| e-texts navigator |
| Wylie |
106a1 གཏིང་དཔག་དཀའ་བ་རྣམས་ཡིན་ཏེ། བཞི་གང་ཞེ་ན། ཆོས་ཟབ་མོའི་ཚུལ་ལ་འཇུག་པ་དང་། རྟག་ཏུ་དོན་དང་ལྡན་ཞིང་བསྙེན་པར་དཀའ་བ་དང་། རྟག་ཏུ་ཡིད་བྱུང་ཞིང་ཆོས་སེམས་པར་བྱེད་པ་དང་། སངས་རྒྱས་ཀྱི་ཡེ་ཤེས་སྒྲིབ་པ་མེད་པ་ལ
106a2 སེམས་ཀྱིས་ངེས་པར་རྟོགས་པར་བྱེད་པ་སྟེ། ཆོས་བཞི་པོ་དེ་དག་དང་ངོ་། །དེ་ལ་འདི་སྐད་ཅེས་བྱ་སྟེ། ཟབ་མོའི་ཆོས་ཀྱི་ཚུལ་ལ་ཞུགས་པར་གྱུར་པ་དང་། །རྟག་ཏུ་དོན་དང་ལྡན་ཞིང་བསྙེན་པར་དཀའ་གྱུར་ལ། །རྟག་ཏུ་ཡིད་བྱུང་ཆོས་ལ་བསམ་པ་ཞུགས་གྱུར་ཅིང་། །
106a3 སེམས་ཀྱིས་ངེས་པར་རྟོགས་པར་བྱེད་པ་གང་ཡིན་པའི། །མཁས་པ་ཐེག་པ་ཆེ་ལ་བརྟན་པ་རབ་གནས་པ། །བློ་རྣམས་དག་གིས་གཏིང་དཔག་དཀའ་བར་རབ་འགྱུར་ཞིང་། །ཆགས་པ་མེད་པའི་ཡེ་ཤེས་ཡང་དག་སྒྲུབ་བྱེད་པ། །དེ་ཕྱིར་བློ་རྣམས་དག་གིས་གཏིང
106a4 དཔག་དཀའ་བ་ཡིན། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། འཇིག་རྟེན་གྱི་ཆོས་བརྒྱད་ཀྱིས་མི་གོས་པ་རྣམས་ཡིན་ཏེ། བརྒྱད་གང་ཞེ་ན། རྙེད་པ་དང་། སྙན་པ་དང་། བསྟོད་པ་དང་། བདེ་བས་ཁེངས་པ་མེད་པ་དང་། མ
106a5 རྙེད་པ་དང་། མི་སྙན་པ་དང་། སྨད་པ་དང་། སྡུག་བསྔལ་གྱིས་ཞུམ་པ་མེད་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕུང་པོ་རྣམས་ལ་ཡོངས་སུ་སྤྱོད་པར་བྱེད་པ་དང་། ཕུང་པོ་ཡོངས་སུ་ཤེས་པ་སྲུང་ཞིང་དབེན་པར་ལྟ་བ་སྟེ། ཆོས་བཞི་པོ་དེ་དག་དང་ངོ་།
106a6 དེ་ལ་འདི་སྐད་ཅེས་བྱ་སྟེ། རྙེད་དང་སྙན་དང་བསྟོད་དང་བདེ་བ་ཀུན་ཐོབ་ཀྱང་། །དེ་དག་ལ་ནི་ནམ་ཡང་ཁེངས་པར་འགྱུར་བ་མེད། །མ་རྙེད་མི་སྙན་སྨད་དང་སྡུག་བསྔལ་ཐོབ་གྱུར་ཀྱང་། །དེ་དག་པད་མ་བཞིན་དུ་ཆགས་མེད་འཇིག་རྟེན་སྤྱོད། །སེམས་ཅན་སྨིན་པར
106a7 བྱ་ཕྱིར་ཕུང་པོ་ཡོངས་སྤྱོད་ཅིང་། །ཕུང་པོ་སྒྱུ་མ་གསོག་འདྲ་ཡ་མ་བརླར་ཤེས་པ། །སེམས་ཅན་ཕན་བདེའི་དོན་དུ་འཇིག་རྟེན་སྤྱོད་བྱེད་ཀྱང་། །འཇིག་རྟེན་ཆོས་ཀྱིས་མི་གོས་ཚུལ་ཁྲིམས་སྤོས་ངད་ལྡན། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ
iiif viewer powered by OpenSeadragon
