| e-texts navigator |
| Wylie |
213b1 སེམས་དེ་ལ་སེར་སྣ་མི་བྱེད་ཀྱི། སེམས་ཅན་ཐམས་ཅད་ཀྱང་ཐེག་པ་ཆེན་པོའི་གོ་ཆ་དེ་སྐོན་པར་བྱེད་ཅིང་སེམས་མཉམ་པ་མེད་པ་དེ་འང་གང་བའམ་བྲི་བར་ཡང་མི་མཐོང་ཞིང་། དེ་ལྟར་སེར་སྣ་མེད་པའི་སེམས་ཀྱིས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ལག་ན
213b2 རིན་ཆེན་ཕྱག་རྒྱས་སྨྲས་པ། ཀྱེ་མའོ་སེམས་ཅན་འདི་དག་ནི་འགྲོ་བ་དྲུག་ཏུ་ལྷུང་གིས། དེ་དང་དེ་དག་ཏུ་སྙིང་རྗེ་ཆེན་པོ་བསྐྱེད་དེ། སེམས་ཅན་ཐམས་ཅད་ལ་ཆོས་ཀྱི་ཕྱག་རྒྱ་རིན་པོ་ཆེའི་ཕྱག་རྒྱ་གསུམ་གྱིས་བཏབ་པ་སྦྱིན་པར་བྱ་སྟེ། སེམས་ཅན་ཐོས་པ་ཉུང་བ་རྣམས་ལ་ནི
213b3 ཐོས་པའི་ལག་པ་སྦྱིན་པར་བྱའོ། །སེམས་ཅན་སེར་སྣ་ཅན་རྣམས་ལ་ནི་གཏོང་བའི་ལག་པ་སྦྱིན་པར་བྱའོ། །སེམས་ཅན་ངང་ཚུལ་ངན་པ་ཅན་རྣམས་ལ་ནི་ཚུལ་ཁྲིམས་ཀྱི་ལག་པ་སྦྱིན་པར་བྱའོ། །སེམས་ཅན་གནོད་སེམས་ཅན་རྣམས་ལ་ནི་བཟོད་པའི་ལག་པ་སྦྱིན་པར
213b4 བྱའོ། །སེམས་ཅན་ལེ་ལོ་ཅན་རྣམས་ལ་ནི་བརྩོན་འགྲུས་ཀྱི་ལག་པ་སྦྱིན་པར་བྱའོ། །སེམས་ཅན་དྲན་པ་ཉམས་པ་རྣམས་ལ་ནི་བསམ་གཏན་ཐོབ་པའི་ལག་པ་སྦྱིན་པར་བྱའོ། །སེམས་ཅན་ཤེས་རབ་འཆལ་པ་རྣམས་ལ་ནི་ཤེས་རབ་ཀྱི་ལག་པ་སྦྱིན་པར་བྱ་སྟེ། སེམས
213b5 ཅན་དག་ཆོས་དཀར་པོ་གང་དང་གང་དག་ལས་བྲལ་བར་གྱུར་པའི་ཆོས་དེ་དང་དེ་དག་ཉིད་ཡོངས་སུ་རྫོགས་པར་བྱ་བའི་ཕྱིར་ལག་པ་སྦྱིན་པར་བྱ་སྟེ། བྱང་ཆུབ་སེམས་དཔའ་དེའི་དགེ་བའི་རྩ་བའི་ལག་པ་ཡང་རིན་པོ་ཆེའི་ཕྱག་རྒྱ་གསུམ་གྱིས་གདབ་པར་བྱའོ། །གསུམ་གང
213b6 དག་ཡིན་ཞེ་ན། འདི་ལྟ་སྟེ། སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བསྔོ་བ་རིན་པོ་ཆེའི་ཕྱག་རྒྱས་གདབ་པར་བྱ་བ་དང་། བདག་གི་དགེ་བའི་རྩ་བ་ཡོངས་སུ་འགྲུབ་པ་རིན་པོ་ཆེའི་ཕྱག་རྒྱས་གདབ་པར་བྱ་བ་དང་། སེམས་ཅན་ཐམས་ཅད
213b7 ནམ་མཁའི་རང་བཞིན་གྱི་ཕྱག་རྒྱས་གདབ་པར་བྱ་བ་སྟེ། རིགས་ཀྱི་བུ་དེ་འདྲ་བའི་གནས་ལ་གནས་པས་ནི་ཐམས་ཅད་མཁྱེན་པའི་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་སེང་གེའི་བློ་གྲོས་ཀྱིས་སྨྲས་པ། ཀྱེ་མའོ་གྲོགས་པོ་དག་འདི་ནི་མི་འཇིགས
iiif viewer powered by OpenSeadragon
