| e-texts navigator |
| Wylie |
72a1 ཡང་སྙན་པ་བརྗོད་པ་ན། ཡང་དག་པ་ལ་ནི་ཡང་དག་པ་ཉིད་དུ་ཁས་བླང་བར་བྱ་ལ། ཡང་དག་པ་མ་ཡིན་པ་ལ་ནི་ཡང་དག་པ་མ་ཡིན་པ་ཉིད་དུ་སྟེ། འདི་ལྟར་དེ་ནི་ཡང་དག་པ་མ་ཡིན་ཞིང་དེ་ཁོ་ན་མ་ཡིན་པས། ངེད་ཀྱི་ཆོས་འདི་ལ་ནི་ཡོད་པ་མ་ཡིན་ནོ་ཞེས་ལན་གདབ་པར
72a2 བྱའོ། །དགེ་སློང་དག་གང་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དག་།དེ་བཞིན་གཤེགས་པའི་སྙན་པ་ཅུང་ཟད་ཙམ་འདི་སྨྲ་ཞིང་རྗོད་པ་འདི་ལྟ་སྟེ། ཚུལ་ཁྲིམས་ཙམ་དང་འདོད་པ་དག་ལས་རབ་ཏུ་དབེན་པ་ཡིན་ནོ། །ཇི་ལྟར་ན་ཚུལ་ཁྲིམས་ཙམ་ཡིན་ཞེ་ན། གཽ་ཏ་མ་དེ་ནི
72a3 འཕེལ་བའི་ཚུལ་ཁྲིམས་ཅན་ཡིན་ལ། ཇི་སྐད་སྨྲས་པ་དེ་བཞིན་བྱེད་ཅིང་ཇི་ལྟར་བྱེད་པ་དེ་བཞིན་སྨྲ་བ་ཡིན་ནོ། །གཽ་ཏ་མ་དེ་ནི་འདི་ལྟར་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་སྟེ། སྲོག་ཆགས་སུ་གྱུར་པའི་སེམས་ཅན་ཐམས་ཅད་ལ་སྙིང་རྗེ་དང་ལྡན་ཞིང་ངོ་ཚ་ཤེས་པ
72a4 དང་། དབྱུག་པ་སྤངས་ཤིང་མཚོན་ཆ་སྤངས་པས་ཐ་ན་སྲོག་ཆགས་གྲོག་སྦུར་ཡན་ཆད་ལ་ཡང་སྲོག་གཅོད་པ་སྤངས་པ་ཡིན་ན། གཽ་ཏ་མ་དེ་ནི་འདི་ལྟར་མ་བྱིན་པར་ལེན་པ་སྤངས་ནས་མ་བྱིན་པར་ལེན་པ་ལས་སླར་ལོག་པ་སྟེ། མ་བྱིན་པར་མི་ལེན་པ། བྱིན་པ་ལ་ནི་དགའ་བ་ཡིན་ཏེ།
72a5 དེ་བཞིན་དུ་རྒྱ་ཆེར་རོ། །ཇི་ལྟར་འདི་ནི་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་ཡོངས་སུ་སྤྱོད་ཅིང་། རིག་པ་ཡོན་པོ་དག་གིས་ལོག་པར་འཚོ་བས་འཚོ་བར་བྱེད་དེ། འདི་ལྟ་སྟེ་ཉི་མ་དང་ཟླ་བ་གཉིས་ལམ་ནས་རྒྱུ་བའི་རྣམ་པར་སྨིན་པ་ནི་འདི་ལྟ་བུའོ། །ཉི་མ་དང་ཟླ་བ་གཉིས
72a6 ལམ་ལོག་པ་ནས་རྒྱུ་བའི་རྣམ་པར་སྨིན་པ་ནི་འདི་ལྟ་བུའོ། །གཟའ་ཉི་མ་དང་གཟའ་ཟླ་བའི་ལམ་དང་སྐར་མདའ་ལྟུང་བ་ལས་ཕྱོགས་འབར་བ་དང་། བར་སྣང་ལས་ལྷའི་རྔ་སྒྲ་གྲག་པའི་རྣམ་པར་སྨིན་པ་ནི་འདི་ལྟ་བུའོ། །གཟའ་ཉི་མ་དང་གཟའ་ཟླ་བའི་ལམ་ལོག་པ་དང་སྐར་མདའ་ལྟུང་བ་ལས
72a7 ཕྱོགས་འབར་བ་དང་། བར་སྣང་ལས་ལྷའི་རྔ་སྒྲ་གྲག་པ་དང་། ཡང་ཉི་མ་དང་ཟླ་བ་འདི་གཉིས་འདི་ལྟར་མཐུ་ཆེ་བ། འདི་ལྟར་རྫུ་འཕྲུལ་ཆེ་བའི་རྣམ་པར་སྨིན་པ་ནི་འདི་ལྟ་བུའོ། །འཆར་བ་དང་འོང་བ་དང་ཀུན་ནས་ཉོན་མོངས་པ་དང་རྣམ་པར་བྱང་བ་རྣམ་པར་གཞག་པ་དག་ཏུ་མི་ཤེས་པ་ནི
iiif viewer powered by OpenSeadragon
