| e-texts navigator |
| Wylie |
57a1 བཏང་ན་ཅིའི་ཕྱིར་མི་དགའ་ཞིང་མྱ་ངན་བྱེད་པར་གྱུར་ཅེས་དྲིས་པ་དང་། རྒྱལ་བུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་རྩེ་ཞིང་ལྟད་མོ་ལྟར་མཆིས་པ་ལས། སློངས་མོ་པ་ལོང་བ་འོན་པ་ལྐུགས་པ་མང་པོ་དང་མཇལ་བས་མྱ་ངན་གྱིས
57a2 ནོན་པར་གྱུར་ཏེ། ང་ཡབ་རྒྱལ་པོ་ལ་གསོལ་བ་རྣམ་པ་གཅིག་གསོལ་ན་རྒྱལ་པོས་གནང་ངམ། ཡབ་རྒྱལ་པོས་ཀྱང་རྒྱལ་བུ་ཁྱོད་ཅི་དང་ཅི་འདོད་པ་སྨྲོས་ཤིག་དང་གནང་བར་བྱའོ་ཞེས་བསྒོ་བ་དང་། རྒྱལ་བུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ནི་ཡབ
57a3 རྒྱལ་པོ་ལ་མངའ་བའི་བང་མཛོད་ན་རིན་པོ་ཆེ་མཆིས་པ་རྣམས་གྲོང་ཁྱེར་གྱི་སྒོ་བཞི་དང་ཚོང་འདུས་སུ་སྤུངས་ཏེ་སློངས་མོ་པ་ཐམས་ཅད་ལ་ཡིད་དང་མི་འགལ་བར་སྦྱིན་པ་བགྱིད་པར་འཚལ་ལོ་ཞེས་གསོལ་པ་དང་། རྒྱལ་པོས་སྲས་རྒྱལ་བུ་ལ་ཁྱོད་ཅི་དང་ཅི་དགའ་བ་ཡིད་དང་མི་འགལ་བར
57a4 གནང་ངོ་ཞེས་བསྒོའོ། །དེ་ནས་རྒྱལ་བུས་བློན་པོ་རྣམས་ལ་བསྒོ་ནས། ནོར་དབྱིག་རིན་པོ་ཆེ་རྣམས་ཤིང་རྟས་བསྐྱས་ཏེ། གྲོང་ཁྱེར་གྱི་སྒོ་བཞི་དང་། ཚོང་འདུས་སུ་སྤུངས་ནས་ཕ་རོལ་པོ་འདོད་པ་བཞིན་སྦྱིན་པ་བྱིན་པ་དང་། ཡུལ་ཁམས་ཕྱོགས་བརྒྱད་ཀུན་ཏུ་རྒྱལ་བུའི་ཡོན
57a5 ཏན་གྲགས་པར་གྱུར་པས། ཁ་ཅིག་ནི་དཔག་ཚད་བརྒྱ། ཁ་ཅིག་ནི་དཔག་ཚད་སྟོང་། ཁ་ཅིག་ནི་དཔག་ཚད་ཁྲིའི་ཕ་རོལ་ནས་ལྷགས་ཏེ། ཁ་ཟས་དང་སྐོམ་འདོད་པ་ལ་ནི་ཟས་དང་སྐོམ་བྱིན། གང་གོས་དང་བགོ་བ་འདོད་པ་ལ་ནི་གོས་དང་བགོ་བ་བྱིན། གང་གསེར་དང་དངུལ་དང་རིན
57a6 པོ་ཆེ་འདོད་པ་ལ་ཡང་ཅི་འདོད་པ་བཞིན་ཡིད་དང་མི་འགལ་བར་གང་ཡང་མི་གཏང་བ་མེད་དོ། །དེའི་ཚེ་དེའི་དུས་ན། དགྲ་ཟླར་གྱུར་པའི་རྒྱལ་ཁམས་གཅིག་ཅིག་ཡོད་པ་དེས། རྒྱལ་བུ་སྦྱིན་པ་སྦྱིན་པ་ལ་དགའ་བས་ཕ་རོལ་པོ་ཅི་འདོད་པ་བཞིན་ཡིད་དང་མི་འགལ་བར་ཡོངས་སུ་གཏོང་ངོ
57a7 ཞེས་ཐོས་ནས་བློན་པོ་རྣམས་དང་མཁས་པ་བློ་དང་ལྡན་པ་ཀུན་ལ་སོགས་པ་བསྡུས་ཏེ་འདི་སྐད་ཅེས་བགྲོས་སོ། །ཡུལ་ཡ་བའི་རྒྱལ་པོ་ལ་བལ་གྱི་གླང་པོ་ཆེ་པད་མོའི་སྟེང་ནས་འགྲོ་བ་སུ་ད་ཡ་ཞེས་བྱ་བ་སྟོབས་དང་ལྡན་པ་ཞིག་ཡོད་དེ་དེ་དག་ནམ་དགྲ་ཟླའི་རྒྱལ་ཁམས་གཞན་དང་འཐབ་པའི་ཚེ།
iiif viewer powered by OpenSeadragon
