| e-texts navigator |
| Wylie |
15b1 ལྡན་པས། །རྡོ་རྗེའི་དཀྱིལ་འཁོར་བརྟག་པར་བྱའོ། །འཇུག་པར་བྱ་བ་དེ་བཞིན་ཏེ། །ལས་ཀྱང་དེ་དང་འདྲ་བར་བྱའོ། །དཀྱིལ་འཁོར་དེ་རུ་ཞུགས་ནས་སུ། །དེ་བཞིན་རྡོ་རྗེ་གསོར་བར་བྱ། །འཇིག་རྟེན་གསུམ་རྒྱལ་རབ་བསླབས་ནས། །རྡོ་རྗེ་མཆོག་ནི་བསྒྲུབ་པར་བྱ། །
15b2 དེ་ལ་རྡོ་རྗེ་བསྒྲུབ་པའི་ཆོ་ག་ནི། ལག་པ་གཉིས་ཀྱིས་རྡོ་རྗེའི་ཕྱག་རྒྱ་འཛིན་པས་རྡོ་རྗེ་བཟུང་ལ། ཇི་སྲིད་དུ་འགུལ་བ་དེ་སྲིད་དུ་བཟླས་སོ། །དེ་ཕྱིན་ཅད་རྡོ་རྗེ་དེས་ལས་ཐམས་ཅད་བྱེད་དོ། །རྡོ་རྗེའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ། དཀྱིལ་འཁོར
15b3 ཆེན་པོ་ཀུན་བྲིས་ནས། །མཚན་མ་ཐམས་ཅད་བསྟན་པར་བྱ། །འཇུག་པ་རྡོ་རྗེ་དྲིལ་བུ་དང་། །རྡོ་རྗེ་འཛིན་མཆོག་ཕྱག་རྒྱས་སོ། །དེ་ལ་རྡོ་རྗེ་དྲིལ་བུའི་ཕྱག་རྒྱ་ནི་འདི་ཡིན་ནོ། །རྡོ་རྗེ་འཛིན་མ་ཀུན་བྱས་ནས། །རྡོ་རྗེར་ཀུན་ཏུ་བརྟག་པར་བྱ། །གཡས་པར་བཞག་ནས་གཡོན
15b4 པ་ཡིས། །དྲིལ་བུ་གསིལ་ཞིང་འཇུག་པར་བྱ། །བཅུག་ནས་སུ་ནི་དྲིལ་བུ་དེ། །མཉམ་པར་བཞག་པས་གསིལ་བར་བྱ། །སློབ་དཔོན་གྱུར་ཅིག་དམ་ཚིག་ཀྱང་། །རྟག་ཏུ་བསྲུངས་ཞེས་བརྗོད་པར་བྱ། །ཇི་ལྟར་དྲིལ་བུའི་སྒྲ་འདི་ནི། །དེ་ཡི་མི་རྟག་པ་རུ་གསུངས། །
15b5 དེ་ལྟར་ཁྱོད་ལ་བྱིན་པ་ནི། །རྡོ་རྗེ་ཆེན་པོ་ཞེས་བྱ་འདིས། །ངེས་པར་བསྲེག་པར་གྱུར་པ་ནི། །དེ་སྟེ་རྡོ་རྗེ་འཛིན་དད་དང་། །སྐྱབས་གསུམ་བརྟུལ་ཞུགས་དེ་བཞིན་ཏེ། །དེ་ལྟར་བྱང་ཆུབ་སེམས་འདོད་རྣམས། །ཁྱོད་ཀྱིས་འདི་ཚེ་སྤངས་གྱུར་ནའོ། །དེ་ལ་འདི་ཉིད་དམ་ཚིག་གི
15b6 སྔགས་སོ། །ོ~ཾ་ཧ་ན་ས་མ་ཡ་ཧཱུ~ཾ་ཕཊ། དེ་ནས་དེ་བཞིན་དུ་འདུག་ལ་རྡོ་རྗེའི་ཆུ་འདི་བླུད་དོ། །དེ་ནས་གདོང་བཅིངས་པ་བཀྲོལ་ནས་ཆོ་ག་དེ་བཞིན་དུ་བྱའོ། །དམ་ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ། དེ་བཞིན་དཀྱིལ་འཁོར་བྲིས
15b7 ནས་སུ། །ཆ་ལུགས་མང་པོ་གཞག་པར་བྱ། །བཙུད་ནས་ལས་རྣམས་ཐམས་ཅད་ཀྱང་། །སློབ་དཔོན་གྱིས་ནི་དེ་བཞིན་བསླབ། །དེ་ནས་ལས་ཀྱི་རབ་ཏུ་སྦྱོར་བ་འདིའོ། །བཅོམ་ལྡན་འདས་ཀྱི་སྤྱན་སྔར་ཐབ་གྲུ་བཞིར་བྱས་ལ། མངར་པོའི་ཡམ་ཤིང་ལ་མེ་བུས་ལ།
iiif viewer powered by OpenSeadragon
