| e-texts navigator |
| Wylie |
183a1 གསོལ་བ་བཏབ་པར་ཐུགས་སུ་ཆུད་ནས་ཕྱོགས་བཅུར་རྣམ་པར་གཟིགས་ཏེ། སྙན་ཅིང་འཇེབས་ལ་ཡིད་དུ་འོང་བའི་གསུང་དབྱངས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས
183a2 ཀྱི་བུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བའི་ཏིང་ངེ་འཛིན་ཡོད་དེ། ངས་སྔོན་དང་པོ་སེམས་བསྐྱེད་པ་ནས་བཟུང་སྟེ། དེ་བཞིན་གཤེགས་པ་མེ་ཏོག་སྣང་བ་ཀུན་ཏུ་སྟོན་པ་ཞེས་བྱ་བའི་སྤྱན་སྔར་དེ
183a3 ཐོས་སོ། །རིགས་ཀྱི་བུ་ཏིང་ངེ་འཛིན་དེའི་མིང་ཐོས་མ་ཐག་ཏུ་སེམས་ཅན་བྱེ་བ་ཕྲག་དགུ་བཅུས་དེ་བཞིན་གཤེགས་པའི་ཡེ་ཤེས་ཐོབ་པར་གྱུར་ནས། ཐམས་ཅད་ཀྱང་དེ་བཞིན་གཤེགས་པས་སངས་རྒྱས་ཀྱི་ཞིང་ཐ་དད་པ་དག་ཏུ་ལུང་བསྟན་ཏེ། ངས་ཀྱང་ལུང་བསྟན་པ་ཐོབ་བོ། །
183a4 རིགས་ཀྱི་བུ་ངས་དེ་བཞིན་གཤེགས་པའི་ལྷའི་མཁྱེན་པས་སྔོན་དེ་བཞིན་གཤེགས་པ་སུམ་ཁྲིས་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་རྣམ་གྲངས་འདི་བཤད་དེ། ཐམས་ཅད་དུ་ཡང་དེ་བཞིན་གཤེགས་པ་ལ་གསོལ་བ་འདེབས་པ་ནི་འཕགས་པ་སྤྱན་རས་གཟིགས་དབང་ཕྱུག་ཁྱོད
183a5 ཉིད་དང་། འཇམ་དཔལ་གཞོན་ནུར་གྱུར་པ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྣམས་དང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མའི་འཁོར་ཇི་ལྟར་ལྷགས་པ་འདི་དག་གིས་ཀྱང་ཐོས་ནས་རི་མོ་དང་མཆོད་པ་དག་བྱས་ཏེ། དེའི
183a6 འོག་ཏུ་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ལུང་བསྟན་པ་ཐོབ་ཅིང་བྱང་ཆུབ་སེམས་དཔའི་ཏིང་ངེ་འཛིན་དག་ཀྱང་ཐོབ་པར་གྱུར་ནས། འདོད་པ་ཐམས་ཅད་དུ་འགྲོ་བ་དང་། རེ་བ་ཐམས་ཅད་གྲུབ་པ་དང་། ནད་རྣམས་དང་བྲལ་བར་ཡང་གྱུར་ལ། དགེ་བའི་རྩ་བ
183a7 རྣམས་ཡོངས་སུ་སྨིན་པ་དང་། སྒྲིབ་པ་ཐམས་ཅད་སྤངས་པ་དང་། གཟུགས་བཟང་ཞིང་མཛེས་པ་བལྟ་ན་སྡུག་པ་དང་། ནོར་དང་། འབྲུ་དང་། མཛོད་དང་། བང་བ་རྣམས་འབྱོར་བ་དང་། རྒྱལ་པོ་དང་། རྒྱལ་བུ་དང་། བློན་པོ་རྣམས་ཀྱིས་མངོན་པར་བསྟོད་པར
iiif viewer powered by OpenSeadragon
