| e-texts navigator |
| Wylie |
237b1 འོད་ལ་ཕྱག་འཚལ་ལོ། །གསེར་དང་། ནོར་བུ་དང་། མུ་ཏིག་དང་། བྱི་རུ་དང་། རྡོ་རྗེ་མཛེས་པ་སྣ་ཚོགས་ཅན་ལ་ཕྱག་འཚལ་ལོ། །ལྷ་ཐམས་ཅད་ཀྱིས་ཕྱག་བྱས་ཤིང་བསྟོད་པ་ཁྱོད་ལ་ཕྱག་འཚལ་ལོ། །དྲི་ཟ་ཐམས་ཅད་ཀྱིས་མཆོད་པ་ཁྱོད་ལ་ཕྱག་འཚལ་ལོ། །ཀླུའི་དབང་པོ་ཐམས
237b2 ཅད་ཀྱིས་བརྗོད་པ་ཁྱོད་ལ་ཕྱག་འཚལ་ལོ། །གནོད་སྦྱིན་ཐམས་ཅད་ཀྱིས་ཕྱག་བྱས་པ་ཁྱོད་ལ་ཕྱག་འཚལ་ལོ། །འབྱུང་པོས་བརྗོད་པ་ཁྱོད་ལ་ཕྱག་འཚལ་ལོ། །འཇིག་རྟེན་སྐྱོང་གིས་བརྗོད་པ་ཁྱོད་ལ་ཕྱག་འཚལ་ལོ། །རིག་སྔགས་ཐམས་ཅད་ཀྱིས་ཕྱག་བྱས་པ་ཁྱོད་ལ་ཕྱག་འཚལ་ལོ། །
237b3 དབང་པོ་དང་གཤིན་རྗེ་དང་ཆུ་ལྷ་དང་། ཀུ་བེ་ར་དང་། ཕུར་བུ་དང་། དྲང་སྲོང་བདུན་གྱིས་ཕྱག་བྱས་པ་ལ་ཕྱག་འཚལ་ལོ། །དཀར་མོས་ཕྱག་བྱས་པ་ལ་ཕྱག་འཚལ་ལོ། །དྲི་ལེན་གྱིས་ཕྱག་བྱས་པ་ལ་ཕྱག་འཚལ་ལོ། །ནག་མོས་ཕྱག་བྱས་པ་ལ་ཕྱག་འཚལ་ལོ། །མ་ཏང་གིས
237b4 ཕྱག་བྱས་པ་ལ་ཕྱག་འཚལ་ལོ། །ཚངས་པས་ཕྱག་བྱས་པ་ལ་ཕྱག་འཚལ་ལོ། །དབང་པོས་ཕྱག་བྱས་པ་ལ་ཕྱག་འཚལ་ལོ། །ཁྱབ་འཇུག་གིས་ཕྱག་བྱས་པ་ལ་ཕྱག་འཚལ་ལོ། །གཞོན་ནུས་ཕྱག་བྱས་པ་ལ་ཕྱག་འཚལ་ལོ། །ཉི་མ་དང་ཟླ་བས་ཕྱག་བྱས་པ་ལ་ཕྱག་འཚལ
237b5 ལོ། །བྲམ་ཟེས་ཕྱག་བྱས་པ་ལ་ཕྱག་འཚལ་ལོ། །སྔོན་གྱི་དྲང་སྲོང་གིས་མཆོད་པ་ལ་ཕྱག་འཚལ་ལོ། །རླུང་ལྷས་ཕྱག་བྱས་པ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ལག་ན་རྡོ་རྗེ་ཕོ་ཉ་མའི་ཚོགས་ཀྱི་འཁོར་དང་བཅས་པར་མི་སྣང་བར་གྱུར་ཏོ། །བཅོམ་ལྡན་འདས་ཀྱིས
237b6 དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ཕུར་བུ་གསུམ་པ་ལ་སོགས་པ་དང་། འཇིག་རྟེན་སྐྱོང་བ་བཞི་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས
237b7 པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་རིག་པ་མཆོག་གི་རྒྱུད་ཆེན་པོ་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་བའོ།། །།
iiif viewer powered by OpenSeadragon
