| e-texts navigator |
| Wylie |
227b1 པ་ལས། །སངས་རྒྱས་སེམས་ཅན་ག་ལ་ཡོད། །དམན་དང་གྱ་ནོམ་ག་ལ་ཡོད། །འཁོར་བ་ཡོངས་སུ་ཤེས་པ་ལ། །མྱ་ངན་འདས་ཞེས་དེ་ལ་བརྗོད། །ཐམས་ཅད་འཇིགས་དང་རྣམ་རྟོག་སྤོངས། །འདི་ལ་ཐམས་ཅད་ངོ་མཚར་གྱི། །ལེགས་པར་གཏད་ཀྱིས་དམ་དུ་སྦོས། །དེའི་ཚེ་འཁོར་འདུས
227b2 པ་ཐམས་ཅད་ངོ་མཚར་དུ་གྱུར་ཏེ་མི་སྣང་བར་གྱུར་ཏོ། །དཔལ་རིན་ཆེན་འབར་བའི་རྒྱུད་ཀྱི་རྒྱལ་པོ་རྫོགས་སོ།། །།རྣལ་འབྱོར་མ་ཟླ་བའི་ཕྲེང་བ་དང་ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
227b3 @##། །རྒྱ་གར་སྐད་དུ། ཤྲཱི་སཱུརྱ་ཙཀྲ་ཏནྟྲ་རཱ་ཛ་ནཱ་མ། བོད་སྐད་དུ། དཔལ་ཉི་མའི་འཁོར་ལོའི་རྒྱུད་ཀྱི་རྒྱལ་པོ་ཞེས་བྱ་བ། དཔལ་བདེ་བ་ཆེན་པོ་ལ་ཕྱག་འཚལ་ལོ། ། ལ་ལ་ཧོ་དཔའ་བོ་གྱེ། །ངོ་མཚར་རྨད་དུ་བྱུང་བ་ཡི། །བསྐྱེད་དང་རྫོགས་པ་ཆེན་པོ་སྟེ། །མ་སྤངས་པ
227b4 དང་ངེས་པ་དག་། མགོན་པོས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་མ་སྤངས་བཤད་བྱ་སྟེ། །ཕུང་པོ་ཁམས་དང་སྐྱེ་མཆེད་དག་།བསྐྱེད་པའི་རིམ་པའི་རྒྱུ་མ་སྤངས། །ཕྱག་མཚན་ཉི་ཟླ་ཡིག་འབྲུ་དག་།བླ་མའི་མན་ངག་རྐྱེན་མ་སྤངས། །ལུས
227b5 ངག་སྒོ་བསྡམས་དམ་ཚིག་ལས། །སྐུ་གཉིས་འབྱུང་བ་འབྲས་མ་སྤངས། །ཞེ་སྡང་རུ་དྲར་སྐྱེ་བའི་ལས། །ཞེ་སྡང་རང་རིག་བསྐྱེད་པ་དང་། །ལུས་ཀྱི་དྲི་མ་འཁྲུད་པ་ལས། །ལས་ཀྱི་དབྱེ་བ་མ་སྤངས་པའོ། །པུལླི་ར་དང་ཛཱ་ལན་སོགས། །ནང་དུ་སྤྱི་བོ་སྤྱི་གཙུག་སོགས། །གནས་ཀྱི་དབྱེ
227b6 པ་མ་བསྐངས་པའོ། །ཤར་སོགས་བདུད་ཀྱི་སྙིང་ག་རུ། །ཞབས་གནས་གནས་ཆེན་མ་སྤངས་པ། །གནས་དེ་ཕྱི་དང་ནང་དུ་ཤེས། །གནས་ཀྱི་དབྱེ་བ་མ་སྤངས་པའོ། །གསེར་འགྱུར་རྩི་ཡི་རྣམ་པ་བཞིན། །ཕུང་སོགས་ལྷ་རུ་འཕོ་བྱེད་པ། །འདི་ནི་འཕོ་བ་མ་སྤངས་པའོ། །རྒྱུ་ཡི་གནས་ནི
227b7 སྙིང་ག་སྟེ། །འབྲས་བུའི་གནས་ནི་ཕུང་སོགས་ཏེ། །མ་སྤངས་པ་ནི་གཉིས་སུ་ཤེས། །ཕུང་སོགས་སྒྱུ་མར་འཛིན་བྱེད་པ། །འདི་ནི་རྟེན་པ་མ་སྤངས་པའོ། །གལ་ཏེ་ནང་དུ་མ་ཟིན་ན། །ཕྱི་རུ་དེ་ཉིད་ངོ་བོར་བསྒོམ། །དེ་ཉིད་ཤོར་བ་མ་སྤངས་པའོ། །གཉེན་པོ་མ་སྤངས་སྒྱུ་མར་བསྒོམ། །
iiif viewer powered by OpenSeadragon
