| e-texts navigator |
| Wylie |
29b1 ཁམས་དང་སྐྱེ་མཆེད་ཐམས་ཅད་རྟེན་དང་བརྟེན་པར་གྱུར་པ། སྤྱི་གཙུག་ནས་རྐང་མཐིལ་གྱི་བར་དུ་བདེ་བ་ཚད་མེད་པ་སྐྱེས་པས། སྣང་སྲིད་ཐམས་ཅད་བདེ་བ་ཚད་མེད་པར་གྱུར་པ། ས་གསུམ་ཀུན་ཏུ་སྒྱུ་མའི་རོལ་པས་མི་ཟད་པའི་ཆོ་འཕྲུལ་དཔག་ཏུ་མེད་པ
29b2 སྐད་ཅིག་གཅིག་ལ་འཆར་བར་འགྱུར་བའོ། །དེའི་ཚེ་བསྟན་པ་སྐུ་གསུམ་མཆོག་ནི། བདེ་བ་ལོངས་སྐུ། གསལ་བ་སྤྲུལ་སྐུ། མི་རྟོག་པ་ཆོས་ཀྱི་སྐུ་སྟེ། དབྱེར་མེད་ངོ་བོ་ཉིད་ལྷུན་གྲུབ་དེ་ལ། ཕྲིན་ལས་ཐོགས་པ་མེད་པར་འཆར་བས་རབ་ཏུ་བསྒོམ་པའོ། །
29b3 དཔག་ཚད་བརྒྱའི་ནི། དེ་བཞིན་གཤེགས་པའི་ཞིང་ཁམས་ཚད་མེད་པའི་སྣང་བ་ཆེན་པོས་ཀུན་ཏུ་བྱས་པ་སྤྲོ་བསྡུའི་མཛད་པ་སྟོན་པའོ། །དེ་ལས་དབང་པོ་གཉིས་ཀྱི་སྦྱོར་བ་ནི། ཐབས་སྙིང་རྗེ་ཆེན་པོ་བླ་ན་མེད་པ་ནི་ཤེས་རབ་རྣམ་པ་ཐམས་ཅད་ཀྱི་མཆོག་དང་ལྡན་པའི
29b4 སྟོང་ཉིད་ཀྱི་ཏིང་ངེ་འཛིན་དབྱིངས་དང་ཡེ་ཤེས་དབྱེར་མེད་དུ་གྱུར་པའོ། །སངས་རྒྱས་ནི་སློབ་པ་ལས་འདས་པ་མི་སློབ་པའི་ཟུང་འཇུག་སྟེ། བྱང་ཆུབ་ནི་ཡང་དག་པའི་ཡེ་ཤེས་ཐུགས་སུ་ཆུད་པའོ། །གནས་ཞི་བ་སྟེ་མཐའ་ཐམས་ཅད་དང་བྲལ་བ་གཉིས་མེད་ཟུང་འཇུག
29b5 ཆེན་པོ་མངོན་དུ་གྱུར་པས་ས་བཅུ་གསུམ་པའི་དབང་ཕྱུག་དམ་པའོ། །ཉེ་བར་བསྡུ་བ་ལ་གདམས་པ་སྟེ། རྡོ་རྗེ་ཅན་ནི་དག་པའི་སྒྱུ་ལུས་ལ་གནས་པ་སྟེ། མི་སློབ་པའི་ཟུང་འཇུག་ལམ་ཐམས་ཅད་མཐར་ཕྱིན་པས་སྲོད་དུས་སུ་བདུད་བཅོམ་སྟེ། བྱང་ཆུབ་སེམས་དཔའ་རྡོ་རྗེ
29b6 སྙིང་པོའི་ནུས་པ་ཐོབ་པ། ཐོབ་པས་ཡེ་ཤེས་ཆེན་པོ་གསང་བའི་གནས་གྲུབ་པའོ། །ཐོ་རངས་ཤིན་ཏུ་རྣམ་པར་དག་པའི་གྲུབ་པ། ཡེ་ཤེས་རབ་ཏུ་མི་གནས་པ། གཙུག་ཏོར་ཆེན་པོ་རབ་ཏུ་རྫོགས་པ་བདེ་བ་ཆེན་པོ་མི་ཤིགས་པ་བླ་ན་མེད་པ་ཐོབ་པའོ། །བཤང་གཅིའི
29b7 དམ་ཚིག་བཟའ་བ་ནི། དབྱིངས་ཀྱི་ངང་དུ་ཡེ་ཤེས་རོ་མཉམ་དུ་ཐིམ་པས་དངོས་གྲུབ་མ་ཟད་པ་ཡེ་ཤེས་རྒྱ་མཚོ་རྣམ་པར་དག་པ། རྡོ་རྗེ་སྐུ་གསུང་ཐུགས་ཀྱི་གསང་བ་བྱང་ཆུབ་ཆེན་པོ་རབ་ཏུ་རྟོགས་པའི་སྐད་ཅིག་གཅིག་རྡོ་རྗེ་འཆང་དེ་བཞིན་གཤེགས་པ་མངོན་དུ་གྱུར
iiif viewer powered by OpenSeadragon
