| e-texts navigator |
| Wylie |
35a1 གཤེགས་པ་དུས་གསུམ་དང་། །ཕྱོགས་བཅུ་ཀུན་དུ་ཞིང་ཁམས་རབ་འབྱམ་དང་། །ཀུན་དུ་གཟིགས་ཤིང་ཀུན་མཁྱེན་པ། །མ་ལུས་ཡོངས་དག་ཏིང་ངེ་འཛིན། །ཐམས་ཅད་མཁྱེན་པས་སྐད་ཅིག་ལས། །ནམ་མཁའ་ལྟར
35a2 ནི་རྟོག་མེད་པས། །གདུལ་བྱ་དུས་ལ་བབ་པ་ལ། །འབད་མེད་པར་ནི་སྐུ་གསུང་ཐུགས། །རྒྱུན་མི་འཆད་ཅིང་ཐོགས་མེད་དོན། །སྣང་མེད་ངང་ལས་འབྱུང་འགྱུར་བའོ། །རྒྱུད་ཀྱིས་བསྡུས་དང་མ་བསྡུས་ལས། །རྡོ་རྗེ་ངོ་བོ་ཉིད་སྟོན་འགྱུར། །དེ་ལས
35a3 མངོན་པར་བྱང་ཆུབ་པ་བླ་ན་མེད་པ་ཡེ་ཤེས་ཀྱི་སྐུ་དེ་བཞིན་གཤེགས་པ་འཇུག་པ་དང་། གནས་པ་དང་། འབྱུང་བར་འགྱུར་བ་མཉམ་པ་ནི་ཆོས་ཉིད་དེ་བཞིན་ཉིད་ལས་བྱང་ཆུབ་པ་སྟེ། རང་བཞིན་གྱིས་སྤྲོས་པ་མེད་པ་ལྷུན་གྲུབ་སྟོང་པ་ཉིད་དོ། །ཁྱབ
35a4 ཅིང་གསལ་བའི་ངོ་བོ་མངོན་པར་བྱང་ཆུབ་པ་ནི། དངོས་པོ་མེད་པའི་གསལ་བར་གྱུར་པའི་ཁྱབ་བདག་རྡོ་རྗེའོ། །མི་ཟད་པ་སྣང་བའི་ཡེ་ཤེས་མངོན་པར་བྱང་ཆུབ་པ་ནི། མི་མཚུངས་པ་མེད་པའི་སྣང་བ་འོད་གསལ་བའི་མཚན་ཉིད་རྟག་ཏུ་མི་འགྱུར་བའི
35a5 དེ་བཞིན་ཉིད་དོ། །སྒྱུ་འཕྲུལ་དྲ་བ་མངོན་པར་བྱང་ཆུབ་པ་ནི། ཀུན་ཏུ་འབྱུང་བ་ཐོགས་པ་མེད་པའི་དུས་དང་། རྣམ་པ་ཐམས་ཅད་དུ་འགག་པ་མེད་པའོ། །ཡོངས་སུ་དག་པ་ཆོས་ཀྱི་དབྱིངས་མངོན་པར་བྱང་ཆུབ་པ་ནི། ཐ་དད་པར་དམིགས་པ
35a6 མེད་པའི་ཡེ་ཤེས་ཀྱི་སྐུ། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་དུས་གསུམ་ཐོག་མཐའ་ཀུན་དུ་དཀྱིལ་འཁོར་ཆེན་པོ། །གསང་བའི་བདེ་བ་ཆེན་པོ་སྐུ་གསུང་ཐུགས་རྡོ་རྗེ་དམ་ཚིག་གི་འཁོར་ལོས་ཞི་བ་དང་། ཁྲོ་བོའི་སྐུ་སྣ་ཚོགས་སུ་སྣང་བའོ། །
35a7 ལོངས་སྤྱོད་རྫོགས་པ་མཚན་དཔེ་ལྡན། །ཡབ་ཡུམ་བདེ་ཆེན་ངོ་བོ་ཉིད། །སྙིང་རྗེ་ཆེན་པོ་ཚད་མེད་པས། །རྒྱུན་མི་འཆད་པར་བསམ་པ་དང་། །མཐུན་པར་འཇུག་པས་ཞི་མི་འགྱུར། །རང་བཞིན་མེད་པས་མི་འགྱུར་བའོ། །དཔལ་ཡེ་ཤེས་རྡོ་རྗེ
iiif viewer powered by OpenSeadragon
