| e-texts navigator |
| Wylie |
229b1 རྒྱས་པ་ཆེན་པོ་ལས་ཕོ་ཉ་མ་དྲུག་ཅུ་རྩ་བཞི་རྫོགས་སོ། ། །།དེ་ནས་ཕོ་ཉ་མོ་བཅུའི་ཆོ་ག་རྒྱས་པར་བཤད་པར་བྱ་སྟེ། རས་མ་ཉམས་པ་ལ་ཚོན་རྩི་སྦྱིན་མེད་པས། བཅོམ་ལྡན་འདས་ཀྱི་སྐུ་གཟུགས་ཆོས་འཆད་པའི་ཚུལ་དུ་བཞུགས་པར་བྲིའོ། །གཡོན
229b2 ལོགས་སུ་གནོད་སྦྱིན་ལག་ན་རྡོ་རྗེ་བྲི་བར་བྱ་སྟེ། དེ་ཡང་འཁོར་དང་བཅས་པར་བྱའོ། །དེའི་མདུན་དུ་རྡོ་རྗེའི་གཟུགས་བྲིའོ། །གཡས་ལོགས་སུ་ནི་ཕོ་ཉ་མོ་བཅུ་འཁོར་དང་བཅས་པར་བྲི་སྟེ་རྒྱན་ཐམས་ཅད་ཀྱིས་བརྒྱན་ལ་ཐམས་ཅད་ཀྱི་མགོ་བོར་རྡོ་རྗེའི་མཚན་མ་ཡོད་པར་བྲིས
229b3 ནས། སྐུ་གདུང་དང་ལྡན་པའི་མཆོད་རྟེན་གྱི་དྲུང་དུའམ་ཡང་ན་ཆེད་དུ་སྐུ་གདུང་བཞག་སྟེ་སྐུ་གཟུགས་ཁ་ནུབ་ཕྱོགས་སུ་བསྟན་ལ་སྐུ་གཟུགས་ཀྱི་མདུན་དུ་གསེར་དང་དངུལ་དང་ཟངས་རྣམ་གསུམ་ལས་བྱས་པའི་རྡོ་རྗེ་རས་སར་པ་མཉམས་པའི་སྟེང་དུ་བཞག་སྟེ་སྟེང་གཡོགས
229b4 པར་བྱའོ། །དེའི་ངོས་གཅིག་ཏུ་ཐབ་ཁུང་རྡོ་རྗེའི་དབྱིབས་འདྲ་བར་བྱའོ། །དེ་ནས་ཉེ་བར་འགྲོ་བའི་གཞོན་ནུ་ཟླ་བ་ཕྱེད་གསུམ་ལ་བསྒྲུབ་པར་བྱ་སྟེ། གསོ་སྦྱོང་གི་ཡན་ལག་བརྒྱད་དང་ལྡན་ཞིང་ཟས་སུ་འོ་མ་དང་ཕྱེའི་འདག་གུ་ཟ་བ་དང་། དུས་གསུམ་དུ་ཁྲུས་བྱེད
229b5 ཅིང་དུས་གསུམ་དུ་གོས་བརྗེ་བ་དང་། རྩཝ་དཱུར་བའི་སྟན་ལ་ཉལ་བར་བྱའོ། །རྟག་ཏུ་དུས་གསུམ་དུ་བདུག་པ་དང་། དྲི་དང་། མེ་ཏོག་དབུལ་ཞིང་རིག་སྔགས་བཟླས་བརྗོད་བྱའོ། །སྦྱིན་སྲེག་ཀྱང་ཐམས་ཅད་ཀྱིས་བྱ་སྟེ། སེང་ལྡེང་གི་ཡམ་སྲེག་ཤིང་དང
229b6 ཡུངས་ཀར་དང་། སྦྲང་རྩི་མར་དང་སྦྱར་བའི་སྦྱིན་སྲེག་བྱའོ། །ལྷ་བཤོས་ཀྱང་རྟག་པར་དབུལ་བར་བྱའོ། །མར་གྱི་མར་མེ་ཅི་འབྱོར་པ་ཡང་མཚན་རངས་པར་སྦྱར་རོ། །བཅོམ་ལྡན་འདས་ལ་རྟག་ཏུ་མཆོད་པར་བྱའོ། །ཟླ་བ་ཕྱེད་ཕྱེད་ཀྱི་མཚམས་སུ་ཡང་ཞག
229b7 གསུམ་སྨྱུང་བར་བྱའོ། །དེ་ལྟར་སྦྱར་ན་འགྲུབ་པར་འགྱུར་ཏེ། དོན་ཐམས་ཅད་བྱེད་དོ། །དེའི་ལས་རྣམས་འབྱུང་སྟེ། སྐྱེས་པ་དང་བུད་མེད་དབང་དུ་བྱ་བ་ལ་བ་རུ་རའི་ཤིང་ངམ་མར་དང་སྦྲང་རྩི་དང་ཡུངས་ཀར་རྣམས་ཀྱིས་ཞག་བདུན་གྱི་བར་དུ་སྦྱིན་སྲེག་བྱའོ། །
iiif viewer powered by OpenSeadragon
