| e-texts navigator |
| Wylie |
190b1 པར་ཤེས་པ་གང་ཡིན་པ་དེ་ནི་མངོན་པར་ཤེས་པ་ཞེས་བྱའོ། །རྣམ་པར་འཕྲུལ་པའི་རྒྱལ་པོ་གཞན་ཡང་བྱང་ཆུབ་སེམས་དཔའ་མངོན་པར་ཤེས་པ་ཐོབ་པ་ནི་གཟུགས་དང་། ཁ་དོག་དང་། གཟི་བརྗིད་དང་། སྙན་པ་དང་། གྲགས་པ་དང་། སྟོབས་དང་། རིགས་དང་།
190b2 རུས་དང་། ནོར་དང་། གཡོག་འཁོར་རྣམས་ཀྱིས་མངོན་པར་ཤེས་པར་འགྱུར་ཏེ། དེའི་ཕྱིར་མངོན་པར་ཤེས་པ་ཞེས་བྱའོ། །རྣམ་པར་འཕྲུལ་པའི་རྒྱལ་པོ་གཞན་ཡང་མངོན་པར་ཤེས་པ་ཐོབ་པའི་བྱང་ཆུབ་སེམས་དཔའ་ལྷ་དང་། ཀླུ་དང་། གནོད་སྦྱིན་དང་། དྲི་ཟ
190b3 དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས
190b4 རྣམས་ཀྱིས་མངོན་པར་ཤེས་པར་འགྱུར་ཏེ། དེ་བས་ན་མངོན་པར་ཤེས་པ་ཞེས་བྱའོ། །རྣམ་པར་འཕྲུལ་པའི་རྒྱལ་པོ་དེ་ནི་མངོན་པར་ཤེས་པ་ཞེས་བྱ་སྟེ། མངོན་པར་ཤེས་པ་དེས་བྱང་ཆུབ་སེམས་དཔའ་སྔོན་དམ་བཅས་པ་ལས་ཀྱང་མི་འགྱུར་ལ་བྱ་བ་ཐམས་ཅད་ཀྱང
190b5 སྟོན་ཏོ། །རྣམ་པར་འཕྲུལ་པའི་རྒྱལ་པོ་དེ་ལ་ཤེས་པའི་རྣམ་པར་འཕྲུལ་པ་གང་ཞེ་ན། འདི་ལྟ་སྟེ། ཕུང་པོ་ཤེས་པ་དང་། ཁམས་ཤེས་པ་དང་། སྐྱེ་མཆེད་ཤེས་པ་དང་། རྟེན་ཅིང་འབྲེལ་པར་འབྱུང་བ་ཤེས་པ་དང་། བདེན་པ་ཤེས་པའོ། །རྣམ་པར་འཕྲུལ
190b6 པའི་རྒྱལ་པོ་དེ་ལ་ཕུང་པོ་ཤེས་པ་གང་ཞེ་ན། གཟུགས་སྟོང་པ་དང་། གཟུགས་ཀྱི་སྔོན་གྱི་མཐའ་སྟོང་པ་དང་། གཟུགས་ཀྱི་ཕྱི་མའི་མཐའ་སྟོང་པ་དང་། གཟུགས་ཀྱི་དབུས་སྟོང་པ་དང་། རྣམ་པར་འཕྲུལ་པའི་རྒྱལ་པོ་དེ་བཞིན་དུ་ཚོར་བ་དང་། འདུ་ཤེས་དང་།
190b7 འདུ་བྱེད་རྣམས་དང་། རྣམ་པར་ཤེས་པ་སྟོང་པ་དང་། རྣམ་པར་ཤེས་པའི་སྔོན་གྱི་མཐའ་སྟོང་པ་དང་། རྣམ་པར་ཤེས་པའི་ཕྱི་མའི་མཐའ་སྟོང་པ་དང་། རྣམ་པར་ཤེས་པའི་དབུས་སྟོང་པ་ཡིན་ཏེ། ཉེ་བར་ལེན་པའི་ཕུང་པོ་ལྔ་པོ་དེ་དག་སྟོང་ཞིང་ཤིན་ཏུ་སྟོང་པར
iiif viewer powered by OpenSeadragon
