| e-texts navigator |
| Wylie |
247a1 གཞག་ལ་བརྟག་པར་བྱ། །དེ་ལ་རོ་ཡི་ཕྱག་རྒྱ་བསྟན། །དེ་བཞིན་བྱེ་བྲག་ཤེས་པར་བྱ། །དེ་བཞིན་ཆོས་ལ་ཆོས་ཕྱག་རྒྱ། །བརྟགས་ཏེ་བདུད་རྣམས་བསལ་བར་བྱ། །ལུས་ལ་བྱུང་བའི་བདུད་རྣམས་ཀྱང་། །ཁ་དོག་དབྱིབས་ལ་ཤེས་པར་བྱ། །དང་པོ་དངོས
247a2 གྲུབ་བླང་བ་ཡང་། །མིག་གིས་གཟུགས་ལ་རྣ་བས་སྒྲ། །སྣ་ཡིས་དྲི་དང་ལྕེ་ཡིས་རོ། །ལུས་ཀྱིས་རེག་དང་ཡིད་ཀྱིས་ཆོས། །བརྟུལ་ཞུགས་ཅན་གྱིས་དངོས་གྲུབ་བླང་། །དེ་ནས་བདུད་ནི་བསལ་བྱ་སྟེ། །ཡང་ན་སྟོང་པའི་རྫོང་ལ་གནས། །ཡང་ན་ཕྲིན་ལས་བཞི་ཡིས་བསལ། །ཆུ་ཡིས
247a3 བདེ་བ་འཇམ་སོགས་པས། །ནང་གི་བདུད་ནི་བསལ་བའོ། །པད་མཁྲིས་སྟེང་སྒོ་འདུས་པའི་བར། །རླུང་ཅན་མགོ་ཡི་སྒོ་རུ་སྟེ། །རྒྱུད་འདི་གཏད་ཀྱིས་ལེགས་པར་ཟུང་། །དེ་ལྟར་བྱས་ན་དངོས་གྲུབ་ཐོབ། །དཔལ་མཁའ་འགྲོ་མ་གསང་བ་འབར་བའི་རྒྱུད་ཀྱི་རྒྱལ་པོ་རྫོགས་སོ།། །།
247a4 རྒྱ་གར་གྱི་མཁན་པོ་ག་ཡ་དྷ་ར་དང་། བོད་ཀྱི་ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། @##། །རྒྱ་གར་སྐད་དུ། ཤྲཱི་བཛྲ་བྷཻ་ར་བ་བི་དཱ་ར་ཎ་ཏནྟྲ་རཱ་ཛ། བོད་སྐད་དུ། དཔལ་རྡོ་རྗེ་འཇིགས་བྱེད་རྣམ་པར་འཇོམས་པའི
247a5 རྒྱུད་ཀྱི་རྒྱལ་པོ། དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་འཁོར་དཔག་ཏུ་མེད་པ་དང་། །རི་རབ་ཀྱི་སྟེང་དུ་བཞུགས་པའི་དུས་སུ་བྱང་ཆུབ་སེམས་དཔའ་རྡོ་རྗེ་སྙིང་པོས། བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ
247a6 ཐལ་མོ་སྦྱར་ནས་འདི་སྐད་ཅེས་གསོལ་ཏོ། །ཐུགས་རྗེ་ཆེ་ལྡན་བཅོམ་ལྡན་འདས། །རྡོ་རྗེ་གང་ལགས་འཇིགས་བྱེད་གང་། །འཇོམས་པ་གང་ལགས་རྒྱུད་གང་ལགས། །རྒྱལ་པོ་གང་ལགས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །རྡོ་རྗེ་རྣམ་པ་གསུམ་ཡིན་ཏེ། །ཉོན
247a7 མོངས་བདུད་སོགས་འཇིགས་པར་བྱེད། །ཉོན་མོངས་དགྲ་སོགས་རྣམ་པར་འཇོམས། །རྒྱུ་ཡི་རྒྱུད་དང་འབྲས་བུའི་རྒྱུད། །མཐར་ཐུག་རྒྱུད་ནི་གང་ཡིན་ལ། །རྒྱལ་པོ་ཞེས་ནི་བསྟན་པ་ཡིན། །རྡོ་རྗེ་སྙིང་པོས་ཡང་གསོལ་པ། །རེ་རེའི་བྱེ་བྲག་མ་འཚལ་བས། །དེ་ཡི་དབྱེ་བ་བཤད་དུ་གསོལ། །
iiif viewer powered by OpenSeadragon
