| e-texts navigator |
| Wylie |
109b1 འཇིག་རྟེན་ཀུན་མཛའ་ཐམས་ཅད་རྟོགས་པར་ཁོང་དུ་ཆུད། །དེ་ཕྱིར་འགྲོ་བས་སྤྱི་བོར་ཐལ་སྦྱར་དེ་ལ་འདུད། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཐམས་ཅད་དུ་ཁ་ན་མ་ཐོ་བ་མེད་ཅིང་། ཡོན་ཏན་རྣམ་པ་ཐམས་ཅད་དང་ལྡན་པ
109b2 རྣམས་ཡིན་ཏེ། བཞི་གང་ཞེ་ན། མངོན་པར་ཤེས་པའི་ཡེ་ཤེས་ཀྱིས་རྣམ་པར་བརྩེ་བ་དང་། སངས་རྒྱས་ཐམས་ཅད་ཀྱི་དགོངས་པའི་སྤོབས་པ་དང་། དགེ་བ་ཐམས་ཅད་དང་མི་འབྲལ་ཞིང་བག་ཆགས་དང་བྲལ་བ་དང་། དགེ་བའི་ཆོས་ཐམས་ཅད་དང་ལྡན
109b3 ཞིང་དབང་བསྐུར་བ་ཐོབ་པ་སྟེ། ཆོས་བཞི་པོ་དེ་དག་དང་ངོ་། །དེ་ལ་འདི་སྐད་ཅེས་བྱ་སྟེ། སེམས་ཅན་དག་པ་རྒྱ་ཆེན་མངོན་ཤེས་ཤེས་པས་བརྩེ། །བདེ་གཤེགས་ཀུན་གྱིས་དགོངས་པ་མཁའ་འདྲའི་སྤོབས་དང་ལྡན། །བརྩོན་འགྲུས་ཐོགས་མེད་མི་དགེ
109b4 བག་ཆགས་ཀུན་སྤོངས་ཤིང་། །དགེ་དང་ལྡན་ཞིང་དབང་བསྐུར་ཐོབ་པར་གྱུར་པ་སྟེ། །ཆོས་རྣམས་དེ་དག་ལ་ནི་རབ་ཏུ་གནས་གྱུར་པ། །དེ་དག་ཁ་ན་མ་ཐོ་མེད་པའི་ཡོན་ཏན་ལྡན། །བཅོམ་ལྡན་འདས་ཀྱིས་བཞི་པ་བསྒྲུབ་པ་འདི་བསྟན་པ་ན་ལྷ་དང་མི་རྣམས་ལས
109b5 སྲོག་ཆགས་ས་ཡ་ཉིས་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷ་དང་མི་རྣམས་ཀྱི་སྐྱེ་དགུ་ལས་སྲོག་ཆགས་འབུམ་ནི་ཆོས་རྣམས་ལ་ཆོས་ཀྱི
109b6 མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཤིང་། འཇིག་རྟེན་ཐམས་ཅད་སྣང་བ་ཆེན་པོས་ཁྱབ་པར་ཡང་གྱུར་ཏོ། །ལྷ་རྣམས་ཀྱིས་ཀྱང་ལྷའི་མེ་ཏོག་གི་ཆར་རབ་ཏུ་ཕབ
109b7 ཅིང་། ལྷའི་སིལ་སྙན་དག་གི་སྒྲ་ཡང་བྱུང་བར་གྱུར་ཏོ། །ཀླུ་རྣམས་ཀྱིས་ཀྱང་མུ་ཏིག་དམར་པོ་དང་། ཀླུའི་མེ་ཏོག་གི་ཆར་རབ་ཏུ་ཕབ་པོ། །ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་རྣམས་ཀྱིས་ཀྱང་བཅོམ
iiif viewer powered by OpenSeadragon
