| e-texts navigator |
| Wylie |
74a1 སངས་རྒྱས་དང་བྱང་ཆུབ་སེམས་དཔའ་རྣམས་བཞུགས་པས་ན་སེམས་ཅན་དེ་མྱུར་དུ་མངོན་པར་ཤེས་པ་དང་། དབང་པོ་རྣོན་པོར་འགྱུར་བར་རིག་པར་བྱའོ། །གང་ཞིག་ཆོས་ཀྱི་གཞུང་འདི་ལ་བརྗོད་དམ། འཛིན་ཏམ། ཀློག་གམ། ཆུབ་པར་བྱེད་དམ། ཁ་ཏོན
74a2 དུ་བྱེད་དམ། ཚུལ་བཞིན་དུ་ཡིད་ལ་བྱེད་ན་དེ་བདུད་ཀྱི་དབང་དུ་མི་འགྱུར་རོ། །བཅོམ་ལྡན་འདས་ཀྱིས་དགོངས་པ་འདི་བཤད་ནས་འཇིག་རྟེན་གྱི་དབང་པོ་དང་། བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་དང་། ཉན་ཐོས་ཆེན་པོ་རྣམས་དང་། ལྷ་དང་མིར་བཅས་པ་དང་།
74a3 ལྷ་མ་ཡིན་དང་། དྲི་ཟའི་འཇིག་རྟེན་རྣམས་བཅོམ་ལྡན་འདས་ཀྱིས་བཤད་པ་ལ་མངོན་པར་དགའོ། །ཐེག་པ་ཆེན་པོའི་མདོ་ཆོས་རྒྱ་མཚོ་ཞེས་བྱ་བ་རྫོགས་སོ།། །།རྒྱ་ལས་འགྱུར་བ་སྐད་གསར་ཆད་ཀྱིས་གཏན་ལ་ཕབ་པའོ།། །།
74a4 @##། །ཆོས་ཀྱི་རྒྱ་མོ། སངས་རྒྱས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའི་སེམས་ཀྱི་གནས་བཤད་པ་ལེའུ་བཅུ་སྟེ། བམ་པོ་དང་པོ། སངས་རྒྱས་ཀྱི་བུ་ཐམས་ཅད་ཐལ་མོ་སྦྱོར་ལ་སངས་རྒྱས་ཐམས་ཅད་ཀྱི་ཚུལ་ཁྲིམས་ཆེན་པོ་བཤད་པ་སེམས་ཐག་པ་ནས་ཉོན་ཅིག་།མང་པོ་ཚོགས
74a5 པ་ཡིད་བསྡུས་ཏེ་ཉོན་ཅིག་། བདག་ལ་ཀུན་ཏུ་ལྟུང་བ་ཡོད་པར་ཤེས་ན་མཐོལ་ཚངས་བྱོས་ཤིག་།མཐོལ་ཚངས་བྱས་ན་བདེ་བར་འགྱུར་རོ། །མཐོལ་ཚངས་མ་བྱས་ན་སྡིག་ཕྱིར་ཞིང་ཟབ་ཏུ་སྐྱེའོ། །ཀུན་ཏུ་ལྟུང་བ་མེད་ན་མ་སྨྲ་བར་འཁོད་ཅིག་དང་། ཀུན་ཀྱང་གཙང་མར་མངོན་ནོ། །
74a6 ལེགས་པ་ཆེན་པོ་ཡོད་པའི་རྣམས་དང་། དགེ་བསྙེན་དང་། དགེ་བསྙེན་མ་ལ་སོགས་པ་བརྟག་པར་ཉོན་ཅིག་།སངས་རྒྱས་མྱ་ངན་ལས་འདས་པའི་ཕྱིར་ན་མཆོད་རྟེན་ལས་ཆོས་བྱེད་པའི་ཚེ་སོ་སོར་ཐར་པ་ལ་བཙུད་ཅིང་ལྕི་བ་དང་། གུས་ཤིང་རིན་ཆེར་བྱོས་ཤིག་།སོ་སོར་ཐར་པ་ཞེས
74a7 བྱ་བའི་ཚུལ་ཁྲིམས་ནི་འདི་ཡིན་ནོ། །ཚུལ་ཁྲིམས་འདི་བཟུང་ན་མུན་པ་ལས་སྣང་བར་ཕྲད་པ་དང་མཚུངས་སོ། །མི་དབུལ་པོ་ལས་ནོར་ཆེན་པོ་ཐོབ་པ་དང་མཚུངས་སོ། །ནད་པ་སྨན་རྙེད་པ་དང་མཚུངས་སོ། །བཙོན་ཁྲི་མུན་ནས་ཕྱུང་བ་དང་མཚུངས་སོ། །ལམ་རིང་པོར་སོང་བ་ལས
iiif viewer powered by OpenSeadragon
