| e-texts navigator |
| Wylie |
251b1 མཆོད་པ་རྣམ་པ་དུ་མས་མཆོད་པ་ནི་ནམ་མཁའ་ལ་རིན་པོ་ཆེའི་ཆར་དང་། སྒེག་པ་དང་། རྒོད་པ་དང་། དགའ་བའི་མཆོད་པའི་རྣམ་པ་དང་། པ་ཊ་ཧ་ལ་སོགས་པའི་མཆོད་པ་དང་། གཞན་ཡང་ལྷའི་མེ་ཏོག་དང་། སྤོས་དང་། མར་མེ་དང་། ཞལ་ཟས་ཀྱི་མཆོད་པ་རོ་བརྒྱ་པ་དང་།
251b2 བཏུང་བའི་མཆོད་པས་མཆོད་དེ། གཞན་ཡང་ནང་དང་། གསང་བ་དང་། གསང་བའི་གསང་བ་བླ་ན་མེད་པའི་མཆོད་པ་ཆེན་པོ་རྨད་དུ་བྱུང་བས་མཆོད་ནས་ལན་གསུམ་བསྐོར་བ་བྱས་ཏེ། སོ་སོའི་རྫུ་འཕྲུལ་གྱིས་མི་སྣང་བར་གྱུར་ཏོ། །དཔལ་རྡོ་རྗེ་གྲུབ་པ་དྲ་བ་སྡོམ་པའི་རྒྱུད་ཀྱི་རྒྱལ་པོ
251b3 རྫོགས་སོ། ། །།རྒྱ་གར་ཀྱི་མཁན་པོ་ག་ཡ་དྷ་ར་དང་། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་པའོ།། @##། །རྒྱ་གར་སྐད་དུ། སརྦ་ཏ་ཐཱ་ག་ཏ་ཙིཏྟ་གརྦྷཱརྠ་ཏནྟྲ། བོད་སྐད་དུ། དེ་བཞིན་གཤེགས
251b4 པ་ཐམས་ཅད་ཀྱི་ཐུགས་ཀྱི་སྙིང་པོ་དོན་གྱི་རྒྱུད། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་བདག་།སྙིང་པོ་མཆོག་ནི་བཞུགས་པའི་སྐུ། །རྡོ་རྗེ་སེམས
251b5 དཔའ་ལ་གཟིགས་ཏེ། །སངས་རྒྱས་རྣམས་ཀྱི་ཡེ་ཤེས་སྐུ། །སྣ་ཚོགས་གཟུགས་ཅན་སེམས་འདི་ནི། །མཐའ་དང་བྲལ་བ་ཡིན་མོད་ཀྱི། །སྲིད་དང་འཁོར་བར་རབ་ཏུ་གྲགས། །དེ་ན་རྡོ་རྗེ་སེམས་དཔའ་ཡིས། །བཅོམ་ལྡན་འདས་ལ་འདི་སྐད་གསོལ། །ཀྱེ་ཧོ་རང་བྱུང་བཅོམ་ལྡན
251b6 འདས། །ནམ་མཁའི་བདག་པོ་སྣ་ཚོགས་ལུས། །གསུང་གི་མངའ་བདག་རིག་སྔགས་རྒྱལ། །སྐྱེ་མེད་དབྱིངས་ནས་སྣང་བྱེད་འཁྲུངས། །འགྲོ་དྲུག་འདྲེན་པ་ཁྱོད་ཀྱིས་གསུངས། །ཉིད་ཀྱི་ཞལ་ནས་ཐིགས་པ་ཤོར། །ཀེ་ཀེ་རུ་དང་མརྒད་དང་། །སྤུག་དང་རྡོ་ཡི་སྙིང་པོ་དང་། །རིན་ཆེན
251b7 ཁ་དོག་སྣ་ལྔ་པས། །ཡེ་ཤེས་གཞལ་ཡས་ཁ་དོག་སྤྲས། །ཉིད་ལས་མི་གཞན་འཇིགས་བྱེད་དང་། །རྒྱལ་སྲས་དད་པ་གཏམ་ཉན་དང་། །འགྲོ་བ་འདུལ་བའི་འཁོར་རྣམས་སོ། །དེ་ནས་བཅོམ་ལྡན་ཤཱཀ་ཐུབ་ཀྱི། །གསུང་གི་དགོངས་པ་མཁྱེན་ནས་ནི། །སངས་རྒྱས་རྣམས་ཀྱི་ཡེ་ཤེས
iiif viewer powered by OpenSeadragon
