| e-texts navigator |
| Wylie |
277b1 ཁྱུ་མཆོག་དང་། གླང་པོ་ཆེ་དང་། སྤོས་ཀྱི་གླང་པོ་ཆེ་བརྒྱ་ཕྲག་དུ་མ་ཁྲིད་ནས་རྡོ་ཆེན་པོ་ཡངས་པ་འདི་ག་ལ་བ་དེར་སོང་སྟེ་ཕྱིན་ནས་རྡོ་ཆེན་པོ་ཡངས་པ་དེ་རྩིད་པའི་ཐག་པ་སྲ་བས་ལན་མང་དུ་དཀྲིས་ནས། ཁ་ཅིག་གིས་ནི་སྐས་བཅས་ཏེ། རྩཝ་མུན་ཛ་དང་། བལ་བ་ཛའི་ཐག་པ་དང་། རྟས
277b2 འདྲེན་པའི་ཐག་པ་དག་གིས་ཚུར་འདྲེན་པར་བྱེད་ཕར་འདྲེན་པར་བྱེད་དོ། །ཁ་ཅིག་ནི་ཐང་ལྕགས་བརྒྱས་གཞི་ནས་འབྱིན་པར་འདོད་དོ། །ཁ་ཅིག་ནི་དགྲ་སྟ་དག་གིས་གཅོད་པར་འདོད་དོ། །ཁ་ཅིག་ནི་རྡོ་རྗེས་གདབ་པ་དག་གིས་ཕྱེ་མར་བྱ་བར་འདོད་དོ། །ཁ་ཅིག་ནི་ལུས་ཀྱི་སྟོབས་ཀྱིས
277b3 མཆུ་དག་བསྡམས་ཏེ་ཡོངས་སུ་བསྐྱོད་པར་འདོད་དོ། །ཁ་ཅིག་ནི་ཁྱུ་མཆོག་དག་དང་། བ་ལང་གི་གཙོ་བོ་དག་གིས་བསྒྱེལ་བར་འདོད་དོ། །ཁ་ཅིག་ནི་བ་ལང་ཁྱུའི་སྟོབས་ཀྱིས་རབ་ཏུ་གཞོམ་པར་འདོད་དོ། །ཁ་ཅིག་ནི་སྨན་གྱི་མཐུས་གཞིག་པར་འདོད་དོ། །ཁ་ཅིག་ནི་སྔགས
277b4 ཀྱི་མཐུས་མི་སྣང་བར་བྱ་བར་འདོད་དེ། དེའི་ཕྱིར་བརྩོན་པ་དང་། དྲང་བ་དང་། འབད་པ་དེ་ལྟ་བུས་དེ་དག་གིས་ཅི་ཕྱོགས་འདི་ནས་བཏེག་སྟེ། ཕྱོགས་གཅིག་ཅིག་ཏུ་གཞག་གོ་སྙམ་པ་དང་། དེ་དག་ལུས་ངལ་ཞིང་ལུས་དུབ་ལ་ལུས་སྒུ་བས་རབ་ཏུ་འབད་པས་སྒྱིད་ལུག་སྟེ་རྡོ
277b5 ཆེན་པོ་ཡངས་པ་དེ་བསྒུལ་བར་ཡང་མ་ནུས་ན། བསྒྲེང་པའམ་འཕང་བར་ལྟ་ག་ལ་ནུས། དེ་ནས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། གང་ན་རྡོ་ཆེན་པོ་ཡངས་པ་དེ་གནས་པའི་ཕྱོགས་དེར་གཤེགས་སོ། །ཀུ་ཤའི་གྲོང
277b6 ཁྱེར་དུ་སྐྱེས་པའི་གྱད་རྣམས་ཀྱིས་བཅོམ་ལྡན་འདས་རྒྱང་རིང་པོ་ཁོ་ན་ནས་ཚུར་གཤེགས་པ་མཐོང་སྟེ། མཐོང་ནས་ཀྱང་དགའ་མགུ་ཞིང་རངས་ཏེ་དགའ་བ་དང་། བདེ་བ་དང་། ཡིད་བདེ་བ་སྐྱེས་ཤིང་། བླ་མ་ལ་གུས་པ་ཆེན་པོ་སྐྱེས་ནས་ཐམས་ཅད་ཀྱིས་ཀྱང་བཅོམ་ལྡན་འདས་ལ་བསུ
277b7 བ་བྱེད་དོ། །བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་བར་བྱེད་དོ། །བཅོམ་ལྡན་འདས་ལ་ལན་གསུམ་བསྐོར་བར་བྱེད་དེ། །བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ཀྱིས་ཀུ་ཤའི་གྲོང
iiif viewer powered by OpenSeadragon
