| e-texts navigator |
| Wylie |
198a1 འཕགས་པ་རྣམ་པར་འཕྲུལ་པའི་རྒྱལ་པོས་ཞུས་པ། བམ་པོ་གསུམ་པ་སྟེ་ཐ་མའོ། །རྣམ་པར་འཕྲུལ་པའི་རྒྱལ་པོ་དེ་ལ་ཤེས་རབ་ཀྱི་རྣམ་པར་འཕྲུལ་པ་གང་ཞེ་ན། ཆོས་རྣམས་རྣམ་པར་འབྱེད་པ་ཚིག་རབ་ཏུ་དབྱེ་བ་དང་། སོ་སོ་ཡང་དག་པར་རིག་པ
198a2 བཞི་པོ་འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་ཉེ་བར་ལེན་ཅིང་སྟོན་པའོ། །དེ་ལ་དོན་སོ་སོ་ཡང་དག་པར་རིག་པ་གང་ཞེ་ན། ཚིག
198a3 འབྲུ་བཤད་པ་ཐམས་ཅད་དོན་ཉིད་ལ་རྟོན་པ་ཡིན་གྱི་ཚིག་འབྲུ་ལ་རྟོན་པ་མ་ཡིན་པ་སྟེ། དོན་ཅེས་བྱ་བ་ནི་ཆོས་ཐམས་ཅད་ཡང་དག་པ་ཉིད་དུ་འདུ་ཤེས་པའོ། །དོན་ཅེས་བྱ་བ་ནི་འདི་ལྟ་སྟེ། བརྗོད་དུ་མེད་པའོ། །བརྗེད་ངས་པ་མེད་ཅིང་ཚིག་འབྲུ་ཐ་དད་པ་མེད་པ་ཉིད་དང་། སྔོན་གྱི
198a4 མཐའ་དང་། ཕྱི་མའི་མཐའི་སྒྲ་ལས་དབེན་པ་ཉིད་དང་། དེ་ནི་དོན་ཅེས་བྱའོ། །ཚིག་འབྲུ་གསལ་བའི་དོན་ལ་ནི་བརྟེན་པར་མི་བྱའི། གང་ཚིག་འབྲུ་མཉམ་པ་དེ་ནི་དོན་ཡིན་ཏེ། དེ་ནི་དོན་སོ་སོ་ཡང་དག་པར་རིག་པ་ཞེས་བྱའོ། །དོན་ཐམས་ཅད་ཡང་དག་པར་རིག་པ་ནི་དོན་སོ་སོ
198a5 ཡང་དག་པར་རིག་པ་ཞེས་བྱའོ། །དེ་ལ་ཆོས་སོ་སོ་ཡང་དག་པར་རིག་པ་གང་ཞེ་ན། དེ་ཆོས་ལ་རྟོན་པ་ཡིན་གྱི་ཆོས་མ་ཡིན་པ་ལ་མི་རྟོན་ཏེ། ཆོས་ལ་རྟོན་པ་ལ་ཆོས་མ་ཡིན་པ་སྣང་བར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། དེས་ནི་ཆོས་ཐམས་ཅད་མིང་དུ་བརྗོད་པ་ལས
198a6 དབེན་པར་ཤེས་པའི་ཕྱིར་རོ། །ཆོས་སོ་སོ་ཡང་དག་པར་རིག་པ་ཞེས་བྱ་བ་ནི་ཐེག་པ་ཐ་དད་པ་དང་། ཆོས་ཐ་དད་པར་ཡང་འཚལ་ལ། ཆོས་ཀྱི་དབྱིངས་ཀྱི་མཚན་ཉིད་ཐ་དད་པར་ཡང་མི་བྱེད་པ་གང་ཡིན་པའོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་ཀྱི་དབྱིངས་ནི་མཚན
198a7 ཉིད་མེད་པར་མཚན་ཉིད་གཅིག་པའི་ཕྱིར་རོ། །དེ་བརྗོད་པ་གང་གིས་ཆོས་རྣམས་བརྗོད་པ་དེ་བྲག་ཅའི་སྒྲ་དང་མཚུངས་པ་ཉིད་དུ་འཇུག་གོ། །ཆོས་གང་དག་ཡོངས་སུ་བརྗོད་པ་དེ་དག་ཀྱང་ཆོས་ཀྱི་དབྱིངས་དང་མཉམ་པར་ཤེས་ལ་ཤེས་པ་དང་ཐ་སྙད་ལ་ཐོགས་པ་མེད་པ། དེ
iiif viewer powered by OpenSeadragon
