| e-texts navigator |
| Wylie |
98b1 ཁང་པ་བརྩེགས་པའི་གཟུངས་དང་འཛིན་མ་དང་། ལེགས་བརྩེགས་མ་དང་། ལག་བརྩེགས་མ་དང་། མེ་ཏོག་བརྩེགས་མ་དང་། ཆད་པའི་གཟུངས་མ་དང་། ཚར་གཅོད་པའི་གཟུངས་མ་དང་། འགུགས་པར་བྱེད་པའི་གཟུངས་མ་དང་། དཔུང་རྒྱན་མ་དང་། དཔུང
98b2 རྒྱན་ལྡན་པ་དང་། རྒྱལ་མཚན་མཆོག་གི་དཔུང་རྒྱན་མ་དང་། རིན་ཆེན་མཆོག་གི་དཔུང་རྒྱན་མ་དང་། འཇིག་རྟེན་མཆོག་གི་དཔུང་རྒྱན་མ་དང་། བ་དན་མཆོག་གི་དཔུང་རྒྱན་མ་དང་། ལེའུ་གསུམ་མ་དང་། འཇིག་རྟེན་འཁྱིལ་མ་དང་། སྟོང་འཁྱིལ་མ་དང་། གཤིན་རྗེ
98b3 འཁྱིལ་མ་དང་། འབྱུང་པོ་ཐམས་ཅད་འཁྱིལ་མ་དང་། ཏོག་ལྡན་མ་དང་། རིན་ཆེན་ལྡན་མ་དང་། ནོར་བུ་རིན་པོ་ཆེའི་གཙུག་མ་དང་། བྱང་ཆུབ་ཡན་ལག་མ་དང་། སྟོབས་ལྡན་མ་དང་། མཐའ་ཡས་ཏོག་མ་དང་། ཀུན་ཏུ་ཏོག་མ་དང་། རིན་ཆེན་ཏོག་མ་དང་། རྣམ
98b4 གྲགས་ཏོག་མ་དང་། འབྱུང་པོ་ཐམས་ཅད་ཀྱི་ཏོག་མ་དང་། འཁོར་ས་ལྡན་མ་དང་། སྒྲ་སྙན་མ་དང་། དྲི་བྲལ་བཟང་མོ་དང་། གདོང་དྲུག་མ་དང་། དྲི་བྲལ་མ་དང་། འཇིག་རྟེན་གྲགས་པ་མ་དང་། དེ་དག་དང་གཞན་ཡང་གཟུངས་ཀྱི་ལྷ་མོ་བརྒྱ་སྟོང་དུ་མས་ཡོངས་སུ་བསྐོར་བ
98b5 དང་འཁོར་གྱི་དཀྱིལ་འཁོར་དེར་འདུས་པར་གྱུར་ཏོ། །སངས་རྒྱས་མཐའ་ཡས་པས་བྱིན་གྱིས་བརླབས་པ་དང་། བྱང་ཆུབ་སེམས་དཔའ་ཆེན་པོའི་ཏིང་ངེ་འཛིན་གྱིས་བྱིན་གྱིས་བརླབས་པ་དང་། སངས་རྒྱས་ཀྱི་ཞིང་གཞན་གྱི་སངས་རྒྱས་ཡོངས་སུ་སྤངས་པའི་རང་སངས་རྒྱས
98b6 བཅོམ་ལྡན་འདས་བསེ་རུ་ལྟ་བུ་དང་། ཚོགས་ན་སྤྱོད་པ་རྣམས་སེམས་ཅན་རྣམས་ཀྱི་དོན་མཛད་པ་ནི་ཅང་མི་གསུང་བ་གོམས་པས་ཆོས་ཀྱི་ཚུལ་ཡང་དག་པར་སྟོན་པ་ཡིན་ཏེ། འཁོར་བའི་རྗེས་སུ་འཁོར་བས་རྟག་ཏུ་ཡིད་སྐྱོ་ལ། རྒྱུད་ལ་སྙིང་རྗེ་ཆེན་པོ་སྤངས་ཤིང་སེམས་ལ་བག
98b7 ཆགས་བསྒོས་པ་ཁོ་ན་སྔོན་བྱང་ཆུབ་ཏུ་སེམས་བསྐྱེད་པ་ཉིད་ཡོངས་སུ་བསྒོས་པར་སེམས་པ་སྟེ། ས་གཅིག་དང་། ས་གཉིས་དང་། ས་གསུམ་དང་། བྱང་ཆུབ་སེམས་དཔའི་ས་བརྒྱད་ཀྱི་བར་དུ་འཇུག་པའི་སེམས་དང་འཁོར་བས་སྐྱོ་ཞིང་འཇིགས་ལ་འཇིགས་པར་བྱེད་པ་དེ
iiif viewer powered by OpenSeadragon
