྲག་འཐུང་བཞི་ལ་རྣམ་པ་ལྔ་ལྔས
iiif viewer powered by OpenSeadragon
