| e-texts navigator |
| Wylie |
186b1 ཀྱིས་བདུག་ཅིང་གདུགས་མཚན་གཅིག་ཏུ་སྨྱུང་བ་བགྱིས་ལ། དེ་ནས་ཚེས་བརྒྱད་ནས་ཚེས་ལྔའི་བར་དུ་དེ་བཞིན་གཤེགས་པའི་སྐུ་གཟུགས་བཞུགས་པའི་གནས་གཙང་མར་ཙནྡན་དཀར་པོའི་དཀྱིལ་འཁོར་བགྱིས་ལ། བུམ་པ་གང་བ་བཞི་ཡང་གཞག་པར་བགྱི། ཕྱོགས་བཞིར
186b2 ཡང་རོ་དང་ལྡན་པ་དང་། དྲི་དང་ལྡན་པ་དང་། སྐྱེམས་དང་། འོ་ཐུག་གི་གཏོར་མ་དག་སྩལ་ལ་རད་པ་དཀར་པོ་བགོས་ཏེ། སེམས་རྩེ་གཅིག་ཏུ་བགྱིས་ནས། དུས་གསུམ་དུ་བདུག་སྤོས་དང་། མེ་ཏོག་དང་། སྤོས་དང་མར་མེ་དག་གིས་མཆོད་པ་ཆེན་པོ་བགྱི་ཞིང་། དེ་བཞིན་གཤེགས་པ་ཡང་མཆོད་པ
186b3 བགྱིས་ཏེ། དེ་བཞིན་གཤེགས་པ་ལ་ཕྱག་བགྱིས་ནས་སྣ་མའི་མེ་ཏོག་བརྒྱ་རྩ་བརྒྱད་ལ་བཟླས་བརྗོད་བརྒྱ་རྩ་བརྒྱད་བཟླས་ཤིང་། རེ་རེ་ནས་ལག་ན་རྡོ་རྗེ་ལ་བསྣུན་པར་བགྱིའོ། །དེས་ན་སྒྲ་སྐད་ཆེན་པོ་འབྱུང་བར་འགྱུར་ཞིང་། དོག་ས་གཡོ་བ་དང་། འོད་ཟེར་དག་ཀྱང་འབྱུང
186b4 བར་འགྱུར་ཏེ། དེ་ནས་དམ་པ་ཅི་འཚལ་བ་ཡང་སྩལ་བར་བགྱིའོ། །བཟླས་བརྗོད་བགྱིས་པ་ཙམ་གྱིས་ལས་ཐམས་ཅད་དང་དགོས་པ་ཐམས་ཅད་ཀྱང་ཡང་དག་པར་འགྲུབ་པར་འགྱུར་ལགས་སོ། །བྲོ་ནད་མ་མཆིས་པ་དང་། ཚེ་རིང་བ་དང་། སྡིག་པ་ཐམས་ཅད་དང་བྲལ་བར་འགྱུར
186b5 ཞིང་ཡོན་ཏན་སྟོང་ཡང་འཐོབ་པར་འགྱུར་ལགས་སོ། །འགུམ་པའི་ཚེ་ན་ཡང་སངས་རྒྱས་བཅོམ་ལྡན་འདས་སྟོང་མཐོང་བར་འགྱུར་ལགས་སོ། །བདག་མཐོང་བར་ཡང་སྩལ་བར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན
186b6 རྡོ་རྗེ་ལེགས་སོ་ལེགས་སོ། །ཕྱག་རྒྱ་འདི་ནི་ལྷ་དང་བཅས་པའི་འཇིག་རྟེན་གྱིས་འདའ་བར་བྱ་བ་མ་ཡིན་ཏེ། འདི་ལ་སོམ་ཉི་མེད་པ་དང་། ཡིད་གཉིས་མེད་པ་དང་། ཐེ་ཙོམ་མེད་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ
186b7 ཏོ། །བཅོམ་ལྡན་འདས་ཅིའི་སླད་དུ་ཏིང་ངེ་འཛིན་འདི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་བྱིན
iiif viewer powered by OpenSeadragon
