| e-texts navigator |
| Wylie |
58b1 འདི་སྙམ་དུ་ཡུལ་འདི་ན་བལ་གླང་འདི་ལ་ལྟོས་ན། ད་དགྲ་ཟླ་གཞན་ལ་བྱིན་པར་གྱུར་ཏོ་སྙམ་དུ་བསམས་ནས་རྒྱལ་པོ་ག་ལ་བ་དེར་སོང་སྟེ་འདི་སྐད་ཅེས་གསོལ་ཏོ། །རྒྱལ་བུས་ནི་ཕྱིའི་དགྲ་ཐུབ་པའི་བལ་གླང་རིན་པོ་ཆེ་ཕ་རོལ་གྱི་དགྲ་ཟླ་ལ་བྱིན་ནོ་ཞེས་གསོལ་པ་དང་། རྒྱལ་པོ་ཡབ་ཡེད་ཡེད་པོར་གྱུར་པ
58b2 ལས། བློན་པོས་ཡང་འདི་སྐད་ཅེས་གསོལ་ཏོ། །ད་ལྟར་རྒྱལ་པོ་ལ་བལ་གྱི་གླང་པོ་ཆེ་འདི་མངའ་བས་ཆབ་སྲིད་ཆེ་བ་ལགས་ཏེ། བལ་གྱི་གླང་པོ་ཆེ་དེ་ནི་བལ་གླང་དྲུག་ཅུ་སྙེད་ཀྱི་མཐུ་སྟོབས་དང་ལྡན་པ་ལགས་ན་རྒྱལ་བུས་དགྲ་ཟླ་ལ་སྩལ་ཏེ། དགྲ་ཟླས་འཚལ་བས་ཆབ་སྲིད་ཀྱང་སྟོར་དུ
58b3 མཆི་ན་ཇི་ལྟར་མཛད་པའི་རིགས། འདི་ལྟ་བུ་རང་ཉམས་སུ་སྦྱིན་པ་བྱིན་པས་བང་མཛོད་ཀྱང་སྟོངས་ཤིང་ཡུལ་གྱི་སྲིད་དང་བཙུན་མོ་དང་སྲས་ཀྱི་བར་དུ་སྦྱིན་པ་བགྱིད་པར་དོགས་སོ་ཞེས་གསོལ་པ་དང་། རྒྱལ་པོས་དེ་སྐད་ཅེས་སྨྲས་པ་ཐོས་ནས། ལྷག་པར་མི་དགའ་བར་གྱུར་ཏེ། བློན
58b4 པོ་གཞན་ཞིག་བོས་ནས། བློན་པོ་དེ་ལ་རྒྱལ་བུས་བལ་གྱི་གླང་པོ་ཆེ་དགྲ་ཟླ་ལ་བྱིན་པ་བདེན་ནམ་ཞེས་དྲིས་པ་དང་། བློན་པོ་དེས་ཀྱང་བྱིན་པ་བདེན་ནོ་ཞེས་གསོལ་ཏོ། །རྒྱལ་པོས་དེ་སྐད་སྨྲས་པ་ཐོས་མ་ཐག་ཏུ་ཆེར་དངངས་ནས་གདན་ཁྲི་ལས་ལྷུང་སྟེ། མི་དྲན་པར་བརྒྱལ་བར་གྱུར
58b5 པ་ལས་ཆུས་གཏོར་ནས་རིང་ཞིག་ལོན་པ་དང་ཕྱིར་སངས་པར་གྱུར། བཙུན་མོ་ཉི་ཁྲི་སྙེད་ཀྱང་ཐམས་ཅད་མྱ་ངན་གྱིས་ནོན་པར་གྱུར་ཏོ། །དེ་ནས་རྒྱལ་པོ་དང་བློན་པོ་རྣམས་འདུས་ནས། ད་རྒྱལ་བུ་འདི་ལ་ཇི་ལྟར་བྱ་ཞེས་བགྲོས་པ་དང་། དེའི་ནང་ན་བློན་པོ་གཅིག་གིས་ནི་བལ
58b6 གླང་གི་ལྷས་སུ་སོང་བ་ནི་རྐང་པ་གཅག་པར་རིགས། བལ་གླང་བཟུང་བ་ནི་ལག་པ་གཅག་པར་རིགས། །མིག་གིས་བལ་གླང་ལ་བལྟས་ན་ཡང་མིག་དབྱུང་བར་རིགས་ཞེས་གསོལ། ཁ་ཅིག་གིས་ནི་མགོ་བཅད་པར་རིགས་སོ་ཞེས་བློན་པོ་རྣམས་སོ་སོ་ནས་བགྲོས་ཏེ་གསོལ་བའི་ཚིག་རྒྱལ
58b7 པོས་ཐོས་ནས་རབ་ཏུ་མི་དགའ་ཞིང་མྱ་ངན་གྱིས་ནོན་ཏེ། བློན་པོ་རྣམས་ལ་འདི་སྐད་ཅེས་བསྒོའོ། །ངའི་བུ་འདི་ལེགས་པའི་དོན་ལ་མོས་ཏེ། སྦྱིན་པ་ལ་དགའ་བ་ཡིན་ན། ཇི་ལྟར་མཐོ་འཚམ་ཞིང་གཟུང་བར་བྱ། དེའི་ནང་ན་བློན་པོ་གཅིག་གིས་བློན་པོ་སྔ་མ་རྣམས་ཀྱིས་བགྲོས
iiif viewer powered by OpenSeadragon
