| e-texts navigator |
| Wylie |
8b1 བཅོམ་ལྡན་འདས་ཐབས་གང་གིས་མཐར་ཐུག་ཐོབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་མཐའ་སྣང་བ་གསུམ་ལས་སྟོང་པ་གསུམ་མོ། །དམིགས་པ་མེད་པ་སྒྱུ་མ་ལྟ་བུ་ལས་སྟོང་པ་གསུམ་གྱི་མཐའ་བདེ་སྟོང་འོད
8b2 གསལ་བའོ། །བྱང་ཆུབ་སེམས་དཔའ་ཆེན་པོས་གསོལ་པ། སྟོང་པ་གསུམ་འོད་གསལ་བའི་མཐར་ཇི་ལྟར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེས་ཤིང་བསྲེགས་པ་སྟེ་འབར་བར་བྱེད་པ་དེ་བཞིན་དུ་འོད་གསལ་བར་ཤེས་རབ་ཀྱི་སྣང་བ་ཡེ་ཤེས་ཡུན
8b3 རིང་པོས་རྣམ་པར་སྤྱོད་པར་བྱེད་དོ། །ཇི་ལྟར་ཏ་ལའི་ལོ་མ་ཡང་འབར་བར་བྱེད་པ་དེ་བཞིན་དུ་སྟེ་འོད་གསལ་བར་བྱེད་པ་དེ་བཞིན་དུ་ཐབས་ཀྱིས་ཡེ་ཤེས་ལ་མཆེད་པ་རྣམ་པར་སྦྱོང་བར་བྱེད་དོ། །ཇི་ལྟར་རས་བལ་གྱི་འདབ་མ་བསྲེགས་པ་དེ་བཞིན་དུ་སྣང་བ་ཐོབ་པའི་ཡེ་ཤེས་མཆོག་ཏུ་གྱུར
8b4 པས་རྣམ་པར་སྦྱོང་བར་བྱེད་དོ། །དེའི་ཕྱིར་ཤིང་ཏ་ལའི་ལོ་མ་དང་རས་བལ་གྱི་འདབ་མ་བསྲེགས་པས་འབར་ཞིང་ཐལ་བར་གྱུར་པ་དེ་བཞིན་དུ་སྟོང་པ་དང་། སྟོང་པ་ཆེན་པོ་དང་། ཤིན་ཏུ་སྟོང་པ་དང་། ཐམས་ཅད་སྟོང་པ་རྣམས་སྣང་བ་ཉེ་བར་ཐོབ་པ་འོད་གསལ་བར་འགྱུར་རོ། །འོད་གསལ
8b5 དོན་དམ་བདེན་པ་ཉིད། །མཉམ་ཉིད་ཡེ་ཤེས་རྟོགས་པས་ནི། །དབྱིངས་ཀྱི་དང་དུ་རྟོག་པའི་ཚོགས། །མ་དག་གཉེན་པོའི་བྱེད་པ་དང་། །རྒྱུ་རྐྱེན་ཡུལ་སྤྱོད་དངོས་པོ་ཀུན། །རྟོག་མེད་རང་འབྱུང་མེ་འབར་བས། །ཤིང་གི་བྱེ་བྲག་སྣ་ཚོགས་དང་། །རས་བལ་ཕུང་པོ་དུ་མ་ཡང་། །ཚིག
8b6 ཅིང་དངོས་མེད་བྱེད་པ་ལྟར། །དེ་བཞིན་གཟུགས་འཛིན་མ་ལུས་པ། །ཆོས་ཀྱི་དབྱིངས་ཀྱི་གནས་ཉིད་དུ། །བསྲེགས་ཤིང་ཐིམ་གྱུར་མི་གནས་པའོ། །རྡོ་རྗེ་ལྟ་བུའི་ཏིང་འཛིན་གྱིས། །ཀུན་རྟོག་མ་ལུས་བཅོམ་གྱུར་པའི། །རྣམ་པར་དག་པའི་ཡེ་ཤེས་ཀྱི། །མཁྱེན་པ་བྱང་ཆུབ
8b7 སེམས་ཀྱི་རྒྱུན། །མི་འགག་ཕྲིན་ལས་རྒྱུན་མི་འཆད། །མི་འགྱུར་སྟོང་ཉིད་བདེ་ཆེན་པོ། །ཟུང་འཇུག་རབ་ཏུ་མི་གནས་པ། །ཐོབ་ཏུ་མེད་ལས་ཀུན་དུ་འབྱུང་། །ལྷུན་གྲུབ་དེ་བཞིན་ཉིད་གནས་པའོ། །དེ་ཁོ་ན་ཉིད་ལས་རྟོག་པ་དང་མི་རྟོག་པ་རྣམ་པར་དག་པར་གྱུར་པས། རང་བཞིན
iiif viewer powered by OpenSeadragon
