| e-texts navigator |
| Wylie |
136a1 ཕྱག་མི་བྱ། །སྐྱེས་བུ་བསམ་ཡས་རྨད་བྱུང་རྫུ་འཕྲུལ་ཅན། །དེ་ལ་མི་ངན་གང་ཞིག་མི་འདུད་པ། །དེ་ལ་རྒྱལ་བ་ཐམས་ཅད་ཐུགས་ནུར་ནས། །དེ་ཡི་གསང་སྔགས་དངོས་གྲུབ་མི་སྩོལ་ལོ། །དཔེར་ན་ཤིང་གི་མེ་ཏོག་དང་པོར་ནི། །ཡིད་འོང་ཕྱི་ནས་འབྲས
136a2 བུར་གྱུར་པ་ལྟར། །སེམས་ཅན་མཆོག་རྣམས་མེ་ཏོག་འདྲ་བར་ལྟོས། །འབྲས་བུ་བཞིན་དུ་རྒྱལ་བ་རིག་པར་གྱིས། །གང་ཞིག་རང་བཞིན་ཆགས་དང་རྣམ་བྲལ་ཡང་། །བརྩེ་ལ་སྙིང་རྗེ་ཁྲོ་ལ་ཁྲོ་བ་དང་། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་ཚུལ་གནས
136a3 དེ་ལ་ཕྱག་འཚལ་ལོ། །གང་ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཅི་ལྟར་མཐུན་པ་ཡི། །གསང་སྔགས་གཟུགས་ཀྱི་རྗེས་སུ་འཇུག་མཛད་པ། །སྔགས་ཀྱི་རྣམ་འདྲེན་དེ་ལ་ཕྱག་འཚལ་ལོ། །འཕགས་པ་དབུང་བཟང་གིས་ཞུས་པའི་ལེའུ་དགུ་པའོ།། །།
136a4 ལྷ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་སྣ་ཚོགས་དང་། །འབུམ་ཕྲག་ལྔ་དང་བྱེ་བ་ཕྲག་གསུམ་དག་།རིག་འཛིན་སྡེ་སྣོད་བཤད་པར་རྒྱལ་བས་གསུངས། །ངས་ནི་གསང་བ་པ་རྣམས་གཞོམ་པ་དང་། །དབུལ་བའི་སྡུག་བསྔལ་བསལ་བར་བྱ
136a5 བའི་ཕྱིར། །དཀྱིལ་འཁོར་བཅས་ཤིང་ཕྱག་རྒྱར་ལྡན་པ་ཡི། །གསང་སྔགས་བྱེ་བ་ཕྲག་བདུན་རབ་ཏུ་བཤད། །ཕོ་ཉ་བཅུ་དང་རིག་པའི་རྒྱལ་པོ་བདུན། །དེ་བཞིན་ཕྱག་བརྙན་དྲུག་ཅུ་རྩ་བཞི་དང་། །ང་ཡི་སྙིང་པོ་དམ་པ་བརྒྱད་རྣམས་དང་། །ཁྲོ་བོ་དྲག་པོ་བདུད་རྩི་ཐབ་སྦྱོར་དང་། །རིག
136a6 པ་མཆོག་ལ་སོགས་པ་མཐུ་བོ་ཆེ། །རིག་པའི་བདག་པོ་གསང་སྔགས་རྗེས་འབྲང་བཅས། །དེ་སྙེད་རྡོ་རྗེའི་རིགས་ནི་གང་ཡིན་པ། །དེར་ནི་འདི་དག་ང་ཡིས་རྒྱ་ཆེར་བཤད། །སྤྱན་རས་གཟིགས་ཀྱིས་གསང་སྔགས་བྱེ་བ་ཕྲག་།གསུམ་དང་དེ་བཞིན་འབུམ་ཕྲག་ལྔ་རྣམས་བཤད། །དེ
136a7 ཡི་རིག་སྔགས་བདག་པོ་རྟ་མགྲིན་དང་། །དེ་ཡི་མིང་ཅན་དཀྱིལ་འཁོར་དམ་པ་གསུངས། །བཅུ་གཉིས་ཕྱག་དང་ཕྱག་དྲུག་པ་དང་ནི། །ཐོར་ཚུགས་ཅོད་པན་འདོད་པ་འབྱོར་བྱེད་དང་། །ཞལ་བཞི་དོན་ཡོད་ཞགས་པར་བདུན་བསྟན་འདི། །ས་སྟེང་གསང་སྔགས་ཉི་མ་བདུན་ལྟར་འབར། །
iiif viewer powered by OpenSeadragon
