| e-texts navigator |
| Wylie |
9b1 རྣམས་ཀུན་གྱིས་རྣམ་པར་བརྒྱན། །ཕྱག་ཏུ་ཨུཏྤལ་དམར་པོ་ནི། །སངས་རྒྱས་ཐམས་ཅད་རབ་བསྒོམས་པའོ། །ཆོས་ཀྱི་ཡེ་ཤེས་བྱེད་པ་མཆོག་།གསང་བ་དམ་ཚིག་རྡོ་རྗེ་ཅན། །མཁའ་དབྱིངས་རྡོ་རྗེའི་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས
9b2 རྒྱས་གཟུགས་ནི་རྣམ་བསྒོམས་ལ། །སྒྲོལ་མ་མཆོག་ནི་བསམ་པར་བྱ། །ཞལ་མཛེས་སྤྱན་ནི་ཡངས་པ་དང་། །སྣ་ཚོགས་རྒྱན་གྱིས་རབ་ཏུ་བརྒྱན། །ཁ་དོག་སེར་པོ་ཉིད་བསམ་ཞིང་། །བུད་མེད་སྒྱུ་མའི་དྲེགས་བོར་བ། །ཕྱག་ཏུ་ཨུཏྤལ་དམ་པ་ནི། །སེར་པོ་སྣང་བ་བསྒོམ
9b3 པར་བྱ། །རྡོ་རྗེ་ཉིད་འཛིན་ལས་བྱུང་བ། །སེམས་ཅན་ཀུན་གྱིས་ཕྱག་བྱས་པའོ། །ོ~ཾ་རུ་རུ་སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ནེ། སརྦ་ཨརྠ་སཱ་དྷ་ནི་སྭཱ་ཧཱ། ཨོ~ཾ་ཤཾ་ཀ་རེ་ཤཱནྟི་ཀ་རེ་གྷྲུཊྚ་གྷྲུཊྚི་ནི། གྷཱ་ཏ་ཡ་གྟཱ་ཏ་ཡ་གྷུ་ཊྚི་ནི་སྭཱ་ཧཱ། ཨོ~ཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊ~ཾ་ཀ་ཊེ་སྭཱ་ཧཱ། ཨོ~ཾ་ཏཱ་རེ་ཏུ་ཏྟཱ་རེ
9b4 ཏུ་རེ་སྭཱ་ཧཱ། རིག་པའི་ལྷ་མོ་བཞིའོ། །སྐུ་ནི་ལུས་ཀྱི་ངོ་བོ་ཡིས། །ཐུགས་ནི་སེམས་ཀྱི་རྣམ་པ་ཉིད། །གསུང་ནི་ངག་གི་རྣམ་པ་ཡིན། །མཆོད་ན་མཆོད་པའི་བདག་ཉིད་འགྱུར། །སྐུ་གསུང་ཐུགས་ཀྱི་གསང་བ་ནི། །མཁས་པ་ཡིས་ནི་བསྲུང་བྱ་སྟེ། །བསྲུངས་ན་མཆོག
9b5 ཏུ་གསང་བ་ནི། །རྟག་པར་ཀུན་ཏུ་འབྱུང་བར་འགྱུར། །དངོས་པོ་ཡོངས་སུ་དག་པ་ནི། །མེད་པས་ཀུན་ཏུ་བརྟག་མི་འབྱུང་། །རྣལ་འབྱོར་པ་ཡིས་རྣལ་འབྱོར་ཐོབ། །ཚོགས་མེད་ཡང་དག་མི་མཐོང་ངོ་། །དེ་བས་གསང་བའི་ཡེ་ཤེས་འབྱུང་། །རྣལ་འབྱོར་ཀུན་ཏུ
9b6 འབྱུང་བར་འགྱུར། །ཤེས་རབ་ཕ་རོལ་ཕྱིན་པའི་ཐབས། །ཏིང་འཛིན་ཡེ་ཤེས་བརྟགས་པ་ཡིན། །ཆོས་རྣམས་ཐམས་ཅད་རྣམ་དག་པ། །དག་པ་ཉིད་དུ་གྱུར་པ་ནི། །ཇི་ལྟར་ལྷ་ཡི་ནོར་བུ་ནི། །རང་གི་འོད་ཀྱིས་རྟག་ཏུ་སྣང་། །སྲིད་པ་ཡོངས་སུ་དག་པ་ཡང་། །
9b7 རྣལ་འབྱོར་རྣལ་འབྱོར་ཐོབ་བྱེད་ཡིན། །རྡོ་རྗེ་དབྱིངས་ནི་གསང་ཆེན་དུ། །གང་ཞིག་དབང་བསྐུར་མཁས་པ་ལ། །ཐུགས་ཀྱི་གསང་བའི་རྣལ་འབྱོར་མཆོག་།མཁས་པས་དེ་ལ་བཤད་པར་བྱ། །ཐམས་ཅད་གསང་བ་ཞེས་བྱ་བའི་རྒྱུད་ཀྱི་རྒྱལ་པོ་རྫོགས་སོ།། །།
iiif viewer powered by OpenSeadragon
