| e-texts navigator |
| Wylie |
209b1 ཤེས་སྣང་བ་གྲགས་པས་བརྒྱན། །དཔེར་ན་རིན་ཐང་མེད་པའི་ནོར་བུ་འདྲ། །དེང་བདག་པདྨོ་ཁྱོད་ལ་བསྔགས་པས་ཀྱང་། །སེམས་ལ་བསམ་པ་ཐམས་ཅད་འགྲུབ་པར་འགྱུར། །ཡང་དག་ཡེ་ཤེས་གྱ་ནོམ་བཀྲ་ཤིས་པ། །པདྨ་ལྟ་བུར་ཤིན་ཏུ་རྣམ་པར་དག་།
209b2 ལུས་མདོག་རབ་མཛེས་ཀུན་གྱིས་ལྟ་བར་མོས། །མཚན་མ་ཡོན་ཏན་རྣམ་པ་སྣ་ཚོགས་བརྒྱན། །དྲི་མེད་ཡེ་ཤེས་ཀུན་ཏུ་རབ་མཛེས་པ། །དྲན་པ་རྣམས་ཀྱི་ནང་ན་མཆོག་ཏུ་གྱུར། །ཅི་ལྟར་སེང་གེ་གཅན་གཟན་མཆོག་གྱུར་བཞིན། །བསྔགས་བསྟོད་ཚིག་ནི་འདི
209b3 ལས་འབྱུང་བ་ཡིས། །བསམ་པའི་དངོས་པོ་ཐམས་ཅད་གྲུབ་པར་ཤོག་།ཅེས་བསྟོད་དོ། །དེ་ནས་དཔལ་ཕྱག་ན་རྡོ་རྗེས་འདུས་པ་རྣམས་ལ་བཀའ་སྩལ་པ། ཁྱེད་ཀྱིས་དཔལ་ལྷ་མོ་ལ་བསྟོད་པ་ལེགས་སོ། །ང་ཡང་བསྟོད་པ་འདི་དག་གི་དོན་སྒོམས་ཤིག་།
209b4 ཡིད་ལ་རྟག་ཏུ་ཟློས་ཅིག་།ལྷ་མོ་འདི་ལ་བསྟོད་པ་ནི་ང་ལ་བསྟོད་པ་ཡིན་ནོ། །སངས་རྒྱས་ཐམས་ཅད་ལ་བསྟོད་པ་ཡིན་ནོ། །ལྷ་མོ་དེས་ཀྱང་མི་འདི་སྲུང་བར་བྱེད་དོ། །སྐྱོབ་པར་བྱེད་དོ། །ཅི་འདོད་པའི་དངོས་གྲུབ་སྟེར་རོ་ཞེས་བཀའ་སྩལ་པ་དང་། འཁོར་དེ་རྣམས
209b5 རབ་ཏུ་དགའ་ནས་བཅོམ་ལྡན་འདས་ཕྱག་ན་རྡོ་རྗེ་ལ་རྒྱན་གྱི་ཆར་ཆེན་པོ་ཕབ་ནས་སོ་སོའི་གནས་སུ་འཁོད་དོ། །བསྟོད་པའི་རྒྱལ་པོའི་རྒྱུད་རྫོགས་སོ།། @#། །རྒྱ་གར་སྐད་དུ། ཤྲཱི་དེ་བཱི་ཀཱ་ལཱི་ནཱ་མ་ཨཥྚ་ཤ་ཏ་ཀ།
209b6 བོད་སྐད་དུ། དཔལ་ལྷ་མོ་ནག་མོའི་མཚན་བརྒྱ་རྩ་བརྒྱད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུ་གཅིག་ན། བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལ་བཞུགས་ཏེ། རྒྱུ་དང་འབྲས་བུའི་བྱང
209b7 ཆུབ་སེམས་དཔའ་ཐམས་ཅད་ལ་བདེན་པའི་མཚན་རྣམས་སྟོན་པར་མཛད་དོ། །དེའི་ཚེ་དཔལ་ལྷ་མོ་ནག་མོ་ཆེན་མོ་ཡང་བཅོམ་ལྡན་འདས་ཀྱི་ཐད་དུ་སོང་སྟེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འདུག་གོ། །དེ་ནས་བྱང་ཆུབ་སེམས
iiif viewer powered by OpenSeadragon
